ខេត្តសៀមរាប៖ នាថ្ងៃទី០៧ ខែធ្នូ ឆ្នាំ២០១៨ មានការប្រទាញប្រទង់គ្នារវាងម្ចាស់ដីតូប និង គណៈកម្មការចម្រុះក្រុងសៀមរាបក្នុងការអនុវត្តសេចក្តីណែនាំរបស់ខេត្តក្នុងការរុះរើសំណង់តូបលក់ដូរនៅលើដីចំណីផ្លូវចំនួន២កន្លែង ស្ថិតនៅតាមផ្លូវវាងក្រុង ក្នុងភូមិកក្រាញ់ សង្កាត់សៀម រាប ក្រុងខេត្តសៀមរាប ដោយយោងតាមពាក្យបណ្តឹងរបស់ប្រជាពលរដ្ឋមានទីលំនៅភូមិជាមួយគ្នាដើម្បីសុំរុះរើសំណង់ទាំងពីរចេញពីដីចំណីផ្លូវដែលនៅមុខដីរបស់ខ្លួន ។
ក្នុងការចុះអនុវត្តរុះរើសំណង់តូបទាំងពីរនេះក្រោមកិច្ចដឹកនាំរបស់លោក នួន ពុទ្ធារ៉ា អភិបាល នៃគណៈអភិបាលក្រុងសៀមរាបរួមទាំងមេធាវីចុងបណ្តឹងចូលរួមផងដែរ ។
យោងតាមការសន្និដ្ឋានរបស់សាលាដំបូងខេត្តសៀមរាបក្នុងការចេញសាលក្រម ដោយបានបញ្ជាក់ ទៅលើការលើកបណ្តឹងរឿងរដ្ឋប្បវេណី លេខ៥៣៥ ចុះថ្ងៃទី១៩ ខែធ្នូ ឆ្នាំ២០១៣ ដោយសាលក្រមដោយមិនឆ្លងកាត់ការទាញហេតុផលផ្ទាល់មាត់ដោយខ្វះលក្ខខណ្ឌបណ្តឹងស្របតាមមាត្រា៣២ និង ស្របតាមមាត្រា៨១ នៃក្រម នីតិវិធីរដ្ឋប្បវេណី នៅក្នុងសេចក្តីសម្រេចបញ្ចប់ ដោយលើកចោលនូវបណ្តឹងរឿងរដ្ឋប្បវេណីលេខ៥៣៥ ចុះថ្ងៃទី១៩ ខែធ្នូ ឆ្នាំ២០១៣ នៃសាលក្រមលេខ១៣(ណ) ចុះថ្ងៃទី២០ ខែឧសភា ឆ្នាំ២០១៤ ។
ក្នុងសកម្មភាពប្រតិបត្តិការរុះរើនេះដែរ ក៏មានប្រើពាក្យសម្តីអសុរោះ ពីម្ចាស់ដីតូប មកកម្លាំងចុះប្រតិបត្តិការក្នុងការរុះរើដោយមានការប្រមាថនូវពាក្យសំដីធ្ងន់ៗនឹងគ្នាតែក្នុងនោះដែរមន្ត្រីនៃគណៈកម្មការចម្រុះក្រុងក៏មិនមានប្រើនូវពាក្យសំដីគំរុះគំរើយ និង ធ្វើការប្រមាថដល់ប្រជាពលរដ្ឋជាម្ចាស់ដី ដែលនឹងធ្វើឲ្យមានកើតនូវអំពើហិង្សានៅពេលនោះផងដែរ ។
នាឱកាសនោះលោក នួន ពុទ្ធារ៉ា អភិបាលក្រុងក៏បានឲ្យដឹងផងដែរថា បញ្ហាការប្តឹងផ្តល់ចំពោះសំណង់តូបសាងសង់លើដីចំណីផ្លូវនេះ គឺកើតឡើងចាប់ពីឆ្នាំ២០១៣មកម្លេះ ហើយពីអាណត្តិ អភិបាលខេត្តមួយទៅអភិបាលខេត្តមួយ ក៏ដូចពីអាណត្តិអភិបាលក្រុងមួយ ទៅអភិបាលក្រុងមួយ នៅមិនទាន់បានធ្វើការដោះស្រាយចេញឡើយ ។ ម្យ៉ាងទៀតមុនការរុះរើក៏បានធ្វើសេចក្តីជូនដំណឹង ដល់ម្ចាស់ដីសំណង់តូបទាំងពីរឲ្យធ្វើការរុះរើព្រមទាំងបានធ្វើការណែនាំផងដែរ ។
