រាជធានីភ្នំពេញ ៖ ហាងលក់មាសនិង ប្លាទីន នៅផ្សារសាមគ្គី ស្ថិតនៅតាមមហាវិថីម៉ៅសេទុង ក្នុងសង្កាត់ផ្សារដេប៉ូទី៣ ខណ្ឌទួលគោក បានត្រូវក្រុមចោរកាត់សោទ្វារ និងទូដែក ប្រមូលយកគ្រឿងអលង្ការហ្មត់ ដែលគិតជាទឹកប្រាក់ប្រមាណ៤០ម៉ឺនដុល្លារ ។ នេះបើយោងតាមការអះអាងរបស់ម្ចាស់ហាងប្រាប់សមត្ថកិច្ច ។ ហេតុការណ៍នេះ បង្កឱ្យមានការភ្ញាក់ផ្អើលឡើងកាលពីវេលាម៉ោង៨និង៣០នាទីព្រឹកថ្ងៃទី១៤ ខែវិច្ឆិកា ខណៈម្ចាស់ហាងធ្វើដំណើរទៅបើកទ្វារហាងលក់ដូរដូចធម្មតា ។
ហាងដែលត្រូវចោរគាស់លួចគ្រឿងអលង្ការនោះយីហោ ហាងមាស ប្លាទីន មានលក់គ្រឿង អលង្ការ ធ្វើពីមាស ប្លាទីន ត្បូងគ្រប់ប្រភេទ តូបលេខ៥១AB (ស្តង់៣AB) មានម្ចាស់ឈ្មោះ ជា ធឿន ភេទប្រុស អាយុ៤៥ឆ្នាំ ប្រពន្ធឈ្មោះ ឡេង ស៊ីណែត ហៅនាង អាយុ៣៥ឆ្នាំ មានទីលំនៅផ្ទះលេខ១៤ ផ្លូវលេខ២៦១ សង្កាត់ទឹកល្អក់ទី១ ខណ្ឌទួលគោក ។
តាមព័ត៌មានឱ្យដឹងថា នៅវេលាម៉ោងប្រមាណ៨និង៣០នាទីព្រឹកថ្ងៃនោះ ខណៈម្ចាស់ទៅបើកទ្វារហាងលក់ដូរ ស្រាប់តែឃើញទ្វារចំហដោយត្រូវចោរកាត់សោទ្វារចូលទៅក្នុងកាត់សោទូដែកយកគ្រឿងអលង្កាហ្មត់ ទើបបង្កឱ្យមានការភ្ញាក់ផ្អើលឡើងតែម្តង ។
តាមព័ត៌មានឱ្យដឹងទៀតថា សោទ្វារដែករូតត្រូវចោរកាត់ផ្តាច់ រួចទើបចូលទៅក្នុងកាត់សោទូដែកយកគ្រឿងអលង្ការទៀត ។ គេពុំដឹងថា ក្រុមចោរមានគា្នប៉ុន្មាននាក់ ហើយចូលគាស់ហាងលក់គ្រឿងអលង្ការនោះតាំងពីពេលណាឡើយ ។ បន្ទាប់ពីមានការភ្ញាក់ផ្អើលនាព្រឹកនោះ ភ្លាមៗត្រូវបានម្ចាស់ឱ្យដឹងថា គ្រឿងអលង្ការដែលចោរគាស់យកទៅគិតជាទឹកប្រាក់ប្រមាណ៥០ម៉ឺនដុល្លារ តែក្រោយមកនៅក្នុងពាក្យបណ្តឹងបានឱ្យដឹងថា គ្រឿងអលង្ការដែលចោរគាស់លួចយកទៅនោះ រួមមានមាស និងប្លាទីនដាំត្បូងពេជ្រ គិតជាទឹកប្រាក់គឺប្រមាណ៤០ម៉ឺនដុល្លារវិញ ។
