អង់គ្លេស៖ គ្រូបង្វឹកក្រុមមេឃខៀវ Manchester City លោក Pep Guardiola អាចនឹងត្រូវពិន័យពីសហព័ន្ធបាល់ទាត់របស់អង់គ្លេសដែលហៅកាត់ (FA) ដោយសារលោកបាននិយាយចំៗអំពីអាជ្ញាកណ្ដាល Anthony Taylor មុនការប្រកួតជាមួយក្លិបបិសាចក្រហម Manchester United កាលពីថ្ងៃ អាទិត្យ កន្លងទៅ។
នៅមុនការប្រកួតចាប់ផ្ដើម អតីតគ្រូបង្វឹកក្លិប Bayern Munich រូបនេះបាននិយាយរៀបរាប់អំពីប្រវត្តិរបស់អាជ្ញាកណ្ដាល Taylor យ៉ាងច្រើនហូរហែរដោយនៅក្នុងនោះក៏មានពាក្យលាយលំយ៉ាងច្រើនដែលប៉ះពាល់កិត្តិយសរបស់មន្ត្រីអាជ្ញាកណ្ដាល ផងដែរ។
លោក Guardiola បាននិយាយប្រាប់អ្នកយកព័ត៌មានថា៖ «លោក Taylor គឺជាមនុស្សដែលមានប្រភពមកពីទីក្រុង Manchester ប៉៉ុន្តែគ្មានអ្នកណាគាំទ្រលោកទេពេលកាត់សេចក្តីការប្រកួតម្ដងៗ។ តែខ្ញុំគិតថាលោកនឹងកាត់សេចក្តីការប្រកួតនេះដោយយុត្តិធម៌ទៅចុះ ពីព្រោះមិនមែនមានតែអ្នកគាំទ្រនៅប្រទេសអង់គ្លេសប៉ុណ្ណោះទេ ដែលតាមដានការប្រកួត ដូច្នេះបើសិនជាលោកកាត់សេចក្តីខុសត្រង់ចំណុចណាមួយនោះ គឺមុខជា Man City យ៉ាប់ជាក់ជាមិនខាន»។
គួរឲ្យដឹងថា គ្រូបង្វឹកក្រុមបិសាចក្រហម Manchester United លោក Jose Mourinho ក៏ធ្លាប់ត្រូវបាន FA ពិន័យជាប្រាក់ចំនួន ៥មុឺនផោនរួចមកហើយ នៅពេលដែលលោកបានប្រើទង្វើមិនសមរម្យដាក់មន្រ្ដីអាជ្ញាកណ្ដាល Taylor អំឡុងការប្រកួតដែលក្រុមរបស់លោកបានត្រឹមស្មើគ្នាជាមួយក្រុម Liverpool ដោយលទ្ធផល ០-០នៅក្នុងទឹកដី Anfield កាលពីខែ តុលា ឆ្នាំ ២០១៦ កន្លងទៅ។ ដោយឡែកចំពោះករណីលោក Pep Guardiola វិញលោកអាចនឹងត្រូវពិន័យធ្ងន់ជាងនេះ ប៉ុន្តែ FA រងចាំឲ្យលោកធ្វើបកស្រាយឲ្យបានមុនថ្ងៃ ព្រហស្បតិ៍ ម៉ោង ៦ល្ងាច៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
