តារាបរទេសទាំងនេះ ត្រូវបានគេចាត់ទុកថា ជានារីមានឥទ្ធិពលខ្លាំង ខាងម៉ូតសម្លៀកបំពាក់ ប្រចាំឆ្នាំ ២០១៨!

បរទេស៖ ពីមួយឆ្នាំទៅមួយឆ្នាំវិស័យម៉ូតសម្លៀកបំពាក់ កាន់តែឆ្ពោះទៅមុខឥតឈប់ឈរ ជាមួយនឹងFashionថ្មីរបស់ខ្លួន ទៅតាមសម័យកាលដែលកាន់តែទំនើបទៅៗ។ ជាក់ស្តែងកាលពីពេលថ្មីៗនេះ វេបសាយដ៏ល្បីឈ្មោះមួយខាងផ្នែកបញ្ចេញម៉ូតសម្លៀកបំពាក់របស់សហរដ្ឋអាមេរិក បានប្រកាសជាផ្លូវការ ថាបានរកឃើញតារាស្រីល្បីៗក្នុងពិភពហូលីវូតចំនួន ១០ ដួង ដែលត្រូវបានគេគាំទ្រថាជានារីដែលមានឥទ្ធិពលខ្លាំងបំផុត នៅក្នុងពិភពម៉ូតសម្លៀកបំពាក់ប្រចាំឆ្នាំ ២០១៨ នេះ។

ដោយនៅក្នុងនោះដែរគេឃើញមានដូចជា៖

១០) តារាចម្រៀងស្រីវ័យក្មេង Ariana Grande៖ បច្ចុប្បន្ននេះនាងជាតារាចម្រៀងយុវវ័យ ដែលកំពុងតែមានសន្ទុះនៃការគាំទ្រយ៉ាងខ្លាំងក្នុងវិស័យសិល្បៈ ដោយមានអ្នកតាមដាននាងក្នុង IG ដល់ទៅជាង ១៣៥ លាននាក់ឯណោះ។ ហេតុដូច្នេះនាងក៏ត្រូវបានគេចាត់ទុកថាជានារីម្នាក់ ដែលពូកែលេងស្ទាយបែបយុវវ័យៗ ជាទីពេញចិត្តរបស់អ្នកគាំទ្រជាច្រើននាក់។  

៩) តារាចម្រៀង Rihanna៖ នាងក៏ត្រូវបានគេចាត់ទុកជាមាតា នៃម៉ូតសម្លៀកបំពាក់ដែរ ព្រោះ Fashionតុបតែងខ្លួននាងនីមួយៗ មានអ្នកចាប់អារម្មណ៍ និងពាក់តាមមិនតិចនោះទេ។ មិនតែប៉ុណ្ណោះ នាងក៏ជាតារាបង្ហាញម៉ូតឱ្យប្រ៊េនគ្រឿងសម្អាង Fenty របស់នាងផ្ទាល់ផងដែរ។ 

៨) តារាសម្តែង Blake Lively៖ នាងជាមនុស្សស្រីម្នាក់ដែលមានគំនិតកែច្នៃខាងម៉ូតសម្លៀកបំពាក់ដ៏អស្ចារ្យ ហើយគ្រប់ពេលដែលនាងចេញម៉ូតសម្លៀកបំពាក់ម្តងៗមានអ្នកតែងខ្លួនតាមនាងមិនតិចនាក់នោះទេ។ 

៧) អ្នកច្នៃម៉ូត Chiara Ferragni៖ អ្នកនិយមលេងម៉ូតជាច្រើននាក់បានពេញចិត្តនឹងការច្នៃម៉ូតរបស់នាងយ៉ាងខ្លាំង រហូតឱ្យឈ្មោះនាងថាជា កំពូលនារីច្នៃម៉ូតសម្លៀកបំពាក់នៅក្នុងពិភពOnlineកំពូលផងដែរ។ 

