រាជធានីភ្នំពេញ ៖ មកទល់ពេលនេះ គ្មានអ្នកណាមិនដឹងនោះទេថា កីឡាករជើងខ្លាំងផ្នែកយុទ្ធគុនខម និងជាអ្នកប្រដាល់សេរីដ៏ខ្លាំងចាន់ រតនា និងកីឡាករល្បីឈ្មោះ ដែលត្រូវគេស្គាល់ថា ជាម្ចាស់ខ្សែក្រវាត់ល្បីរន្ទឺលោក ពៅ សក្តិសិទ្ធ មានសុភមង្គលយ៉ាងរឹងមាំជាមួយភរិយាជាជនបរទេសប៉ុន្តែមិនមែនប្រទេសជិតខាង។
បន្ថែមពីលើសុភមង្គលនេះ ភរិយារបស់លោកថែមទាំងគ្មានការដាក់សម្ពាធទាមទារឲ្យលោកលាឈប់ពីការប្រដាល់ និងមិនខ្វល់ពីអតីតកាលនោះផង។
ក្រោយសម្រេចចិត្តឃ្លាតឆ្ងាយពីសង្វៀនមិនសូវសកម្មដូចមុនព្រោះតែវ័យ និងភាពរវល់ពីការងារ កីឡាករ ចាន់ រតនា ធ្លាប់បានប្រាប់ដោយឥតលាក់លៀមថា អាជីពប្រដាល់របស់លោកនឹងនៅតែបន្តគ្មានថ្ងៃប្រកាសឈប់នោះទេ បើទោះជាមួយរយៈនេះ លោកមិនសូវមានពេលហ្វឹកហាត់និងបានឡើងរេញញឹកញាប់ដូចមុន ។
លោកនៅតែត្រូវគេដឹងថាចេញចូលប្រទេសបារាំង ដែលជាស្រុកកំណើតភរិយាដើម្បីបង្ហាញក្បាច់គុនយុទ្ធគុនខមរបស់ខ្មែរ និងបង្ហាញក្បាច់ប្រដាល់ដល់កូនខ្មែរ រហូតនៅក្នុងប្រទេសបារាំងស្គាល់លោកមិនធម្មតា ។
លោកអះអាងថា អ្នកស្រីCindy ជាជនជាតិបារាំង មិនដែលហាមប្រាមលោកបន្តការប្រដាល់នោះទេ ប៉ុន្តែអាចមកពីវ័យ និងទីផ្សារមិនសូវមានទើបលោកមិនសូវឃើញមុខ ។ លោក និងភរិយាទទួលបានកូនស្រីជាចំណងដៃចំនួន២នាក់ ដោយក្នុងពេលនេះកូនស្រីទាំង២របស់លោកក៏ធំៗអស់ទៅហើយ ទើបលោកនិងភរិយាត្រូវគេឃើញសកម្មភាគច្រើនតែនឹងមុខជំនួញ ជាជាងខ្វាយខ្វល់ការប្រដាល់ ។
ចំណងស្នេហ៍ខុសសញ្ជាតិនេះលោកអះអាងថា មិនដែលមានបញ្ហាចម្រូងចម្រាសឬរស់នៅមិនចុះសម្រុងគ្នានោះឡើយ ពិសេសពាក់ព័ន្ធនឹងជំនឿសាសនា និងផ្នត់គំនិតផ្សេងៗ គឺអាចនិយាយបានថាមិនមានតែម្ដង។
អ្វីដែលធ្វើឲ្យលោកកាន់តែស្រឡាញ់ពេញចិត្តភរិយាជាទីបំផុតនោះគឺដោយសារតែភរិយាស្រឡាញ់ចូលចិត្តវិស័យកីឡាប្រដាល់ ពិសេសគឺយុទ្ធគុនខម ដែលជាមេក្បាច់គុនដ៏ខ្លាំងរបស់ខ្មែរដែលលោកកំពុងហ្វឹកហ្វឺននិងចេះនិយាយភាសាខ្មែរបានយ៉ាងស្ទាត់ ដែលមិនធ្វើឲ្យមានការពិបាកក្នុងការប្រាស្រ័យទាក់ទងគ្នា។
