ខេត្តកំពង់ស្ពឺ ៖ មានការភ្ញាក់ផ្អើលមួយបានកើតឡើងបន្ទាប់ពីប្រជាពលរដ្ឋប្រទះឃើញសពបុរសម្នាក់ក្នុងស្ថានភាពធ្វើអត្តឃាត តែអ្វីដែលជាមន្ទិលសង្ស័យនោះគឺជនរងគ្រោះចង.កសម្លាប់ខ្លួនទាំងដៃជាប់ចំណង ហេតុការណ៍ប្រទះឃើញនេះកើតឡើងកាលពីព្រលប់ថ្ងៃទី២០ ខែតុលា ឆ្នាំ២០១៨ នៅចំណុចភូមិមានសិរី ឃុំដំបូករូង ស្រុកភ្នំស្រួច ខេត្តកំពង់ស្ពឺ។
ប្រភពពីនគរបាលស្រុកភ្នំស្រួចឱ្យដឹងថា នៅព្រឹកថ្ងៃទី២១ តុលា ២០១៨នេះ ខាងស្រុកកំពុងរង់ចាំជំនាញកោសល្យវិច័យខេត្តចុះមកពិនិត្យ ហើយជនរងគ្រោះនៅមិនទាន់ដឹង និងស្គាល់អត្តសញ្ញាណនៅឡើយទេ។
ប្រភពបន្តថា ករណីនេះដំបូងឡើយ ត្រូវប្រជាពលរដ្ឋប្រទះឃើញម៉ូតូគុប១គ្រឿងនៅជិតកន្លែងកើតហេតុក៏រាយការណ៍មកសមត្ថកិច្ច លុះក្រោយមកស្រាប់តែសេចក្តីរាយការណ៍មួយទៀតថា ប្រទះឃើញសពចង.កក្នុងរោងចាំចំការមួយនៅជិតនោះដែរ។ ពេលសមត្ថកិច្ចចុះទៅដល់អ្វីដែលជាមន្ទិលសង្ស័យនោះ គឺជនរងគ្រោះស្លាប់របៀបជាការធ្វើអត្តឃាត តែបែរជាដៃទាំង២ជាប់ចំណង (អាវ) ទៅវិញ។ ស្ថានភាពនេះហើយទើបខាងប៉ុស្តិ៍ និងស្រុកបានស្នើសុំគោលការណ៍ឱ្យជំនាញកោសល្យវិច័យខេត្តចុះមកពិនិត្យ និងស្រាវជ្រាវរកមូលហេតុពិតនៃការស្លាប់របស់ជនរងគ្រោះ។
បើតាមមន្ត្រីនគរបាលស្រុក១រូបនិយាយថា ជនរងគ្រោះអាយុប្រមាណជាង៣០ឆ្នាំ មិនមែនជាអ្នករស់នៅតំបន់នេះទេ ដោយឡែកករណីប្រទះឃើញម៉ូតូមិនមានពាក់ព័ន្ធគ្នាដែរ។ ហើយមានការលើកឡើងថា ជនរងគ្រោះអាចត្រូវជនសង្ស័យដៃដល់ណាមួយសម្លាប់ ហើយបង្វែររឿងមកជាករណីអត្តឃាត ដើម្បីបំភ័ន្តភ្នែកសមត្ថកិច្ច និងមហាជន។ សមត្ថកិច្ចក៏សូមអំពាវនាវផងដែរ ដល់បងប្អូនដែលបាត់សមាជិកដូចភិនភាគក្នុងរូបថត ដើម្បីមកទទួលយកទៅធ្វើបុណ្យ។
បើទោះជាមានការលើកឡើងថា ជាករណីឃាតកម្មក្តី ក៏នៅមិនទាន់យកជាការបានដែរ ព្រោះសមត្ថកិច្ចជំនាញមិនទាន់ពិនិត្យ និងចេញរបាយការណ៍ជាក់លាក់នៅឡើយ។ ប៉ុន្តែមានការលើកឡើងទៀតថា បើសិនជារឿងនេះជាករណីឃាតកម្មមែនសុំឱ្យព្រលឹងជនរងគ្រោះជួយបំភ្លឺផ្លូវដល់សមត្ថកិច្ចឈានទៅចាប់ជនដៃដល់ឱ្យបានលឿនផង ដើម្បីប្រគល់ចាត់ការតាមច្បាប់៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]