រាជធានីភ្នំពេញ ៖ បុរស៣នាក់ជាកម្មករសំណង់ចេញពីធ្វើការនាំគ្នាទៅបង់សំណាញ់ លុះត្រឡប់មកវិញមិនចង់ដើរវាងផ្លូវបានហែលទឹកឆ្លងដៃទន្លេបាសាក់ ជាអកុសលបុរសម្នាក់បានលង់ទឹកស្លាប់រកសពមិនទាន់ឃើញនៅឡើយ បង្កឲ្យមានការភ្ញាក់ផ្អើលកាលពីវេលាម៉ោង៨និង១៥នាទីយប់ថ្ងៃទី៤ ខែវិច្ឆិកា ឆ្នាំ២០១៨ នៅក្បែរស្ពានហង្សកោះពេជ្រ ក្នុងដៃទន្លេបាសាក់ ស្ថិតនៅក្នុងសង្កាត់ទន្លេបាសាក់ ខណ្ឌចំការមន ។
ជនរងគ្រោះដែលស្លាប់ឈ្មោះ ដួង សំណាង ភេទប្រុស អាយុ៣៨ឆ្នាំ មានស្រុកកំណើតនៅស្រុកក្រវ៉ាញ ខេត្តពោធិ៍សាត់ ។
សាក្សីនៅកន្លែងកើតហេតុបានអោយដឹងថា មុនពេលកើតហេតុ គេបានឃើញបុរស៣នាក់ជាកម្មករសំណង់នោះកោះពេជ្រ ហើយអ្នកទាំង៣នាក់ត្រូវជាបងប្អូននឹងគ្នាផងដែរ លុះពេលចេញពីធ្វើការបាននាំគ្នាទៅបង់សំណាញ់យកត្រីមកទុកធ្វើម្ហូបដោយទៅបង់នៅត្រើយខាងកើត ពេលបង់សំណាញ់អត់បានត្រីក៏នាំគ្នាទៅបង់នៅត្រើយខាងលិចវិញម្តង ។
ប៉ុន្តែពួកគាត់មិនចង់ដើរវាងផ្លូវឆ្ងាយទេ គឺធ្លាប់ហែលទឹកឆ្លងដៃទន្លេបាសាក់ ក៏បាននាំគ្នាហែលទឹកឆ្លងទន្លេតែម្តង ពេលបុរស២នាក់ទៀតហែលទឹកឆ្លងផុតហើយនៅសល់តែជនរងគ្រោះដែលយកសំណាញ់មករុំជាប់នឹងខ្លួនហែលទឹកនោះមិនដឹងថាទាក់នឹងអ្វីទេ ស្រាប់តែលង់ទឹកធ្វើដៃខ្វៃៗ ភ្លាមៗនោះបុរស២នាក់ដែលហែលទឹកមកដល់ច្រាំងហើយនោះក៏បានហែលទៅជួយ ជាអកុសលបានលង់ទឹកលិចបាត់ទៅហើយ ។
ក្រោយពេលកើតហេតុ ស្ត្រីជាប្រពន្ធរបស់ជនរងគ្រោះដែលលក់ដូរនៅក្បែរនោះដែរ បានមកដល់កន្លែងកើតហេតុស្រែកទ្រហោយំរៀបរាប់ថា សព្វថ្ងៃគាត់មានតែកូនស្រីម្នាក់អាយុ៤ខួប មានប្តីគ្រាន់ជួយរកស៊ីចិញ្ចឹម ឥឡូវអត់ពីប្តីគ្មានអ្នកណាជួយផ្គត់ផ្គង់ជីវភាពតទៅទៀតទេ ។
ដោយសារតែអាណិតប្តីដែលលង់ទឹកបាត់រកសពមិនឃើញព្រោះទឹកហូរផងនោះ ស្ត្រីជាប្រពន្ធបានជួលជនជាតិខ្មែរអ៊ិស្លាមដែលជាក្រុមអ្នករាវរកសព មុនដំបូងក្រុមអ្នករាវរកកសពបានទារតម្លៃ៨០០ដុល្លារ តែស្ត្រីជាប្រពន្ធអត់មានលុយ ក៏បានចុះមកនៅ៤០០ដុល្លារ ។
ទោះបីជាជួលក្រុមរាវរកសពទាំងយប់ក៏រាវរកសពមិនទាន់ឃើញនៅឡើយទេ ព្រោះទឹកហូរ ខ្លាំងពេក ត្រូវបានក្រុមអ្នករាវរកសពបានប្រាប់ថាចាំស្អែកទើបរាវរកបន្តទៀត ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
