មិនធម្មតាទេ! គ្រាប់ពេជ្រ Ronaldo ទាត់បញ្ចូលទី៤គ្រាប់ក្នុងមួយប្រកួត ឲ្យក្រុម Juventus អាយុក្រោម៩ឆ្នាំ

អ៊ីតាលី៖ កូនប្រុសច្បងរបស់ខ្សែប្រយុទ្ធឆ្នើម Cristiano Ronaldo កុមារា Cristiano Ronaldo Jr បានស៊ុតបញ្ចូលទីដល់ទៅ ៤គ្រាប់ក្នុងចំណោមគ្រាប់បាល់ជ័យជម្នះ ៦-០ របស់ក្រុមយុវជនថ្នាលអាយុក្រោម ៩ឆ្នាំរបស់ក្លិបសេះបង្គង់ Juventus ទៅលើក្រុមយុវជនថ្នាលអាយុក្រោម ៩ឆ្នាំរបស់ក្លិប Sparta Novara។

មិនសូវខុសគ្នាពីអតីតខ្សែប្រយុទ្ធឆ្នើមក្រុមអធិរាជស Real Madrid ដែលជាឪពុករបស់កុមារា Ronaldo Jr. ឡើយ ពោលគឺថ្នាល់យុវជនអាយុក្រោម ៩ឆ្នាំរបស់ក្រុម Juventus នេះតែងរកគ្រាប់បាល់ឲ្យក្រុមរបស់គេសឹងតែគ្រប់ការប្រកួតសម្រាប់រដូវកាលថ្មីនេះ ចាប់តាំងតែពីចាកចេញពីក្លិបយក្សអេស្ប៉ាញ មករួមរស់ជាមួយឪពុកនៅក្នុងទឹកដីអុីតាលីនេះមក។

យ៉ាងណាមិញ ការស៊ុតបញ្ចូលទី៤គ្រាប់ក្នុងមួយប្រកួតទៅលើក្រុមថ្នាល់យុវជនអាយុក្រោម ៩ឆ្នាំរបស់ក្លិប Sparta Novara នេះដែរ បានធ្វើឲ្យក្រុមរបស់គេយកឈ្នះក្រុមភ្ញៀវដោយលទ្ធផល ៦-០ឯណោះ ខណៈដែលខ្សែប្រយុទ្ធឆ្នើម Cristiano Ronaldo វិញថ្វីបើការប្រកួតជាមួយក្រុម Valencia យប់មិញនេះមិនស៊ុតបញ្ចូលទីមែន តែបានរួមចំណែកយ៉ាងធំនៅក្នុងការជួយក្រុម Juventus ឲ្យបានកៅអីទៅលេងនៅវគ្គ ១៦ក្រុមចុងក្រោយជាបន្ត៕