ជនសង្ស័យ៥នាក់ ពាក់ព័ន្ធគ្រឿងញៀន និងលួចម៉ូតូ ត្រូវជាប់ខ្នោះនគរបាលខណ្ឌឫស្សីកែវ

(ភ្នំពេញ)៖ ក្រុមជនសង្ស័យចំនួន៥នាក់ ក្នុងនោះមាន៣នាក់ ជាចោរត្រៀមប៉ុនប៉ងលួចម៉ូតូ តែមិនទាន់បានសម្រេចឡើយ និង២នាក់ទៀតប្រើប្រាស់ និងរក្សាទុកថ្នាំញៀន ត្រូវបានកម្លាំងនគរបាលខណ្ឌឫស្សីកែវ តាមស្រាវជ្រាវបង្ក្រាបជាក់ស្ដែងបន្តបន្ទាប់ ដកហូតបានវត្ថុតាងពាក់ព័ន្ធមួយចំនួននៅ៣ទីតាំង និង៣ករណីផ្សេងគ្នា។

ប្រតិបត្តិការឡើងនេះ ធ្វើឡើងនៅតាមបណ្ដោយផ្លូវ៦២R ក្រុម៥ ភូមិទួលសំពៅ សង្កាត់ទួលសង្កែ១ និងនៅតាមបណ្ដោយផ្លូវខាងសារិន ក្នុងក្រុមទី៥ ភូមិបឹងសាឡាង សង្កាត់ឬស្សីកែវ និងមួយកន្លែងទៀត ស្ថិតនៅតាមបណ្ដោយផ្លូវរថភើ្លង ក្រុមទី១ ភូមិបាក់ទូក សង្កាត់ទួលសងែ្ក១។ នេះបើតាមការបញ្ជាក់ឲ្យបានដឹងរបស់លោកវរសេនីយ៍ឯក គល់ យី អធិការនគរបាលខណ្ឌឫស្សីកែវ ដែលបានបើកប្រតិបត្តិការឡើងនៅយប់រំលងអាធ្រាតឈានចូលថ្ងៃទី២៣ ខែតុលា ឆ្នាំ២០១៨។

លោកវរសេនីយ៍ឯក អធិការនគរបាលខណ្ឌឫស្សីកែវ បានឲ្យដឹងថា ក្នុងករណីទី១ ដែលកម្លាំងនគរបាលប៉ុស្ដិ៍ទួលសង្កែ១ របសលោកបង្ក្រាបជាក់ស្ដែងនៅពេលរាត្រី គឺបានអនុវត្តភ្លាមៗបន្ទាប់ពីមានជនសង្ស័យ៣នាក់ បានត្រៀមប៉ុនប៉ងលួចទ្រព្យសម្បត្តិ (ម៉ូតូ) តែមិនទាន់បានសម្រេចនោះទេ ក៍ត្រូវបានឃាត់ខ្លួនទាន់ពេលវេលា ដកហូតបានម៉ូតូ១គ្រឿងម៉ាក zomer x ពណ៌សលាយទឹកក្រូច សេរីឆ្នាំ២០១៧ ស្លាកលេខ ភ្នំពេញ 1GK-5220, ដែកសំប៉ែតចុងស្រួចចំនួន១, កូនសោខ្សៀលេខ៨ចំនួន១, ដែកលួសចំនួន១ ដោយក្នុងនោះជនសង្ស័យទី១-ឈ្មោះ សុខ អែម ភេទប្រុស អាយុ២១ឆ្នាំ មុខរបរកម្មករដឹកឥវ៉ាន់ ស្នាក់នៅក្នុងបុរីរិទ្ធ ភូមិបឹងសាលាង សង្កាត់ឬស្សីកែវ (គ្មានសារធាតុញៀន) ទី២-ឈ្មោះ មឿន សុផា ភេទប្រុស អាយុ ២៣ឆ្នាំ មុខរបរកម្មករ ស្នាក់នៅផ្ទះជួល តាមបណ្ថោយផ្លូវបេតុង ក្នុងភូមិទួលសង្កែ សង្កាត់ទួលសង្កែទី១ (គ្មានសារធាតុញៀន) ទី៣-ឈ្មោះ អៀង ចាន់ ភេទប្រុស អាយុ១៦ឆ្នាំ មុខរបរកម្មករ ស្នាក់នៅផ្ទះជួលក្នុងបុរីរិទ្ធ តាមបណ្ដោយផ្លូវបេតុង ភូមិបឹងសាឡាង សង្កាត់ឫស្សីកែវ (គ្មានសារធាតុញៀន)។

លោកបន្តថា ក្នុងករណីទី២ គឺបានអនុវត្តឡើងក្រោយកម្លាំងនគរបាលខណ្ឌ-ប៉ុស្ដិ៍ឫស្សីកែវ បានបញ្ចប់ការស៉ើបអង្កេត ទើបឈានទៅបង្ក្រាបឃាត់ខ្លួនជនសង្ស័យម្នាក់ឈ្មោះ យ៉ន យុទ្ធ ភេទប្រុស អាយុ២៦ឆ្នាំ ជនជាតិខ្មែរ មុខរបរជាងជួសជុលរថយន្ដ ស្នាក់នៅសង្កាត់ស្រះចក ខណ្ឌដូនពេញ ដកហូតបានក្រាមពណ៌សថ្លាចំនួន០១កញ្ចប់តូច, ម៉ូតូ១គ្រឿងម៉ាកនិច ពណ៌ស ពាក់ស្លាកលេខ១FC-9832, ទូរស័ព្ទដៃម៉ាកហូវ៉ៃចំនួន១គ្រឿង, រួមជាមួយឧបករណ៍សម្រាប់ជក់គ្រឿងញៀនផងដែរ។

លោកវរសេនីយ៍ឯក អធិការនគរបាលខណ្ឌឫស្សីកែវ បានឲ្យដឹងទៀតថា ករណីទី៣ គឺបានធ្វើឡើងនៅយប់រំលងអាធ្រាតរហូតដល់ទាបភ្លឺថ្ងៃខែឆ្នាំដដែលនេះ កម្លាំងប៉ុស្ដិ៍ទួលសង្កែ១ បានឆ្មក់បង្ក្រាបឃាត់ខ្លួនជនសង្ស័យប្រើប្រាស់គ្រឿងញៀនម្នាក់ទៀតឈ្មោះ នង រិទី្ធ ភេទប្រុស អាយុ៣២ឆ្នាំ ជនជាតិខ្មែរ មុខរបរកម្មករសំណង់ ស្នាក់នៅផ្ទះលេខ៥ តាមបណ្ដោយផ្លូវ៥២២ សង្កាត់បឹងកក់១ ខណ្ឧទួលគោក ដកហូតបានម្សៅក្រាមពណ៌សថា្លចំនួន១កញ្ចប់ទៀត ដើម្បីនាំយកមកឃុំខ្លួនសាកសួចម្លើយនៅអធិការដ្ឋាននគរបាលខណ្ឌ ក្នុងការកសាងសំណុំរឿងចាត់ការតាមនិតិវិធី៕

ប្រភព៖ freshnews