រាជធានីភ្នំពេញ ៖ បុរសជនជាតិចិនម្នាក់ដែលប្រើប្រាស់សារធាតុញៀនហួសកម្រិត ក៏បានបង្កការអុកឡុក និងធ្វើឱ្យមានការភ្ញាក់ផ្អើលយ៉ាងខ្លាំង ដោយកាន់កាំបិតប៉័ងតោចូលទៅកាប់បំផ្លាញទ្រព្យសម្បត្តិក្នុងផ្ទះលក់កាហ្វេមួយកន្លែងអស់ជាច្រើន រួមទាំងកាប់មន្ត្រីនគរបាលខណ្ឌចំការមនម្នាក់ ត្រូវដៃហូរឈាមស្រោច និងចាប់គំរាមស្ត្រីចំណាស់ជាអ្នកលក់អំពៅសាងម្នាក់អារ.ក និងកាប់មួយកាំបិតចំក្បាល បណ្តាលឱ្យរងរបួសយ៉ាងធ្ងន់ផងដែរ ។
ទង្វើរបស់បុរសជនជាតិចិនម្នាក់ខាងលើនេះ ធ្វើឱ្យប្រជាពលរដ្ឋជាច្រើនមានការភ័យខ្លាច និងតក់ស្លុតគ្រប់គ្នាៗ ដោយសារតែរូបគេបានប្រើកាំបិតបុ័ងតោកាប់ក្បាលខ្លួនឯងជាច្រើនកាំបិតហូរឈាមស្រោចខ្លួន និងកាប់គេឯងជាបន្តបន្ទាប់ទៀត ទម្រាំតែកម្លាំងមានសមត្ថកិច្ចនាំគ្នាធ្វើការបង្ក្រាបបាន ។
ហេតុការណ៍នេះ បានកើតឡើងកាលពីវេលាម៉ោង២រសៀលលថ្ងៃទី១ ធ្នូ នៅតាមផ្លូវលេខ៤៣២ ក្នុងសង្កាត់បឹងត្របែក ខណ្ឌចំការមន ។ ប្រភពព័ត៌មានពីនគរបាលឱ្យដឹងថា បុរសជនជាតិចិនខាងលើនេះឈ្មោះ Jin Chun អាយុ៣៧ឆ្នាំ កាន់លិខិតឆ្លងដែនលេខEB ៤៣៦០១៩០ ចូលមកកម្ពុជាជាភ្ញៀវទេសចរតែកន្លែងស្នាក់នៅមិនទាន់ដឹងច្បាស់នៅឡើយទេ ។
ចំណែកឯជនរងគ្រោះទាំង២នាក់ ដោយសារត្រូវជនជាតិចិនខាងលើ កាប់នឹងកាំបិតបុ័ងតោនេះ ម្នាក់គឺលោកអនុសេនីយ៍ទោ ម៉ៅ សំណាង ជាមន្ត្រីនគរបាលបម្រើការងារនៅអង្គភាពអន្តរាគមន៍ខណ្ឌចំការមន និងម្នាក់ទៀតឈ្មោះ មាន សូនី ភេទស្រី អាយុ៧០ឆ្នាំ មុខរបរលក់អំពៅសាង ស្នាក់នៅផ្ទះជួលម្តុំប្រឡាយទឹកបឹងត្របែក ក្នុងសង្កាត់ផ្សារដើមថ្កូវ ខណ្ឌចំការមន និងមានស្រុកកំណើតនៅភូមិសាលារៀន ឃុំបាសាក់ ស្រុកស្វាយជ្រំ ខេត្តស្វាយរៀង។
តាមប្រភពដដែលឲ្យដឹងទៀតថា មុនពេលកើតហេតុមិនមានអ្នកណាម្នាក់បានដឹងថា បុរសជនជាតិចិនខាងលើ ដើរមកពីទីណាឡើយ ស្រាប់តែចូលទៅក្នុងផ្ទះលក់កាហ្វេ និងវេរលុយវីងមួយកន្លែងដែលមានអាសយដ្ឋានលេខ៥A ផ្លូវលេខ៤៣២ និងរើសយកកាំបិតប៉័ងតោមួយនៅក្បែរនោះទៅកាន់ជាប់នឹងដៃ។
