Pogba យល់យ៉ាងណា ចំពោះលីកកំពូលរបស់អង់គ្លេសក្នុងរដូវកាលនេះ

អង់គ្លេស៖ ខ្សែបម្រើក្លិបបិសាចក្រហម Manchester United កីឡាករ Paul Pogba បានប្រាប់ឲ្យសារព័ត៌មាន Sky Sports ដឹងថា លីកកំពូលរបស់ប្រទេសអង់គ្លេសជាលីកដែលពិបាកស្មានមួយ ហើយកីឡាករទាំងអស់ត្រូវតែមានការប្ដូរផ្ដាច់ខ្លាំងណាស់នៅក្នុងប្រកួតទើបទទួលបានជោគជ័យ។

នៅមុនការប្រកួតនេះមកដល់ Pogba បានបង្ហើបថាគេអាចនឹងទទួលបន្ទុកខ្លាំងជាងមុន ពីព្រោះថាការជួបគ្នាជាមួយក្រុមតោខៀវនៅល្ងាចនេះ ពួកគេត្រូវការ ៣ពិន្ទុជាចាំបាច់ ដើម្បីរំកិលមកឈរនៅក្នុងចំណាត់ថ្នាក់ល្អវិញ ទោះជាក្រុម Chelsea មិនទាន់ស្គាល់រសជាតិថាចាញ់នៅក្នុងរដូវកាលថ្មីនេះក៏ដោយ។

សមាជិកក្រុមជម្រើសជាតិបារាំងរូបនេះបាននិយាយថា៖ «ពួកយើងមិនអាចដឹងថានឹងអ្វីនឹងកើតឡើងនោះទេនៅក្នុងក្របខណ្ឌ Premier League អញ្ចឹងហើយបានធ្វើឲ្យលីកមួយនេះ ជាលីកដែលមានការចាប់អារម្មណ៍ជាងគេនៅលើលោកនេះ។ ដូចជាក្រុមខ្លះដែលត្រូវបានគេនាំមុខ ២-០មុនទៅហើយ តែពួកគេនៅតែអាចវាយបកតាមរហូតបាន ៣-២មកវិញ»។

អតីតខ្សែបម្រើក្លិបសេះបង្កង់ Juventus នេះបាននិយាយបន្ថែមថា៖ «ប្រកួតមិនទាន់ចប់ទេ ដរាបណាមិនទាន់ដល់៩០ នាទី។ ស្ថានភាពប្រកួតអាចផ្លាស់ប្ដូរគ្រប់ពេល ដូចនេះហើយគ្រប់គ្នាមិនត្រូវឈប់ទេ ហើយត្រូវតែផ្ដោតពេញ៩០នាទិតែម្ដង។ នៅក្នុងលីកអង់គ្លេសនេះ គ្រប់គ្នាព្យាយាមឲ្យអស់ពីសមត្ថភាពតាមតួនាទីរៀងៗខ្លួនដើម្បីធ្វើយ៉ាងណាជួយក្រុមឲ្យមានលទ្ធផលល្អ »។

គួរឲ្យដឹងថា ចាប់តាំងពីផ្ទេរមកក្លិបបិសាចក្រហម Manchester United អំឡុងឆ្នាំ ២០១៦ ខ្សែបម្រើ Paul Pogba អាចស៊ុតបញ្ចូលទីបានចំនួន ១៩គ្រាប់ ក្នុងចំណោមការបង្ហាញខ្លួនសរុប ៩៨ប្រកួតឲ្យក្លិបម្ចាស់ជើងលីកកំពូលអង់គ្លេស ២០សម័យកាលនេះ៕