អង់គ្លេស៖ ខ្សែប្រយុទ្ធ Raheem Sterling របស់ក្រុមមេឃខៀវ Manchester City បានចេញមុខសុំទោសទៅកាន់អាជ្ញាកណ្ដាលដែលកាត់សេចក្តីនៅលើទីលានប្រកួត ក៏ដូចជាក្រុម Shakhtar Donetsk ផងដែរ ចំពោះរឿងដែលគេលេងបាល់ដួលនៅក្នុងប្រអប់គ្រោះថ្នាក់ ហើយអាជ្ញាកណ្ដាលក៏សម្រេចផ្ដល់បាល់ពិន័យ ១១ម៉ែត្រទាំងអយុត្តិធម៌បំផុត។
ខ្សែប្រយុទ្ធក្រុមជម្រើសជាតិអង់គ្លេសរូបនេះ បានព្យាយាមបណ្ដើរបាល់ទៅខាងឆ្វេងនៃទីលានប្រកួតរបស់ក្រុម Shakhtar Donetsk ក្នុងបំណងដើម្បីស៊ុតបញ្ចូលទីឲ្យក្រុមរបស់គេ អំឡុងការប្រកួតនៅក្នុងពានរង្វាន់ក្របខណ្ឌ Champions League កាលពីយប់ម្សិលមិញនេះ ប៉ុន្តែរូបគេស្រាប់តែដួលដោយខ្លួនឯងនៅពេលដែលគេព្យាយាមស៊ុតនោះ ដោយឡែកអាជ្ញាកណ្ដាលក៏បានផ្តល់បាល់ពិន័យ ១១ម៉ែត្រឲ្យក្រុមម្ចាស់ផ្ទះតែម្តង។
យ៉ាងណាមិញ Sterling បានប្រាប់ឲ្យសារព័ត៌មាន BT Sports ដឹងថា៖ «ពេលនោះគឺខ្ញុំបានព្យាយាមឆ្កឹះបាល់ដើម្បីស៊ុត ហើយខ្ញុំក៏មិនដឹងថាមានរឿងអ្វីកើតឡើងនោះដែរ ក៏ស្រាប់តែខ្ញុំរអិលដួលទៅតែម្តង។ ខ្ញុំមិនបានគិតថាបាល់នោះជាការប៉ះទង្គិចគ្នាអ្វីនោះទេ វាជាកំហុសរបស់ខ្ញុំដោយខ្លួនឯង។ ខ្ញុំបានដួល និងរអិលនៅលើស្មាក្នុងទីលានដោយខ្លួនឯង ដូច្នេះខ្ញុំពិតជាសូមទោសទៅកាន់ អាជ្ញាកណ្ដាល និងក្រុម Shaktar ផងដែរ»។
គួរឲ្យដឹងថា អំឡុងការប្រកួតដែលក្រុម Manchester City បានលុតក្រុម Shakhtar Donetsk ដោយលទ្ធផល ៦-០ គឺមានគ្រាប់បាល់មួយគ្រាប់បានកើតឡើងអំពី ការសម្រេចចិត្តផ្ដល់បាល់ពិន័យ ១១ម៉ែត្ររបស់អាជ្ញាកណ្ដាលខាងលើនេះឯង ហើយគ្រាប់បាល់នោះដែរត្រូវបានមជ្ឈដ្ឋានបាល់ទាត់ធ្វើការរិះគន់យ៉ាងខ្លាំង ទៅលើមន្រ្តីអាជ្ញាកណ្ដាលដែលដឹកនាំការប្រកួតរូបនោះ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]