ខេត្តបន្ទាយមានជ័យ ៖ ក្មេងតូចដ៏គួរឱ្យអាណិត គ្រាន់តែដើរសុំទានគេមិនបានលុយ ស្រាប់តែត្រូវឪពុកវ៉ៃធ្វើបាបរហូតដល់មានរបួស ថែមទាំងបង្អត់បាយទៀត សំណាងត្រូវអ្នកជិតខាងឃើញក៏ថតរូបបង្ហោះហ្វេសប៊ុក ក្រោយមកកម្លាំងកងរាជអាវុធហត្ថឃាត់ខ្លួនបុរសជាឪពុក និងបញ្ជូនទៅសាលាដំបូងខេត្តបន្ទាយមានជ័យ កាលពីថ្ងៃទី១០ខែធ្នូ ឆ្នាំ២០១៨។
លោកវរសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែត បានប្រាប់ថាក្រោយពេលឃើញបណ្តាញសង្គមហ្វេសប៊ុកបានផ្សាយមានក្មេងប្រុសម្នាក់មានរបួស មានឈ្មោះ ធី នុល ហៅប៉ូយ អាយុ៤ឆ្នាំ (មុខរបរដើរសុំទាន) រស់នៅភូមិក្បាលស្ពានមួយ សង្កាត់-ក្រុងប៉ោយប៉ែត ។
លោកបានបញ្ជាក់ថា ក្រោយពេលឃើញក្មេងប្រុសត្រូវបានវ៉ៃធ្វើបាបកម្លាំងជំនាញក៏បានចុះស្រាវជ្រាវរកឃើញក្មេងប្រុសរងគ្រោះ ហើយសាកសួរនាំបានប្រាប់ថា របួសនេះបណ្តាលមកពីឱពុកវ៉ៃធ្វើបាបស្ទើររាល់ថ្ងៃ នៅពេលដែលទៅដើរសុំទានមិនបានលុយ ហើយត្រឡប់មកផ្ទះវិញ ត្រូវឱពុកវ៉ៃធ្វើបាប និងបង្អត់បាយក៏មានដែរ ទើបអ្នកជិតខាងឃើញសភាពរបួសបែបនេះ រួចក៏ថតបង្ហោះរូបភាពរបួសនោះក្នុងបណ្តាញសង្គមហ្វេសប៊ុក ហើយត្រូវកម្លាំងកងរាជអាវុធហត្ថចុះមកផ្ទាល់ឃាត់ខ្លួនបុរសឱពុកបង្កើតដែលវ៉ៃធ្វើកូនរបស់ខ្លួននៅថ្ងៃទី៩ ធ្នូ នៅចំណុចភូមិក្បាលស្ពានមួយ សង្កាត់-ក្រុងប៉ោយប៉ែត ។
លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបានបញ្ជាក់ថា ក្រោយពេលឃាត់ខ្លួនជនសង្ស័យជាឱពុកឈ្មោះ ហ៊ុ រ៉ា ភេទប្រុស អាយុ៣៦ឆ្នាំរស់នៅភូមិខាងលើ បាននាំមកសាកសួរ និងសារភាពថា ខ្លួនពិតបានវ៉ៃធ្វើបាបកូនបង្កើតរបស់ខ្លួន ដោយបង្ខំឱ្យទៅដើរសុំទាន ពេលមិនបានលុយឱ្យខ្លួនទិញស្រាផឹង និងជក់គ្រឿងញៀន ក៏វ៉ៃធ្វើបាប។
លោកបានបញ្ជាក់ថា ជនសង្ស័យជាឪពុកខាងលើនេះ ត្រូវបានកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមច្បាប់។ ហើយកម្លាំងសមត្ថកិច្ចបានយកក្មេងប្រុសរងគ្រោះទៅរស់នៅជាមួយជីដូនបង្កើតឈ្មោះ សោម សារ៉េត អាយុ៦៤ឆ្នាំ រស់នៅភូមិក្បាលកោះ សង្កាត់-ក្រុងប៉ោយប៉ែត ហើយលោកបានណែនាំកម្លាំងនាំយកអំណោយប្រគល់ជូនមានអង្ករ៥០គីឡូក្រាម ទឹកត្រី១យួរ ទឹកស៊ីអ៊ីវ១យួរ ត្រីខ១០កំប៉ុង អំពិលអ៊ីយ៉ូត១គីឡូក្រាម ស្ករសរ១គីឡីក្រាមថវិកា១០០.០០០រៀលផង៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]