ដោយឃើញសភាពមិនស្រួល ម្ចាស់ផ្ទះប្រុសស្រីដែលមានវ័យក្មេងៗនាំគ្នារត់ចេញមកខាងក្រៅអស់ ដោយជាប់បុរសវ័យចំណាស់ម្នាក់នៅក្នុងផ្ទះ និងបង្កឱ្យមានការភ្ញាក់ផ្អើលទៅដល់កម្លាំងមានសមត្ថកិច្ច និងប្រជាពលរដ្ឋយ៉ាងច្រើនមកចោមរោមមើល ។
ក្នុងពេលនោះ កម្លាំងសមត្ថកិច្ចមូលដ្ឋានទាំងឯកសណ្ឋាននិងស៊ីវិលជាច្រើននាក់ បានមកដល់ផ្ទះលក់កាហ្វេនិងវេរលុយវីងខាងលើ ដើម្បីធ្វើអន្តរាគមន៍ តែមិនមានអ្នកណាម្នាក់ហ៊ានចូលទៅជិតឡើយ ដោយសារតែបុរសជនជាតិចិនម្នាក់នោះឡើងឈរលើតុឆុងកាហ្វេ ស្រែកឡូឡា និងក្នុងដៃកាន់កាំបិតប៉័ងតោគ្រវីចុះឡើងៗ ។ ក្នុងពេលនោះ បុរសចិនរូបនេះ បានយកកាំបិតប៉័ងតោកាប់ក្បាលខ្លួនឯងជាច្រើនកាំបិតបណ្តាលឲ្យហូរឈាមស្រោចខ្លួន ព្រមទាំងកាប់បំផ្លាញអំពូលភ្លើង និងឧបករណ៍ឆុងកាហ្វេ រួមទាំងរបស់របរប្រើប្រាស់ក្នុងផ្ទះផ្សេងៗទៀតយ៉ាងច្រើន ។
ដោយឃើញទង្វើកំរោលចូលរបស់បុរសចិនដែលកាប់ក្បាលខ្លួនឯង និងកាប់បំផ្លាញទ្រព្យសម្បត្តិនៅក្នុងផ្ទះលក់កាហ្វេ និងវេរលុយខាងលើខ្ទេចខ្ទីគ្មានសល់បែបនេះ លោកអនុសេនីយ៍ទោ ម៉ៅ សំណាង ព្យាយាមចូលទៅចាប់ក៏ត្រូវបុរសជនជាតិចិនបែកថ្នាំរូបនោះកាប់មួយកាំបិតចំខ្នងដៃខាងស្តាំ បណ្តាលឱ្យដាច់រយះហូរឈាមគេអារកមាន់ និងត្រូវបានមិត្តរួមការងារបញ្ជូនទៅកាន់មន្ទីរពេទ្យភ្លាមៗ ។
ក្រោយពីកាប់មន្ត្រីនគរបាលមួយរូបរងរបួសហើយ បុរសជនជាតិចិននេះក៏ដើរចេញពីក្នុងផ្ទះលក់កាហ្វេនិងវេរលុយវីងខាងលើ ដោយកាន់កាំបិតគ្រវីផងនៅលើផ្លូវលេខ៤៣២ និងធ្វើសកម្មភាពអុកឡុកជាបន្តទៀត ។ ពេលកំពុងតែមានការភ្ញាក់ផ្អើលកើតឡើងយ៉ាងខ្លាំង និងគ្មានអ្នកណាម្នាក់ចូលទៅជិតបាននោះ ស្ត្រីចំណាស់អ្នកលក់អំពៅសាងម្នាក់ឈ្មោះ មាន សូនី រុញរទេះចូលទៅ ក៏ត្រូវបុរសចិនរូបនោះចាប់ក្រៀកជាប់ រួចយកកាំបិតប៉័ងតោអារកនិងកាប់ ក្បាលជាច្រើនកាំបិត តែជាគ្រោះល្អមិនមុតនិងត្រូវក្បាលតែមួយកាំបិត ហើយក៏រើបម្រះរត់គេចរួចខ្លួនវិញ ម្ល៉េះសមរូបគាត់នឹងធ្ងន់ធ្ងរជាងនេះមិនខាន ។