ម្ចាស់ហាងបានឱ្យសមត្ថកិច្ចដឹងថា នៅវេលាម៉ោងជិត៦ល្ងាចថ្ងៃទី១៣ ខែវិច្ឆិកា រូបគាត់និងភរិយា ព្រមទាំងម្តាយ បានរៀបចំយកគ្រឿងអលង្ការដាក់ក្នុងស្បោងរួចយកទៅដាក់ក្នុងទូដែកសុវត្ថិភាព រួចទើបធ្វើដំណើរត្រឡប់ទៅផ្ទះ ។ លុះព្រឹកឡើងវេលាម៉ោងប្រមាណ៨និង៣០នាទី ក៏មកបើកទ្វារហាងលក់ដូរដូចធម្មតាវិញ ស្រាប់តែឃើញទ្វាររូតខាងមុខចំហ ហើយចូលទៅមើលទូដែកកែច្នៃ ត្រូវចោរកាត់សោយកគ្រឿងអលង្ការអស់។ ទោះបីជាយ៉ាងណា នៅទូដាក់គ្រឿងអលង្ការ ដាំពេជ្រ ក្បែរនោះ ពុំត្រូវបានចោរយកឡើយ ។
ម្ចាស់ហាងប្រាប់សមត្ថកិច្ចទៀតថា កន្លងមកគាត់ធ្លាប់ត្រូវជនសង្ស័យ២នាក់ជិះម៉ូតូតាម ហើយដោយសារតែភ័យពីសុវត្ថិភាព ទើបគាត់មិនយកគ្រឿងអលង្ការទៅផ្ទះដូចមុនទៀតទេ គឺទុកនៅក្នុងតូប មិននឹកស្មានថា ចោរចូលគាស់យកអស់បែបនេះសោះ ។ អ្វីដែលមានការចាបអារម្មណ៍នោះ គឺផ្សារសាមគ្គីកន្លង កាលពីជំនាន់ប្រធានផ្សារមុន បានបំពាក់កាមេរ៉ាសុវត្ថិភាពនៅខាងមុខ និងបានបើកភ្លើងបំភ្លឺទាំងយប់ទាំងថ្ងៃ។
លុះនៅពេលលោក ថោង ថង ប្តូរមកកាន់ជាប្រធានផ្សារសាមគ្គី ស្រាប់តែកាត់ផ្តាច់កាមេរ៉ាសុវត្ថិភាពចោល ហើយនៅពេលយប់ក៏ផ្តាច់ភ្លើង តាំងពីម៉ោងប្រមាណ៦ល្ងាចដែរ ជាហេតុធ្វើឱ្យកាមេរ៉ាសុវត្ថិភាពនៅហាងលក់មាស និងគ្រឿងអលង្ការទាំងមុខនិងខាងក្នុងមិនដំណើរការ ជាហេតុធ្វើឱ្យក្រុមចោរអាចចូលលួចបានដោយមិនមានទុកដានអ្វីទាំងអស់ ។ មិនតែប៉ុណ្ណោះចំពោះសន្តិសុខយាមផ្សារ ក៏ត្រូវប្រធានផ្សារដែល ទើបតែឡើងថ្មីនេះទារឡើងថ្លៃប្រាក់យាមដែរ តែបែរជាសេវាអន់ឲ្យចោរចូលលួចបាន ។
នៅព្រឹកថ្ងៃនោះ នគរបាលមូលដ្ឋាននិងមន្ត្រីបានទៅពិនិត្យរកស្នាមក្រយៅដៃចោរ និងធ្វើការស្រាវជ្រាវ ដោយហៅប្រធានផ្សារនិងសន្តិសុខទៅសាកសួរផងដែរ ។ គេមានការសង្ស័យថា អាចមានរនុកក្នុងទើបបានជានៅពេលចោរចូលគាស់ហាងលក់មាសនិងប្លាទីន នៅក្នុងផ្សារ បែរជាសន្តិសុខមិនដឹងបែបនេះ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
