រាជធានីភ្នំពេញ ៖ ស្ត្រីម្នាក់បានធ្វើដំណើរទៅសុំការអន្តរាគមន៍ពីកម្លាំងនគរបាលប៉ុស្តិ៍ចោមចៅ១ ខណ្ឌពោធិ៍សែនជ័យ រាជធានីភ្នំពេញ កាលពីវេលាម៉ោង៤រសៀល ថ្ងៃទី០៦ ខែវិច្ឆិកា ឆ្នាំ២០១៨។
បន្ទាប់ពីមានជនខិលខូចមួយក្រុមហៅទូរស័ព្ទប្រាប់ថា គាត់ឈ្នះរង្វាន់ធំគិតជាទឹកប្រាក់ចំនួន១០ម៉ឺនដុល្លារអាមេរិក បន្ទាប់មកលុយរង្វាន់ខាងលើក៏មិនបាន ហើយគាត់ត្រូវចាញ់បោកជនទាំងនោះអស់២ពាន់ដុល្លារថែមទៀត។
ស្ត្រីរងគ្រោះខាងលើនោះបានប្រាប់ថាគាត់មានឈ្មោះ វុក ណេត អាយុ៣០ឆ្នាំ មុខរបរ កម្មកររោងចក្រ ស្នាក់នៅ ភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យ។
នៅវេលាព្រឹកថ្ងៃកើតហេតុមានជនខិលខូចមួយក្រុម បានហៅទូរស័ព្ទមកប្រាប់ថា គាត់មានសំណាងបានឈ្នះរង្វាន់ធំដល់ទៅ១០ម៉ឺនដុល្លារ។ ខណៈនោះគាត់មានចិត្តត្រេកអរខ្លាំងណាស់ និងនឹកក្នុងចិត្តថា ច្បាស់ជាក្លាយទៅជាអ្នកមានមិនខានឡើយ ហើយក៏មិនបានគិតដល់ថាគឺរឿងខកចិត្តនោះឡើយបែបនេះសោះ។ ប្រភពដដែលបានបន្តទៀតថា ទន្ទឹមនឹងពេលដែលប្រាប់ថាគាត់ឈ្នះរង្វាន់ធំនោះក្រុមជនខិលខូចក៏បានដាក់លក្ខខណ្ឌមួយផងដែរ គឺបង្គាប់ឲ្យគាត់វេរនលុយទៅឲ្យពួកគេជាបន្តបន្ទាប់។
ដោយប្រាប់ថាយកទៅធ្វើឯកសារ ដើម្បីបង្កើតគណនេយ្យដាក់ប្រាក់ រង្វាន់១០ម៉ឺនដុល្លារនោះជូនគាត់ ពេលនោះហេតុតែចង់បានរង្វាន់ធំគាត់ មិនបានគិតពិចារណាអ្វីឡើយ ហើយបានវេរលុយទៅឲ្យជន១ក្រុមនោះជាបន្តបន្ទាប់ ដោយម្ដង៥០០ដុល្លារ ឬ១ពាន់ដុល្លារជាច្រើនលើក រហូតអស់ចំនួន២ពាន់ដុល្លារ។ ប្រភពខាងលើបានបន្តថា ខណៈនោះជនខិលខូច នៅតែមិនព្រមទម្លាក់លុយឲ្យទៀត ហើយចុងក្រោយបានខលមកប្រាប់ឲ្យគាត់វេរលុយចំនួន៥០០ដុល្លារទៅឲ្យ ពួកគេជាបន្តទៀត។
ចំណែកគាត់នៅតែមិនទាន់ភ្ញាក់ខ្លួនដឹងថាត្រូវចាញ់បោកពួកនោះនៅឡើយ ហើយដោយសារតែគ្មានលុយវេរបន្តគាត់ក៏បានដើរខ្ចីលុយអ្នកស្គាល់គ្នាដើម្បីវេរទៅឲ្យជនទាំងនោះ។ ប៉ុន្តែខ្ចីគេមិនបានសោះ ក្រោយមកអ្នកជិតខាងបានសួរនាំពីមូលហេតុដែលដើរខ្ចីលុយគេ គាត់ក៏បានប្រាប់តាមដំណើររឿង។ ទើបបែកធ្លាយរឿងចាញ់បោកគេ ភ្លាមៗនោះគាត់បានខលទៅកាន់ក្រុម ជនខិលខូច តែពួកនោះបិទទូរស័ព្ទខលលែងចូល។ គាត់បានភ្លឺភ្នែកដឹងថាចាញ់បោកទើបធ្វើដំណើរទៅកាន់ ប៉ុស្ដិ៍ចោមចៅ១ ដើម្បីដាក់ពាក្យប្ដឹងសុំឲ្យនគរបាលជួយអន្តរាគមន៍តែម្ដង៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]