ខេត្តបាត់ដំបង ៖ សមត្ថកិច្ចបានរាយការណ៍ថា មានជនមិនស្គាល់អត្តសញ្ញាណមួយក្រុម បានធ្វើសកម្មភាពចូលលួចសម្ភារពេទ្យ និងលុយជាង១០លានរៀលនៅក្នុងគ្លីនិក «រ៉ាក់» ដែលស្ថិតនៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ដែលគេសន្និដ្ឋានជាបឋមថា អាចកើតឡើងនៅចន្លោះម៉ោង១២អធ្រាត្រ ដល់ម៉ោង៥ព្រឹកថ្ងៃទី១២ វិច្ឆិកា នេះ គឺក្រោយពេលសន្តិសុខយាមម្នាក់ដេកលក់ ។
សមត្ថកិច្ចបានឲ្យដឹងថា ក្រុមចោរបានចូលលួចសម្ភារពេទ្យ និងទូដែលដាក់លុយនៅក្នុងបន្ទប់ចំនួន៣ តែមិនមានស្នាមគាស់ទម្លុះទម្លាយទេ គឺជនល្មើសបានប្រើកូនសោចាក់បើកទ្វារតាមសម្រូលតែម្ដង ។ ជនសង្ស័យអាចមានបក្សពួកលើសពី២នាក់ ។ សមត្ថកិច្ចបានប្រាប់ទៀតថា នៅក្នុងគ្លីនិក «រ៉ាក់» នេះ មានតែសន្តិសុខម្នាក់ ឈ្មោះស៊ន ភឿន បានដេកយាម ហើយសន្តិសុខរូបនេះបានអះអាងថា ក្រុមចោរអាចចូលធ្វើសកម្មភាពក្រោយម៉ោង១១យប់ គឺបន្ទាប់ពីសន្តិសុខដេកលក់។
ដោយឡែក សម្ភារដែលបាត់បង់ បើតាមអ្នកគ្រួពេទ្យម្នាក់ ដែលទទូលខុសត្រូវប្រចាំគ្លីនិករ៉ាក់បាននិយាយថា គឺមានលុយខ្មែរជាង១០លានរៀល, លុយដុល្លារចំនួន៤៧៤ដុល្លារដែលទុកក្នុងទូដែក និងសម្ភារពេទ្យមានតម្លៃរាប់ម៉ឺនដុល្លារជាច្រើនទៀត ដែលទុកនៅក្នុងបន្ទប់ពិសោធន៍ចំនួន២។
ក្នុងនោះ មានម៉ាស៊ីនអេកូ, ម៉ាស៊ីនពិនិត្យឈាម និងសម្ភារពេទ្យមួយចំនួនទៀត រួមទាំងក្បាលកាមេរ៉ាសុវត្ថិភាព និងហាតឌីសមួយ ក៏ត្រូវចោរលួចយកទៅដែរ។ ដោយឡែក ទូដែកចំនួន៣ដែលទុកក្នុងបន្ទប់រួមគ្នា ត្រូវចោរលើកយកទៅ១ គឺយកទូដែលមានលុយ រីឯទូរ២ទៀតដែលគ្មានលុយលោកចោរ មិនប៉ះពាល់ទេ ។
ជុំវិញករណីនេះ សមត្ថកិច្ចដែលចុះទៅពិនិត្យ ហាក់មិនទាន់ធ្វើការសន្និដ្ឋានឱ្យជាក់លាក់នៅឡើយទេ ។ សមត្ថកិច្ចគ្រាន់តែអះអាងថា ជនប្រព្រឹត្ត អាចមានបក្សពួកលើសពី២នាក់ ទើបធ្វើសកម្មភាពលើកទូដែករួច និងអាចជញ្ជូនសម្ភារពេទ្យអស់ពីបន្ទប់ ។
មន្ត្រីម្នាក់បាននិយាយថា គេសង្ស័យអំពើចោរកម្មក្នុងទ្រង់ទ្រាយធំដុំនេះ អាចប្រព្រឹត្តដោយជនដែលធ្លាប់ចេញ-ចូលគ្លីនិកតែម្តង ព្រោះស្គាល់ច្បាស់អំពីផ្ទៃក្នុងនៅក្នុងគ្លីនិករ៉ាក់នេះ។ ប៉ុន្តែអ្វីដែលគួរឱ្យកត់សម្គាល់ខ្លាំងបំផុតនោះ គឺជនដៃដល់មិនបានគាស់ទម្លុះទម្លាយ ឬគាស់បង្អូចទេ គឺជនល្មើសប្រើសោចាក់បើកទ្វារតាមសម្រូលស្ទើរគ្រប់បន្ទប់ ហើយក៏បានដោះឬលើកយកសម្ភារពេទ្យតាមសម្រូល និងតាមលក្ខណៈបច្ចេកទេស ដោយមិនមានកាត់ផ្ដាច់ខ្សែអ្វីមួយឡើយ ។
ពេលនេះ សមត្ថកិច្ចបាននិងកំពុងពិនិត្យកន្លែងកើតហេតុ និងកំពុងសួរនាំសន្តិសុខម្នាក់ រួមទាំងបុគ្គលិកពេទ្យមួយចំនួនផងដែរ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
