រាជធានីភ្នំពេញ ៖ ក្មេងប្រុសអាយុ៣ឆ្នាំម្នាក់បានវង្វេងផ្ទះ ត្រូវបានប្រជាពលរដ្ឋនាំយកទៅប្រគល់អោយសមត្ថកិច្ចប៉ុស្តិ៍នគរបាលរដ្ឋបាលទឹកថ្លា ខណ្ឌសែនសុខ កាលពីវេលាម៉ោង៨យប់ថ្ងៃទី៣ ខែធ្នូ ឆ្នាំ២០១៨។
បើតាមប្រភពពីសមត្ថកិច្ចបានអោយដឹងថា នៅមុនពេលកើតហេតុមានប្រជាពលរដ្ឋបានប្រទះឃើញក្មេងប្រុសម្នាក់នៅម្តុំវត្តទឹកថ្លាបានវង្វេងរកផ្ទះមិនឃើញ លុះពេលសួរនាំ ក្មេងប្រុសខាងលើគឺមិនបានចាំផ្លូវទៅផ្ទះ និងឈ្មោះឪពុកម្តាយរបស់ខ្លួននោះទេ គឺគ្រាន់តែចាំថា ខ្លួនឈ្មោះហេង មានអាយុ៣ឆ្នាំតែប៉ុណ្ណោះ ទើបប្រជាពលរដ្ឋនាំក្មេងប្រុសម្នាក់នោះទៅប្រគល់ឲ្យកម្លាំងសមត្ថកិច្ចនៅប៉ុស្តិ៍នគរបាលរដ្ឋបាលទឹកដើម្បីឲ្យជួយមើលថែនិងស្វែងរកអាណាព្យាបាលរបស់ក្មេង។
បន្ទាប់មកកម្លាំងសមត្ថកិច្ចសូមឲ្យអ្នកសារព័ត៌មានជួយផ្សព្វផ្សាយព័ត៌មាននេះដើម្បីឲ្យឪពុកម្តាយជ្រាបជាដំណឹង និងមកទទួលយកកូនត្រឡប់ទៅផ្ទះវិញ។
ក្រោយមកក៏មានបុរសម្នាក់បានមកដល់ប៉ុស្តិ៍រដ្ឋបាលទឹកថ្លាអះអាងថាខ្លួនជាឪពុកក្មេងប្រុសខាងលើ ដែលបានបាត់ពីផ្ទះកាលពីវេលាម៉ោងប្រមាណ៥ល្ងាចថ្ងៃកើតហេតុ ពេលដែលគាត់ត្រឡប់មកពីធ្វើការហើយបានដេកលក់នៅក្នុងផ្ទះមួយភាំង លុះភ្ញាក់ឡើងស្រាប់តែបាត់កូនតែម្តង។
បើតាមសម្តីបុរសខាងលើឈ្មោះ សាក មិថុនា អាយុ៣៦ឆ្នាំ ជាបុគ្គលិកសណ្ឋាគារតារាអ៊ែរផត ស្នាក់នៅផ្ទះជួលក្បែរវត្តទឹកថ្លា ក្នុងសង្កាត់ទឹកថ្លា ខណ្ឌសែនសុខ ត្រូវជាឪពុកក្មេងប្រុសខាងលើបានរៀបរាប់ប្រាប់ឲ្យដឹងថា រាល់ថ្ងៃរូបគាត់គឺរស់នៅតែម្នាក់ឯង ព្រោះគាត់និងប្រពន្ធដែលជាម្តាយក្មេងប្រុសខាងលើមានរឿងរកាំរកូស ហើយបានលែងលះចែកផ្លូវគ្នាអស់រយៈពេលជាង២ឆ្នាំមកហើយ។
ប្រភពដដែលបានបន្តថា ដោយបានប្រគល់កូនប្រុសឲ្យទៅរស់នៅខាងប្រពន្ធ នៅឯម្តុំភូមិឬស្សី ក្នុងសង្កាត់ស្ទឹងមានជ័យ តាំងពីពេលនោះរហូតមក។
លុះកាលពីម្សិលមិញមុនថ្ងៃកើតហេតុ ដោយគាត់នឹកក្មេងប្រុសខាងលើដែលត្រូវជាកូនខ្លាំងពេក ក៏បានទៅយកមកលេងនៅឯផ្ទះរបស់គាត់ម្តង រហូតដល់ល្ងាចថ្ងៃកើតហេតុ ពេលដែលគាត់ត្រឡប់មកពីធ្វើការវិញក៏ទុកអោយកូនលេងតែម្នាក់ឯង រួចគាត់ក៏ភ្លេចខ្លួនដេកលក់អស់មួយផាំង លុះពេលភ្ញាក់ឡើងក៏បាត់កូនប្រុសរបស់គាត់តែម្តងទៅ។
ក្រោយពេលកើតហេតុ សមត្ថកិច្ចប៉ុស្តិ៍នគរបាលរដ្ឋបាលទឹកថ្លាក៏បានធ្វើកិច្ចសន្យាប្រគល់ក្មេងប្រុសខាងលើទៅអោយបុរសជាឪពុកយកត្រឡប់ទៅផ្ទះវិញ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
