ក្រុមហ៊ុនជាច្រើននៅចក្រភពអង់គ្លេស បញ្ចូលមីក្រូឈីបថ្មីមួយ ក្នុងស្បែកដៃបុគ្គលិករបស់ខ្លួន ដើម្បីពង្រឹងសុវត្ថិភាពក្រុមហ៊ុន (មានវីដេអូ)

ចក្រភពអង់គ្លេស៖ ថ្មីៗនេះក្រុមហ៊ុន និង ធនាគារឯកជនជាច្រើនក្នុងចក្រភពអង់គ្លេស បាននាំគ្នាបែរមកប្រើប្រាស់បច្ចេកវិទ្យាអេឡិចត្រូនិចថ្មី ដែលជាមីក្រូឈីបតូចមួយ សម្រាប់បញ្ចូលក្នុងស្បែកដៃបុគ្គលិក ក្នុងគោលបំណងពង្រឹងសុវត្ថិភាពក្រុមហ៊ុនរបស់ពួកគេ។

យោងតាមសារព័ត៌មាន Dailymail ដែលបានចេញផ្សាយនៅក្នុងថ្ងៃទី ១១ ខែវិច្ឆិកា ឆ្នាំ ២០១៨ កន្លងទៅនេះបានបង្ហាញថា “មីក្រូឈីបអេឡិចត្រូនិចជំនាន់ថ្មីមួយនេះ ត្រូវបានបង្កើតឡើងដោយក្រុមហ៊ុនរបស់ប្រទេសស្វីសឈ្មោះថា Biohax " ។

មិនតែប៉ុណ្ណោះ មីក្រូឈីបមួយនេះត្រូវបានក្រុមហ៊ុនជាច្រើននៅក្នុងចក្រភពអង់គ្លេសទាក់ទងទិញ ដើម្បីយកវាទៅបញ្ចូលក្នុងស្បែកដៃបុគ្គលិករបស់ខ្លួន ក្នុងគោលបំណងពង្រឹងសុវត្ថិភាពក្រុមហ៊ុន។មួយវិញទៀតគឺវាអាចការពារសម្បត្តិឯកជនពោលគឺមិនអាចឲ្យបុគ្គលិកចូលមើលឬបន្លំឯកសារសម្ងាត់របស់ក្រុមហ៊ុនបានឡើយ។ 

យោងតាមសារព័ត៌មានដដែលបានបន្តថា “មីក្រូឈីបអេឡិចត្រូនិចជំនាន់ថ្មីមួយនេះ មានតម្លៃ១៩៥ដុល្លារក្នុងមួយគ្រាប់។

មកទល់ឥឡូវនេះមានក្រុមហ៊ុនឯកជនមួយក្នុងប្រទេសអង់គ្លេស  ក៏ត្រៀមប្រើបន្ទះមីក្រូឈីបដ៏តូចមួយនេះ ដើម្បីបញ្ចូលក្នុងស្បែកដៃបុគ្គលិករាប់ពាន់នាក់ក្នុងក្រមហ៊ុនដែរ ពីព្រោះពួកគេគិតថាវាងាយស្រួលគ្រប់គ្រងទិន្នន័យ និងមានសុវត្ថិភាព។ 

គួរបញ្ជាក់ថា មីក្រូឈីបថ្មីមួយនេះមិនមានបំពាក់ប្រព័ន្ធ GPS សម្រាប់តាមដានសកម្មភាពរបស់បុគ្គលិកទេ។ យ៉ាងណាមិញវាប្រៀបដូចជាកាតសម្រាប់សម្គាល់ខ្លួនមួយអីចឹង។ 

បុគ្គលិកក្រុមហ៊ុនអាចប្រើវាចូលកន្លែងធ្វើការ ទិញម្ហូបនៅអាហារដ្ឋាន និង
ប្រើប្រាស់ម៉ាស៊ីនព្រីន ឬ កុំព្យូទ័រ ដោយមិនចាំបាច់ប្រើកាត ឬ ក្រយៅដៃសម្រាប់ស្កេន៕

• វិទ្យាសាស្រ្ត
• ការងារ
• វីដេអូ