ប្លែកភ្នែក! មកមើលសកម្មភាពគូរគំនូរក្រោមទឹកដ៏អស្ចារ្យ និងដឹងតម្លៃនៃស្នាដៃនេះ! (មានវីដេអូ)

សមុទ្រក្រហម៖ ប្រិយមិត្តភាគច្រើនធ្លាប់តែឃើញវិចិត្រករបង្ហាញស្នាដៃគំនូរដ៏រស់រវើកនៅលើគោកប៉ុណ្ណោះ ប៉ុន្តែពេលនេះយើងសូមនាំអារម្មណ៍លោកអ្នកមកទស្សនាសកម្មភាពគូរគំនូរក្រោមទឹកដ៏ប្លែកភ្នែកវិញម្តង ដែលធ្វើឡើងនៅសមុទ្រក្រហម ដែលជាដៃសមុទ្រនៃមហាសមុទ្រឥណ្ឌា ចន្លោះទ្វីបអាហ្វ្រិកនិងអាស៊ី កាលពីពេលថ្មីៗនេះ។ 

វិចិត្រការនីដែលមានទេពកោសល្យផ្នែកគំនូរក្រោមជលសារនេះឈ្មោះ Olga Belka ចំណែកអ្នកដែលឈរឱ្យនាងគូរ គឺជាតារាម៉ូដែលឈ្មោះ Ksenia Galata ដែលអ្នកទាំងពីរសុទ្ធតែពាក់ធុងអុកស៊ីសែនចុះទៅក្រោមទឹកដូចគ្នា។

ស្នាដៃសិល្បៈដ៏អស្ចារ្យនីមួយៗស្រីស្រស់សក់កូរ៉េ ត្រូវការពេលចន្លោះពី ២ ទៅ ៦ ម៉ោង ទើបគូររួច។ នារីដើមកំណើតរុស្ស៊ីរូបនេះ ចាប់ផ្តើមគូររូបក្រោមទឹកក៏ព្រោះតែចង់ផ្តិតយកសម្រស់ដ៏ត្រកាលនៃជីវិតក្រោមរលកសមុទ្រ ហើយបានបង្កើតស្នាដៃប្លែកៗមួយចំនួនរួចមកហើយ។  

"រាល់ពេលមុជទឹកក្រោមសមុទ្រ ខ្ញុំចង់ផ្តិតយកសម្រស់ក្រោមទឹក និងចែករំលែកចំណាប់អារម្មណ៍របស់ខ្ញុំជាមួយអ្នកដទៃ។ វិចិត្រករ/ការនីមិនមែនជាអាជីពទេ ប៉ុន្តែជាបេសកកម្មមួយ។ ខ្ញុំចង់ចែករំលែកចក្ខុវិស័យនៃអាណាចក្រក្រោមទឹករបស់ខ្ញុំជាមួយពិភពលោក។ ហេតុនេះទើបខ្ញុំគូរគំនូរក្រោមទឹក។ ចំពោះខ្ញុំ សមុទ្រគឺជាធនធានគ្មានដែនកំណត់នៃការជំរុញទឹកចិត្ត និងថាមពល។" នារីសក់ពណ៌ទង់ដែងដែលហៅខ្លួនឯងថា “ជាងគំនូរក្រោមទឹក” បានបញ្ជាក់ដូច្នេះ។ 

យ៉ាងណាមិញ ប្រសិនបើអ្នកចង់ទិញផ្ទាំងគំនូរដូចរៀបរាប់ខាងលើ វាអាចមានតម្លៃដល់ទៅ ៣,០០០ ដុល្លារឯណោះ ហើយបើចង់មុជទឹកឱ្យនាងគូរក៏ត្រូវចំណាយដូចគ្នា។ បច្ចុប្បន្ន ក្រៅពីជំនាញផ្នែកវិចិត្រសិល្បៈ អ្នកនាងក៏កំពុងបង្រៀនក្មេងៗ និងមនុស្សពេញវ័យឱ្យចេះមុជទឹកផងដែរ៕

សូមទស្សនាវីដេអូខាងក្រោម៖

តើប្រិយមិត្តយល់យ៉ាងណាដែរ?

• ការងារ
• វីដេអូ