រាជធានីភ្នំពេញ ៖ ទីបំផុតឃាតករដៃដល់ដែលចាក់សម្លាប់ប្រជាការពារភូមិតាឡី៣កាំបិត ធ្វើឱ្យរងរបួសធ្ងន់ធ្ងរ ហើយស្លាប់បាត់បង់ជីវិតពេលគ្រួសារបញ្ជូនទៅសង្គ្រោះដល់មន្ទីរពេទ្យ ដែលកើតឡើងកាលពីម៉ោង១១យប់ ថ្ងៃទី១៣ វិច្ឆិកា ក្នុងភូមិជើងឯក សង្កាត់ជើងឯក ខណ្ឌដង្កោនោះ ពេលនេះត្រូវកម្លាំងនគរបាលខណ្ឌដង្កោ ចាប់ខ្លួនបានហើយ ប៉ុន្តែនៅមិនទាន់ដឹងពីមូលហេតុច្បាស់លាស់ថា តើហេតុអ្វីទើបជននេះចាក់សម្លាប់ជនរងគ្រោះនៅឡើយទេ តែអាចជារឿងគំនុំចាស់។
ការចាប់ខ្លួននោះបានធ្វើឡើងកាលពីម៉ោង១១និង១០នាទីព្រឹក ថ្ងៃទី១៥ ខែវិច្ឆិកា ឆ្នាំ២០១៨ នៅចំណុចផ្ទះជួលលេខ៤៦អ៊ី ភូមិសំបួរមាស សង្កាត់ដង្កោ ខណ្ឌដង្កោ រាជធានីភ្នំពេញ។ជនសង្ស័យនេះឈ្មោះ ថាច់ សួ ភេទប្រុស អាយុ៤៨ឆ្នាំ ស្នាក់នៅផ្ទះគ្មានលេខ ភូមិបូរីកម្មករ សង្កាត់ជើងឯក ខណ្ឌដង្កោ រាជធានីភ្នំពេញ ចំណែករងគ្រោះឈ្មោះ កេត ស៊ីថា អាយុ៥២ឆ្នាំ មុខរបរប្រជាការពារភូមិតាឡី ស្នាក់នៅភូមិតាឡី សង្កាត់ដង្កោ ខណ្ឌដង្កោ។
លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានប្រាប់ថា ក្រោយពីមានអំពើឃាតកម្មនោះកើតឡើង កម្លាំងរបស់លោកក្រោមបញ្ជាដោយផ្ទាល់របស់លោកស្នងការនគរបាលរាជធានីភ្នំពេញ ធ្វើការស្រាវជ្រាវ និងកំណត់មុខសញ្ញាទីតាំងភ្លាមៗមកម្ល៉េះ មិនតែប៉ុណ្ណោះតាមចាប់ខ្លួនភ្លាមៗដែរ ប៉ុន្តែជនសង្ស័យបានគេចខ្លួនពីកន្លែងមួយទៅកន្លែងមួយ។
ក្រោយមកទទួលដំណឹងថា ជនដៃដល់ជិះម៉ូតូម៉ាកហុងដាណៃហត ១គ្រឿង ចេញពីផ្ទះជួលខាងលើ ទើបកម្លាំងតាមរហូតដល់ម៉ោង១១និង១០នាទីថ្ងៃទី១៥នេះ ទើបចាប់ខ្លួនបាន។ បន្ទាប់មក បញ្ជូនទៅកាន់ស្នងការដ្ឋាននគរបាល ដើម្បីសាកសួរ និងកសាងសំណុំរឿងចាត់ការតាមច្បាប់។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
