ភ្នំពេញ៖ ផ្ទុះការចាប់អារម្មណ៍ជាថ្មី ពីសំណាក់អ្នកគាំទ្រក្រោយពីបទចម្រៀងថ្មី ”អារីកាតូ” លេងស្ទីលបែបជប៉ុន ដែលទើបនឹងបញ្ចេញក្តៅៗ កាលពីរាត្រីថ្ងៃទី០៧ ខែវិច្ឆិកានេះ ដោយតារាចម្រៀងប្រចាំផលិតកម្មសាន់ដេ លោក BMO TRAPZ និងកញ្ញា Yuri។
មិនតែប៉ុណ្ណោះ ក្នុងនោះគេសង្កេតឃើញថា បទចម្រៀងមួយបទនេះ ទទួលបានចាប់អារម្មណ៍យ៉ាងខ្លាំង ដោយសារតែទំនុកច្រៀងមានលក្ខណៈបែបកំប្លែង ព្រមទាំងចង្វាក់ភ្លេងញាក់កន្ត្រាក់អារម្មណ៍ និងមានការតុបតែងខ្លួន បែបជនជាតិជប៉ុនផងដែរ។
លើសពីនេះទៅទៀត តារាស្រីយូរី ក៏បានបញ្ជាក់ផងដែរថា ស្ទីលបែបជនជាតិជប៉ុននេះគឺជាប្រភេទបទថ្មី រសជាតិថ្មី សម្រាប់អ្នកគាំទ្រ ហើយបទនេះនឹងកាន់តែធ្វើឲ្យបង្កើននូវភាពសម្បូរបែបនៃបទចម្រៀងរបស់នាង បន្ទាប់ពីបទ”ស្វាបាប៊ូ” និងបទ”Crazy” ដែលជាបទចម្រៀងដែលនាងទើបនឹងបញ្ចេញកាលពីខែមុននេះ។
តារាស្រីរូបនេះបានបញ្ជាក់ទៀតថា ការបង្កើតស្ទីលថ្មីគឺមិនចង់ឲ្យអ្នកគាំទ្រធុញទ្រាន់ ហើយក៏ជាបទសម្រាប់ត្រៀមស្វាគមន៍រដូវក្តៅនេះផងដែរ។ នាងនៅតែរំពឹងដែរថា បទចម្រៀងថ្មីៗចុងក្រោយរបស់នាង នឹងនៅតែជាទីចាប់អារម្មណ៍របស់អ្នកគាំទ្រ ហើយនាងនិងក្រុមការងារនឹងនៅតែបន្តស្វែងរកអ្វីដែលថ្មី ប្លែកសម្រាប់ទស្សនិកជន នៅពេលខាងមុខនេះ។
គួរបញ្ជាក់ដែរថា ឈរជើងនៅផលិតកម្មសាន់ដេ តារាចម្រៀងយូរី គឺជាតារាចម្រៀងក្នុងលំដាប់ជួរមុខដែលមានស្នាដៃបទចម្រៀងសម្បូរបែប ពិសេសបទបែបញាក់កន្ត្រាក់អារម្មណ៍ជាច្រើន។ នាងកាន់តែមានហុងស៊ុយខ្ពស់ ក្រោយពីចាប់ដៃគូច្រៀងរាំជាមួយតារាចម្រៀង អ្នកនិពន្ធ និងផលិតករ លោក BMO៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]