បុរសធ្ងន់ជាងគេលើលោក ទើបតែសម្រករាងបានពាក់កណ្តាលមកវិញ (មានវីដេអូ)

ម៉ិកស៊ិក៖ លោក Pedro Franco ធ្លាប់មានឈ្មោះជាបុរសទម្ងន់យក្សធ្ងន់ជាងគេបំផុតលើពិភពលោក។ យោងតាមសារព័ត៌មាន Daily Mail ដែលបានចេញផ្សាយនៅក្នុងថ្ងៃទី ២៧ ខែវិច្ឆិកា ឆ្នាំ២០១៨ នេះបានឲ្យដឹងថា កាលពីមុនលោក Pedro មានទម្ងន់សរុប ៥៨៤ គីឡូក្រាម។

កាលពីមុនគាត់មិនអាចដើរទៅណាបានទេ។ អស់រយៈពេល១០ឆ្នាំមកហើយដែល លោក Pedro ត្រូវដេកនៅលើគ្រែមួយកន្លែងក្នុងផ្ទះរបស់គាត់ដែលស្ថិតនៅក្នុងទីក្រុង Aguascalientes ។

ទើបតែពេលថ្មីៗនេះប៉ុណ្ណោះ លោក Pedro អាចងើបពីគ្រែបាន ក្រោយពីការវះកាត់បូមយកខ្លាញ់ចេញដោយជោគជ័យ។  លោកបានស្រកអស់ពាក់កណ្តាលនៃទម្ងន់សរុបកាលពីមុន។ ឥឡូវនេះគាត់មានទម្ងន់សរុប ២៩៨គីឡូ (ស្រកអស់២៨៦គីឡូ)។

យោងតាមប្រសាសន៍របស់លោក Pedro ផ្ទាល់បានឲ្យដឹងថា “កាលខ្ញុំមានអាយុ៦ឆ្នាំ ខ្ញុំមានទម្ងន់៦០គីឡូបាត់ទៅហើយ"។ គាត់បន្តថា “ មិនមែនខ្ញុំមិនចេះមើលថែខ្លួនឯងទេ ប៉ុន្តែវាជាជំងឺដែលមានតាំងពីកំណើតរបស់ខ្ញុំមកម៉្លេះ"។

គួរបញ្ជាក់ថា លោក Pedro ត្រូវធ្លាប់បានគេកត់ចូលក្នុងសៀវភៅកំណត់ត្រាពិភពលោក (Guinness World Records) ជាប់ជាបុរសដែលមានទម្ងន់ធ្ងន់ជាងគេបំផុតលើពិភពលោក៕