លោករំលឹកថា ប្រមាណជាង១២ឆ្នាំមុនក្នុងពេលឡើងទៅសម្ដែងនៅក្នុងប្រទេសបារាំង អ្នកស្រី Cindy ដែលជាភរិយាសព្វថ្ងៃបានចាប់ចិត្តស្រឡាញ់លោកតែម្ដងដោយសារតែចាប់អារម្មណ៍រឿងលោកពូកែចំពោះក្បាច់គុនខ្មែរ។
ក្រោយការរួមរស់ អ្នកស្រីបានចុះមករស់នៅប្រទេសកម្ពុជាជាមួយលោករហូតដែលពេលខ្លះ អ្នកស្រីបានទាំងចាត់ទុកថា កម្ពុជាគួរឲ្យចង់រស់នៅជាងនៅប្រទេសបារាំងដែលជាប្រទេសកំណើតនោះទៀតផង ។ បន្ថែមពីលើនោះ សូម្បីតែឪពុកម្ដាយក្មេករបស់លោកក៏ឡើងមកបើកភោជនីយដ្ឋានមួយនៅភ្នំពេញ ដើម្បីបន្តការរស់នៅជួបជុំជាមួយលោក និងភរិយាលោកដោយមិននឹកនាឡើងទៅកាន់ប្រទេសបារាំងវិញពេលណានោះដែរ ។
លោកនៅតែមិនហ៊ានទាយទុកពីអនាគតនោះឡើយ ប៉ុន្តែសម្រាប់បច្ចុប្បន្នលោកនៅតែបន្តប្រឡូកក្នុងអាជីពប្រដាល់និងជាគ្រូបង្វឹកផ្នែកយុទ្ធគុនខមដែលជាក្បាច់គុនដ៏កំពូល និងជាមេក្បាច់គុនរបស់ខ្មែរនោះដដែលដោយសារតែគ្មានការជំទាស់ពីភរិយា និងឪពុកម្ដាយក្មេកជាជនជាតិបារាំងរបស់លោក។
ទោះបីជាយ៉ាងណា លោកនឹងអាចលាឈប់ក្នុងពេលណាមួយក៏ថាបានប្រសិនបើភរិយារបស់លោកឈប់ចង់រស់នៅស្រុកខ្មែរ ហើយទទូចឲ្យលោកត្រូវតែទៅរស់នៅប្រទេសបារាំងជុំគ្នា។ លោកអះអាងថា បញ្ហានេះវានឹងនៅយូរណាស់ក្នុងពេលដែលភរិយារបស់លោកហាក់ដូចជាគ្មានគម្រោងទៅរស់នៅប្រទេសកំណើតវិញក្រៅពីឡើងទៅលេងម្ដងម្កាលបែបនេះ ។
ចាន់ រតនា ក៏ធ្វើឱ្យភរិយាកាន់តែស្រឡាញ់ពេញចិត្តខ្លាំងណាស់ដែរ ក្រោយពីមានឱកាសសម្ដែងរឿងកន្លងមក ដូចជារឿង«សពរន្ទះបាញ់» ជាមួយតារាសម្ដែងម៉ាក់សែន សូនីតា ជាដើម។ លោកធ្លាប់បានរៀបរាប់ពីចំណងស្នេហ៍ថា«ពួកយើងកាន់តែស្និទ្ធស្នាលគ្នាដោយសារប្រពន្ធខ្ញុំចេះនិយាយភាសាខ្មែរ ហើយក៏ចូលកៀកៗខ្ញុំ ដោយសារគាត់ចង់ស្វែងយល់ពីក្បាច់គុនខ្មែរ!»។
