មេ UFC បោះសម្តីធ្ងន់ៗ និងដាក់លក្ខខណ្ឌតែមួយគត់ ចាំមើល Floyd ធ្វើជាអណ្តើកក្នុងស្នូកឬអត់? (មានវីដេអូ)

អាមេរិក៖ Floyd Mayweather Jr. នឹងត្រូវ "ខ្ទេចមុខ" ក្រោមថ្វីដៃរបស់ Khabib Nurmagomedov  បើកីឡាករទាំងពីរឡើងសង្វៀនប្រកួតគ្នាមែននោះ។ នេះជាសម្តីរបស់ប្រធានស្ថាប័នកីឡាក្បាច់គុនចម្រុះ UFC គឺលោក Dana White កាលពីម្សិលមិញ ដោយភ្ជាប់ជាមួយនឹងលក្ខខណ្ឌមួយដែល Floyd ទំនងជាមិនហ៊ានទទួលនោះទេ។

គួរឱ្យដឹងថា កីឡាករកូនកាត់អាមេរិក-រុស្ស៊ី Khabib ដែលទើបតែឈ្នះ Conor McGregor ជាអ្នកបញ្ឆេះឱ្យមានពាក្យចចាមអារ៉ាមពីការប្រកួតដ៏ធំជាមួយ Mayweather បន្ទាប់ពីហៅឈ្មោះកីឡាករប្រដាល់អាជីពដែលមិនធ្លាប់ស្គាល់ពាក្យថាចាញ់រូបនេះក្តែងៗថាឱ្យហក់មក។

រីឯ Floyd ក៏មិននៅស្ងៀមយូរដែរ ដោយពន្លយពាក្យប៉ុន្មានម៉ាត់ដែរថាការប្រកួតរវាងកីឡាករមិនធ្លាប់បរាជ័យក្នុងអាជីពដូចគ្នា តែស្ថិតនៅក្នុងស្ថាប័នខុសគ្នានេះ ពិតជាអាចទៅរួច។

ទោះយ៉ាងណា ប្រធានស្ថាប័ន UFC បានចេញមុខអះអាងថា Khabib ច្បាស់ជាឈ្នះ ហើយវាជាការប្រកួតដ៏ពិបាកភ្នែកមើល ព្រោះ Floyd នឹងខ្ទេចមុខ។ ប៉ុន្តែលោកទទូចដាក់លក្ខខណ្ឌថា ការប្រកួតនេះអាចកើតឡើងបានលុះត្រាតែប្តូរពីការប្រកួតលក្ខណៈប្រដាល់ធម្មតា មកជាក្បាច់គុនចម្រុះក្នុងទ្រុង ៨ ជ្រុង។

លោកបានបន្ថែមថា "លុយគឺនៅទីនេះ។ ឯងក៏ដឹង ខ្ញុំក៏ដឹង គ្រប់គ្នាសុទ្ធតែដឹង។ មកប្រកួតនៅ UFC។ ហៅទូរសព្ទមកខ្ញុំមក Floyd។ ឯងក៏ដឹងច្បាស់ថាធ្វើម៉េចទើបទៅរួចដែរ។ Call មកខ្ញុំមកបើឯងពិតជាចង់ចរចាឱ្យបានសាច់ការ"។ 

គួរបញ្ជាក់ថា Floyd Mayweather Jr. ធ្លាប់ប្រកួត ៥០ ដងក្នុងស្ថាប័នប្រដាល់ ខណៈ Khabib ធ្លាប់ឡើងសង្វៀន ២៧ ដងក្នុងស្ថាប័នក្បាច់គុនចម្រុះ និងមិនធ្លាប់ភ្លក់រសជាតិចាញ់ដូចគ្នា៕

សូមទស្សនាវីដេអូខាងក្រោម៖

តើប្រិយមិត្តយល់យ៉ាងណាដែរ?

• វីដេអូ