បន្ទាប់ពីកាប់មន្ត្រីនគរបាលម្នាក់ និងស្ត្រីចំណាស់អ្នកលក់អំពៅសាងរងរបួសជាបន្តបន្ទាប់ហើយនោះ បុរសចិនក៏នៅតែបន្តកាន់កាំបិតដើរគំរាមគេឯងពេញផ្លូវទៀត ឯកងកម្លាំងនគរបាលខណ្ឌចំការមនជាច្រើននាក់ ដែលក្នុងដៃប្រដាប់ដោយដំបងនោះ បានត្រឹមតែនាំគ្នាដើរតាមអមប៉ុណ្ណោះ និងមិនបានធ្វើការបង្ក្រាបភ្លាមៗនោះទេគឺរង់ចាំឱកាសផ្តល់ឲ្យ ។ លុះប្រមាណ១ម៉ោងក្រោយមក បុរសជនជាតិចិននោះក៏បន្តដើរទៅអុកឡុកនៅខាងមុខក្រុមហ៊ុនលក់រថយន្ត Mazda ទៀត ដោយដៃគ្រវីកាំបិតប៉័ងតោជាប់ ។
ពេលនោះ មន្ត្រីសមត្ថកិច្ចម្នាក់ក្នុងឯកសណ្ឋានស៊ីវិលដែលពួនក្បែររថយន្ត បានប្រើដំបងវាយទម្លាក់កាំបិតជ្រុះពីដៃ និងនាំគ្នាស្ទុះរត់ទៅជាន់និងចាប់វាយខ្នោះដៃទាំងពីរជាប់ ការពារមិនឱ្យប្រជាពលរដ្ឋវាយដំបន្ថែម និងបញ្ជូនយកទៅមន្ទីរពេទ្យមិត្តភាពខ្មែរ-សូវៀតភ្លាមៗ ។
ក្នុងហេតុការណ៍បុរសជនជាតិចិនបែកថ្នាំហើយយកកាំបិតប៉័ងតោកាប់ក្បាលខ្លួនឯង និង កាប់មន្ត្រីនគរបាលខណ្ឌចំការមនម្នាក់ និងស្ត្រីចំណាស់អ្នកលក់អំពៅសាងម្នាក់ បណ្តាលឱ្យរងរបួស និងកាប់បំផ្លាញទ្រព្យសម្បត្តិរបស់ផ្ទះលក់កាហ្វេនិងវេរលុយវីងខាងលើអស់ជាច្រើនជាបន្តបន្ទាប់យ៉ាងសហាវខាងលើនេះ ធ្វើឲ្យមានការភ្ញាក់ផ្អើលដល់ប្រជាពលរដ្ឋភ័យតក់ស្លុត និងញាប់ញ័រគ្រប់ៗគ្នា ដោយសារតែពួកគាត់បានឃើញនូវរូបភាពដ៏សាហាវព្រៃផ្សៃរបស់បុរសជនជាតិចិនម្នាក់ខាងលើដែលបែកថ្នាំបង្កការអុកឡុកកាប់គេឯង ហើយកម្លាំងសមត្ថកិច្ចហាក់ពុំមានសម្ថភាពក្នុងការបង្ក្រាបបានទាន់វេលាបែបនេះ ។
លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ ដែលទើបនឹងកាន់តំណែងជាស្នងការនគរបាលរាជធានីភ្នំពេញ ត្រូវបានគេសង្កេតឃើញលេចធ្លោតាមរយៈបណ្តាញសង្គមហ្វេសប៊ុក នូវសកម្មភាពនិងទង្វើមនុស្សធម៌របស់លោក ។ ជាក់ស្តែងកាលពីថ្ងៃទី២ ខែធ្នូ លោកស្នងការ បានអញ្ជេីញទៅសួរសុខទុក្ខលោកអនុសេនីយ៍ទោ ម៉ៅ សំណាង មន្ត្រីនគរបាលខណ្ឌចំការមនផ្នែកអន្តរាគមន៍ ដែលបានរងរបួសធ្ងន់នៅពេលបង្ក្រាបជនជាតិចិនម្នាក់ដែលប្រើប្រាស់គ្រឿងញៀនលើសកម្រិត ហើយបង្កការអុកឡុកតាមដងផ្លូវ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
