(ភ្នំពេញ)៖ បើនិយាយពីឈ្មោះរបស់ លោក ទេព រិនដារ៉ូ នរណាក៏ស្គាល់ដែរ ព្រោះលោកគឺជាតារាសម្ដែងជើងចាស់មួយរូប ដែលមានកេរ្តិ៍ឈ្មោះបោះសំឡេង ជាយូរណាស់មកហើយ។ អ្វីដែលពិសេសនោះ លោកនៅតែបន្តប្រជាប្រិយភាព បានរហូតមកដល់សព្វថ្ងៃនេះ និងឈរនៅលំដាប់ថ្នាក់លេខ១ជានិច្ច ក្នុងចំណោមតារាដែលមានវ័យស្របាលនឹងលោក។ ម្យ៉ាងវិញទៀត លោកក៏ជាតារាសម្ដែងមួយដួង ដែលគេតែងតែសម្គាល់ឃើញថា ជាហាក់មិនសូវបង្ហាញ ពីសកម្មភាព ច្រើនឡើយក្នុងសង្គម ជាហេតុធ្វើឲ្យ តារាសម្ដែងល្បីឈ្មោះរូបនេះ គ្មានរឿងអាស្រូវ ទាល់តែសោះ បើប្រៀបផ្ទឹម ទៅនឹង តារាសម្ដែងស្របាលនឹងលោក ផងដែរ ។
ដោយឡែកថ្មីៗនេះ ខណៈរដូវរងារនៅក្នុង ប្រទេសកម្ពុជា ហាក់ឈានចូលមកដល់ ស្រាប់តែ លោកបានបង្ហោះរូប ជាច្រើនសន្លឹកដែលបង្ហាញពី សកម្មភាព កាលដែលលោកនៅបន្តការសិក្សា នៅក្រៅប្រទេស ពោលគឺ សហភាពសូវៀត រំអនុស្សាវរីយ៍ ពេលរដូវធ្លាក់ទឹកកក ជាមួយមិត្តភក្តិ រួមជំនាន់ ។
ជាមួយនឹង ការបង្ហាញរូបភាព កំឡុងពេលសិក្សា នៅបរទេស លោក ទេព រិនដារ៉ូ បានពោលថា «ធ្លាក់ខ្យល់បែបនេះ នឹកឃើញកាលពីនៅក្មេង រៀននៅសហភាពសូវៀត ពេលរដូវធ្លាក់ទឹកកក គេនាំទៅលេងលើភ្នំមួយ ដែលមានរូបចម្លាក់ធំបំផុត នា ទីក្រុងវ៉ូហ្គូហ្គ្រាដ តាមបណ្តោយទីក្រុងវ៉ូលហ្គា ពិតជាត្រជាក់ខ្លាំងណាស់ ជាមួយមិត្តភ័ក្រ្ត នាំគ្នារត់ឡើង ទៅលើដើម្បីបានឆាប់ទៅដល់មុនគេ ហាស់ហា ព្រោះប្រញាប់ថតរូប..ហើយប្រញាប់ចុះក្រោមវិញ ព្រោះត្រជាក់ពេក ...! អរគុណដល់ប្រិមមិត្ត ទាំងអស់ ដែលចំណាយពេល មើលរូបចាស់ៗរបស់ខ្ញុំ នឹងអានការអធិប្បាយនេះ! សូមប្រិយមិត្ត ទាំងអស់ជួបតែសេចក្តីសុខ» ។
គួរបញ្ជាក់ថា លោក ទេព រិនដារ៉ូ ជាតារាសម្ដែងដ៏ល្បីល្បាញមិនចេះរីងស្ងួត មួយដួងក្នុងប្រទេសកម្ពុជា ព្រមទាំងទទួលបានការគាំទ្រយ៉ាងខ្លាំងពីសំណាក់មហាជន មិនថាអ្នកក្នុងសិល្បៈ និងក្រៅសិល្បៈ ៕
ប្រភព៖ freshnews
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]