មិនខុសគ្នាដែរ កីឡាករល្បីឈ្មោះ លោក ពៅ សក្តិសិទ្ធ ឯណេះវិញ ក៏ផ្អែមបន្លែជាមួយភរិយាជាជនជាតិជប៉ុនផងដែរ បន្ទាប់ពីលោករួមរស់ជាមួយគ្នាបានកូនប្រុសមួយ និងក្រោយពីលោកដាច់ស្រេចទាំងស្រុងពីភរិយានៅស្រុកខ្មែរតាមរយៈការលែងលះ ។ លោកត្រូវគេដឹងថាភ្ជាប់ស្នេហ៍ជាមួយភរិយាជនជាតិជប៉ុនក្រោយពីលោកមានរឿងចម្រូងចម្រាសជាមួយភរិយា ហើយចេញទៅប្រកួតនៅក្នុងប្រទេសជប៉ុន ហើយបានស្គាល់នារីជាភរិយាបច្ចុប្បន្ននៅក្នុងទីនោះ ។
លោក និងភរិយា ក៏បានរស់នៅទីនោះដោយមានសុភមង្គលនោះផង បើទោះជាការប្រាស្រ័យទាក់ទងមានលក្ខណៈពិបាកបន្តិច ព្រោះតែមានភាសាខុសគ្នា និងជំនឿសាសនាខុសគ្នាក្នុងពេលដំបូងៗ ។ លោកបានបង្ហាញមុខភរិយា និងកូនប្រុសក្នុងពេលនាំគ្នាមកលេងស្រុកកំណើតកាលពីពេលថ្មីៗ និងបានប្រកាសថា មិនចោលការប្រដាល់ និងការបង្វឹកសិស្សនោះទេ បើទោះជាក្នុងពេលនេះ លោកត្រូវគេដឹងថារវល់រួមរស់ជាមួយភរិយានៅក្នុងប្រទេសជប៉ុនច្រើនជាងបង្ហាញមុខក្នុងស្រុក ។
ក្នុងនោះភរិយារបស់លោកក៏មិនបានហាមប្រាមលោកឱ្យដាច់ឆ្ងាយពីកីឡានោះដែរ ដោយសារតែនៅប្រទេសជប៉ុនលោកបានប្រកាសថានៅតែមានសកម្មភាពបង្ហាញក្បាច់គុនខ្មែរឱ្យជប៉ុនបានស្គាល់មិនខុសគ្នាពេលដែលលោកមិនទាន់មានភរិយាជាជនជាតិជប៉ុន ។
លោកនៅតែបង្ហាញការស្រឡាញ់ការប្រដាល់ ដោយពេលមកកាន់ស្រុកកំណើតម្ដងៗ បើទោះមិនអាចឡើងប្រកួត ក៏បានដឹកដៃភរិយា និងកូនប្រុស មកគាំទ្រការប្រដាល់ និងបង្ហាញការនឹករលឹកចំពោះអាជីពមួយនេះ ក៏ដូចជាជាមួយអ្នកគាំទ្រ ។ លោកធ្លាប់បង្ហើបថា ភរិយារបស់លោកមិនខ្វល់ពីអតីតកាលរបស់លោកទេ ជាពិសេសពាក់ព័ន្ធនឹងរឿងអាស្រូវដែលធ្លាប់ដឹងជុំវិញមូលហេតុដែលនាំឱ្យលោកនិងភរិយាមុននៅស្រុកខ្មែរ លែងលះគ្នា។
ជាមួយនឹងការទម្លាយនេះ ទើបម្នាក់ៗសរសើរថា កីឡាករ ចាន់ រតនា និងកីឡាករ ពៅ សក្តិសិទ្ធ ពិតជាកាលីបខ្លាំងណាស់ ដែលបានភរិយាជាជនបរទេស ហើយរួមរស់យ៉ាងមានសេចក្ដីសុខ ខណៈដែលភរិយារបស់លោកទាំងពីរ ក៏សុទ្ធតែជាអ្នកជំនួញ និងមានជីវភាពល្អប្រសើរផង៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]