ខេត្តប៉ៃលិន ៖ ស្ត្រីវ័យកណ្តាលជាមេតុងទីនម្នាក់រហូតមកដល់ព្រឹកថ្ងៃទី៨ ខែធ្នូ ឆ្នាំ២០១៨ នេះ កំពុងអង្គុយលក់បន្លែទាំងកើតទុក្ខក្រៀមក្រំយ៉ាងខ្លាំងដោយភ័យបារម្ភខ្លាចក្រែងកូនចៅប្តឹង បន្ទាប់ពីម្សិលម៉ិញមានចោរស្រីម្នាក់ចូលទៅលួចលុយអស់ជាង១ម៉ឺនដុល្លារ ខណៈនាងដើរប្រមូលលុយពីកូនតុងទីនរួចរាល់ ។
លុះយកទៅដាក់ទុកនៅក្នុងតូបលក់បន្លែដោយខ្លួនជាប់រវល់ធ្វើបញ្ជីភ្លេចខ្លួននៅមុខតូប ស្រាប់តែត្រូវបានចោរស្រីវ័យចំណាស់ម្នាក់ចូលលួចយកកាបូបអស់លុយជាង១ម៉ឺនដុល្លារ បង្កការភ្ញាក់ផ្អើលតែម្តង ។ ហេតុការណ៍នេះបានកើតឡើងកាលពីវេលាម៉ោង០៧និង១៥នាទីព្រឹកថ្ងៃទី០៧ ខែធ្នូ ឆ្នាំ២០១៨ ស្ថិតនៅក្នុងផ្សារសាមគ្គី ហៅប៉ា ហ៊ី ក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ស្ត្រីរងគ្រោះមានឈ្មោះ ភី ស៊ីនួន ភេទស្រី អាយុ៣៥ឆ្នាំ ជាមេតុងទីន និងលក់បន្លែក្នុងផ្សារ រស់នៅក្នុងភូមិកើតហេតុខាងលើ ដោយមានជនសង្ស័យពាក់អាវពណ៌ផ្កាម្នាក់ ភេទស្រី អាយុប្រហែលជាង៤០ឆ្នាំ បានបន្សល់ទុកភស្តុតាងឆត្រ១ដើម ដែលឆត្រនោះបានទិញពីផ្ទះយីហោ ចែ ហេង ហើយក្នុងករណីនេះជនរងគ្រោះមិនបានដាក់ពាក្យបណ្តឹងនោះទេ ។
ប្រភពបន្តទៀតថា មុនពេលកើតហេតុស្ត្រីរងគ្រោះបានដើរប្រមូលលុយពីកូនតុងទីនជុំវិញផ្សារ លុះប្រមូលរួចក៏យកលុយទាំងនោះទៅរក្សាទុកក្នុងតូបលក់បន្លែរបស់ខ្លួន តែគាប់ជួនពេលនោះ នាងកំពុងតែលក់ដូរសុខៗ ស្រាប់តែមានស្ត្រីវ័យជាង៤០ឆ្នាំមិនស្គាល់មុខម្នាក់បានចូលទៅក្នុងតូបដើម្បីសួររកទិញឆត្រមួយដើម ហើយនាងក៏ចង្អុលបង្ហាញឱ្យទិញនៅតូបផ្សេង ។
មួយសន្ទុះក្រោយមកស្ត្រីរូបនោះក៏យកឆត្រមកតថ្លៃទិញបន្លែរបស់នាងដោយចូលទៅក្នុងតូប ហើយស្របពេលនោះនាងកំពុងធ្វើបញ្ជីតុងទីននៅមុខតូបក៏ត្រូវបានចោរស្រីនោះលួចកាបូបទៅបាត់ពេលនាងចូលទៅមើលក៏ស្រឡាំងកាំងស្រែកឆោរឡោផ្អើលអស់អ្នកផ្សារតែម្តង ។
ចំណែកស្ត្រីជាជនសង្ស័យបន្ទាប់ពីទាញយកបានកាបូបលុយរួចហើយក៏គេចខ្លួនបាត់ស្រមោល ដោយស្ត្រីរងគ្រោះបានបាត់លុយដុល្លារអស់ចំនួន១២០០$ និងប្រាក់ខ្មែរចំនួន៤១០០០០០០រៀល (សែសិបមួយលានរៀល) ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