យោងតាមចំណាររបស់សម្តេចប្រធានរដ្ឋសភា និងសេចក្តីជូន ដំណឹងរបស់ក្រសួងមហាផ្ទៃ ចំពោះចំណាត់ការរុះរើតូបអាណាធិបតេយ្យលើចំណីផ្លូវរដ្ឋ និង សេចក្តីជូនដំណឹងរបស់ អាជ្ញាធរខេត្ត ដែលពាក់ព័ន្ធនឹងករណីនេះ អាជ្ញាធរក្រុង ដើម្បីបញ្ចប់ទំនាស់ ក៏ដូចជាការទប់ស្កាត់រាលការរំលោភយកដីចំណីផ្លូវសាធារណៈមកបម្រើផលប្រយោជន៍ឯកជន ។
ហើយការអនុវត្តលើជនដែលមិនស្តាប់តាមការណែនាំពីអាជ្ញាធរមានសមត្ថកិច្ចនោះ អាជ្ញាធរខេត្តឯកភាពតាមគោលការណ៍ឲ្យសាលាក្រុង ចាត់នូវវិធានការរុះរើតូបរបស់លោក វ៉េង ហ៊ាង ដែលបានសាងសង់រំលោភលើដីចំណីផ្លូវ និងប៉ះពាល់ដល់ក្បាលដីអ្នកដទៃ ទៅតាមវិធានការច្បាប់ លោក នួន ពុទ្ធារ៉ា បានបន្តទៀតថា ការរុះរើតូបនៅលើចំណីផ្លូវនេះមិនបានបម្រើដល់ផលប្រយោជន៍បុគ្គលណាម្នាក់ឡើងគឺបម្រើជាសម្បត្តិសាធារណៈហើយក៏មិនបានតែរុះរើតូបចំនួនពីរនេះទេគឺបន្តធ្វើការរុះរើជាជំហានៗ ទៅតាមសេចក្តីជូនដំណឹងរបស់សាលាក្រុង ហើយក៏យើងមិនអាចអភិវឌ្ឍន៍បានក្នុងពេលតែមួយនោះឡើយ ។
លោកបានបន្តទៀតថា ថ្ងៃនេះអាជ្ញាធរក្រុងត្រូវធ្វើការអនុវត្តឲ្យខាងតែបានដើម្បីបន្តអនុវត្ត ចំពោះតូប និងលំនៅដ្ឋានណាដែលបានសង់បំពានរំលោភមកលើដីសាធារណៈ ក្នុងការរៀបចំសណ្តាប់ធ្នាប់ និង សោភណ្ឌភាពក្នុងក្រុងប្រវត្តិសាស្ត្រ ទេសចរណ៍មួយនេះឲ្យកាន់តែមានភាពស្រស់ត្រកាល ក្នុងការទទួលស្វាគមន៍ភ្ញៀវទេសចរណ៍ជាតិ អន្តរជាតិ ចូលមកទស្សនាកម្សាន្ត ។
ក្នុងនោះលោកអភិបាលក្រុង ក៏បានធ្វើការអំពាវនាវដល់ប្រជាពលរដ្ឋក្នុងក្រុងសៀមរាបគ្រប់ស្រទាប់វណ្ណៈមុននឹងធ្វើការសាងសង់សំណង់អ្វីមួយគឺត្រូវធ្វើការសុំច្បាប់អនុញ្ញាតពីអាជ្ញាធរជំនាញគ្រប់លំដាប់ថ្នាក់ ដើម្បីជៀសវាងនូវរាល់ការខាតបង់ទ្រព្យសម្បត្តិរបស់ខ្លួន ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]