អុីតាលី៖ គ្រូបង្វឹកលោក Massimiliano Allegri និងកីឡាករជាច្រើនទៀតរបស់ក្លិបសេះបង្កង់ Juventus សុទ្ធតែហួសចិត្ត និងបើកភ្នែកធំៗនៅពេលដែលពួកគេបានឃើញខ្សែប្រយុទ្ធ Cristiano Ronaldo ប្រើបច្ចេកទេសនៅក្នុងការស៊ុតបាល់បញ្ចូលទីពេលកំពុងហ្វឹកហាត់នៅក្នុងទីលាន Allianz Stadium ដើម្បីត្រៀមសម្រាប់ជំនួបនៃពានរង្វាន់ Champions League វគ្គសន្សំពិន្ទុប្រចាំពូល H ទល់នឹងក្រុម Valencia នារាត្រីនេះ។
នៅក្នុងអំឡុងពេលហ្វឹកហាត់ គេសង្កេតឃើញអតីតខ្សែប្រយុទ្ធឆ្នើមរបស់ក្រុម Real Madrid រូបនេះ បានបង្ហាញនូវសមត្ថភាពដ៏អស្ចារ្យរបស់គេ តាមរយៈការប្រើប្រាស់បច្ចេកទេសស៊ុតបាល់វិលបញ្ចូលទី ដើម្បីបានការចាប់អារម្មណ៍ពីមិត្តរួមក្រុម។
នៅក្នុងពេលបង្ហាញសមត្ថភាពរបស់ខ្សែប្រយុទ្ធវ័យ ៣៣ឆ្នាំរូបនេះ ហាក់ធ្វើឲ្យមិត្តរួមក្រុមមួយចំនួនមានដូចជា៖ ខ្សែប្រយុទ្ធ Paulo Dybala និងខ្សែបម្រើ Miralem Pjanić ពេញចិត្តពេញថ្លើមនឹងការបង្ហាញភាពអស្ចារ្យនេះយ៉ាងខ្លាំង រហូតដល់ពួកគេបើកភ្នែកធំៗសម្លឹងមើលគ្រាប់បាល់នោះមិនដាក់ភ្នែក។
លោក Massimiliano Allegri គ្រូបង្វឹកក្រុមម្ចាស់ជើងឯកលីកកំពូលរបស់ប្រទេសអុីតាលីដល់ទៅ ៣៣សម័យកាលរូបនេះ បានសរសើរ Ronaldo នៅក្នុងសន្និសីទសារព័ត៌មានមុនការប្រកួតជាមួយក្រុម Valencia ថា៖ «គ្រប់គ្នាសុទ្ធតែបានស្គាល់ហើយអំពីសមត្ថភាពរបស់ Cristiano ដូច្នេះខ្ញុំជឿជាក់ថា ការប្រកួតនេះគេនឹងអាចរកគ្រាប់បាល់បានដើម្បីជួយក្រុមរបស់យើងជាបន្ត»។
គួរឲ្យដឹងថា ក្រុមសេះបង្កង់ Juventus នឹងត្រូវបើកទ្វារកីឡដ្ឋាន Allianz Stadium របស់ខ្លួនដើម្បីទទួលស្វាគមន៍ក្រុមភ្ញៀវ Valencia សម្រាប់ការប្រកួតនៅក្នុងពានរង្វាន់ UEFA Champions League វគ្គសន្សំពិន្ទុប្រចាំពូល H នៅក្នុងយប់នេះហើយ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]