ខេត្តកែប ៖ បុរសជនជាតិខ្មែរអ៊ិស្លាមម្នាក់ត្រូវបានចរន្តអគ្គិសនីឆក់ស្លាប់យ៉ាងអាណោចអាធ័ម ខណៈពេលបុរសរូបនោះបានយកខ្សែភ្លើងទៅតភ្ជាប់គ្នាដោយភ្លេចបិទបារ៉ែតភ្លើង ។
ហេតុការនេះបានកើតឡើងកាលពីវេលា១០និង៤០នាទីព្រឹកថ្ងៃទី២៨ ខែតុលា ឆ្នាំ២០១៨ ស្ថិតនៅភូមិដំណាក់ចំបក់ សង្កាត់ព្រៃធំ ក្រុងកែប ខេត្តកែប។
ជនរងគ្រោះដែលស្លាប់ឈ្មោះ ឌត យ៉ប ភេទប្រុស អាយុ៤០ឆ្នាំ ជាខ្មែរអ៊ិស្លាម រស់នៅភូមិ ឃុំខាងលើ ។
សាក្សីឃើញហេតុការបានឲ្យដឹងថា មុនពេលកើតហេតុ នៅវេលាម៉ោងខាងលើ គេឃើញ ជនរងគ្រោះបានយកខ្សែភ្លើងដែលដាច់ធ្លាក់នៅលើដីត្រង់ចំណុចកន្លែងកើតហេតុមកតភ្ជាប់គ្នា ប៉ុន្តែការតភ្លើងនេះទំនងជាខ្វះបច្ចេកទេស ដោយភ្លេចបិទបារ៉ែត ក៏បណ្តាលឲ្យឆក់រងរបួសធ្ងន់ធ្ងរ ហើយត្រូវបានក្រុមគ្រួសារដឹកទៅសង្គ្រោះនៅមន្ទីរពេទ្យភ្លាមៗដែរ ដោយសារតែរបួសធ្ងន់ធ្ងរពេក ជាអកុសលជនរងគ្រោះបានស្លាប់នៅមន្ទីរពេទ្យ ។
ជុំវិញហេតុការណ៍គ្រោះថ្នាក់ដោយចៃដន្យខាងលើ ត្រូវបានស្ត្រីឈ្មោះលីម លីសារ៉ស អាយុ៣៨ឆ្នាំ ជាប្រពន្ធជនរងគ្រោះ បានរៀបរាប់ប្រាប់សមត្ថកិច្ចទាំងទឹកភ្នែករលីងរលោងថា ប្តីរបស់គាត់មិនដែលចេះជំនាញតភ្លើងនោះទេ ប្តីរបស់គាត់ជាកសិករចេះតែធ្វើស្រែចំការតែប៉ុណ្ណោះ ប៉ុន្តែថ្ងៃនេះចៃដន្យដោយឃើញខ្សែភ្លើងដាច់ធ្លាក់នៅនឹងដី ប្តីរបស់គាត់ក៏គិតតខ្សែភ្លើងនោះភ្ជាប់វិញ ព្រោះខ្លាចមនុស្ស ឬសត្វដើរប៉ះនាំឲ្យជួបគ្រោះថ្នាក់ដល់អាយុជីវិត តែដោយសារមុនតខ្សែភ្លើងនោះ ដោយប្តីរបស់គាត់ភ្លេចបិទបារ៉ែតភ្លើង ទើបបណ្តាលឲ្យឆក់រងរបួសធ្ងន់ ពេលបញ្ជូនដល់មន្ទីរពេទ្យបានស្លាប់តែម្តង។
ស្ត្រីជាប្រពន្ឋរៀបរាប់ឲ្យដឹងបន្តទៀតថា គាត់បានរៀបការជិត១០ឆ្នាំហើយ ព្រមទាំងមានកូន ប្រុស១ ស្រី១ នៅក្នុងបន្ទុកគ្រួសារផងដែរ បើអត់ពីប្តីទៅ គាត់មិនដឹងជារកមុខរបរអ្វីចិញ្ចឹមកូនទាំងពីរឲ្យបានរៀនសូត្រនឹងគេទេ សូមឲ្យអាជ្ញាធរមេត្តាជួយដល់ក្រុមគ្រួសាររបស់គាត់ផង។
ក្រោយពីសមត្ថកិច្ចពិនិត្យធ្វើកោសល្យវិច័យរួច សពត្រូវបានប្រគល់ឲ្យក្រុម គ្រួសាររៀបចំធ្វើបុណ្យតាមប្រពៃណីរបស់បងប្អូនជនជាតិខ្មែរអ៊ិស្លាម៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