៦) កីឡាការិនីវាយកូនបាល់ Serena Williams៖ ត្បិតតែជាអ្នកកីឡា និងជានារីមានសម្បុររាងស្រគាំបន្តិចមែន ប៉ុន្តែនាងក៏ជាអ្នកពូកែលេងម៉ូតខោអាវម្នាក់ផងដែរ ដែលតែងតែបានទាក់ចិត្តមនុស្សស្រីជាច្រើននាក់ ឱ្យលេងម៉ូតតាមនាង ជាពិសេសគឺម៉ូតសំពត់ខ្លីដែលនាងស្លៀកពេល ចេញទៅវាយកូនបាល់ម្តងៗ។ 

៥) តារាចម្រៀង Beyonce៖ និយាយដល់តារាស្រីរូបនេះនាងជាកំពូលតារាដ៏ល្បីល្បាញក្នុងពិភពលោក ដូច្នេះសម្លៀកបំពាក់ដែលនាងស្លៀកគឺត្រូវតែជាប្រ៊េនល្បីៗ និងស្ទើរតែមានតែ១ម៉ូតនៅក្នុងលោក។ 

៤) តារាចម្រៀងរ៉េប Cardi B៖ ក្រៅពីជាតារារ៉េបដ៏ល្បីល្បាញម្នាក់ហើយ នាងក៏ជាមាតានៃម៉ូតសម្លៀកបំពាក់មិនចាញ់តារាផ្សេងដែរ ព្រោះជារឿងគេតែងតែឃើញនាងចេញតាមកម្មវិធីបង្ហាញម៉ូតលំដាប់ពិភពលោកជាញឹកញាប់ ពិសេសម៉ូតដែលនាងពាក់គឺចេញលក់ស្ទើរមិនទាន់អ្នកទិញពាក់។ 

៣) តារាបង្ហាញម៉ូត Meghan Markle៖ បច្ចុប្បន្ននេះមានងារជាព្រះនាង មហេសីរបស់ព្រះអង្គម្ចាស់ Harry នៃចក្រភពអង់គ្លេស ដូច្នេះហើយរាល់ម៉ូតសម្លៀកបំពាក់របស់នាងដែលស្លៀកចេញទៅក្រៅម្តងៗ តែងតែទទួលបាននូវការចាប់អារម្មណ៍យ៉ាងខ្លាំងសំណាក់អ្នកគាំទ្រ និងមានអ្នកដណ្តើមគ្នាទិញសន្ធឹកសន្ធាប់។ 

២) តារាស្រី Kim Kardashian៖ ត្រូវបានគេចាត់ទុកថាជាសិស្សច្បងខាងម៉ូតសម្លៀកបំពាក់ ព្រោះតែខោអាវដែលនាងបានស្លៀកពាក់ សុទ្ធតែលេងម៉ូតប្លែកៗ ឬសូម្បីតែខោអាវដែលហួសសម័យគេឈប់ស្លៀកហើយ ក៏នាងអាចកែប្រែធ្វើឱ្យល្បីល្បាញម្តងទៀតដែរក្នុងពិភពម៉ូត។

១) តារាសម្តែងស្រី Kylie Jenner៖ ឈុតដែលនាងស្លៀកពាក់នៅលើខ្លួនហើយបង្ហោះលើអ៊ីនស្តារក្រាម ធ្វើឱ្យមានគេរកទិញស្លៀកតាមនាងព្រោងព្រាតត្រឹមរយៈពេលតែប៉ុន្មានម៉ោងប៉ុណ្ណោះ ព្រោះនៅលើអ៊ីនស្តារក្រាមរបស់នាងមានអ្នកតាមដានដល់ទៅជាង ១២០ លាននាក់ ដូច្នេះហើយនាងក៏ត្រូវបានគេចាត់ទុកថាជានារីម្នាក់ដែលមានឥទ្ធិពលយ៉ាងខ្លាំង នៅក្នុងផ្នែកនៃ Fashion សម្លៀកបំពាក់របស់នារីៗ៕

• ម៉ូត
• តារាអន្តរជាតិ