ចិន៖ យោងតាមសារព័ត៌មាន People’s Daily ចិនគ្រោងបង្កើតព្រះចន្ទសិប្បនិម្មិតដើម្បីបំភ្លឺមេឃលើក្រុងមួយ ដែលគេអាចបញ្ជាឱ្យភ្លឺក្នុងរង្វង់ចម្ងាយពី ១០ ទៅ ៨០ គីឡូម៉ែត្រ។
ព្រះចន្ទដែលគេហៅថា “ផ្កាយរណបបំភ្លឺមេឃ” នឹងត្រូវតម្លើងនៅប៉ែកនិរតីនៃក្រុងឆឹងទុ ក្នុងឆ្នាំ ២០២០ ដើម្បីបញ្ចេញពន្លឺស្រទន់ដូចពេលព្រលប់នៅតំបន់នោះ ហើយគេលើកសរសើរថាវាភ្លឺជាងព្រះចន្ទពិតប្រាកដដល់ទៅ ៨ ដងឯណោះ។
មន្ត្រីមួយចំនួនបានបញ្ចេញព័ត៌មានតិចតួចណាស់ទាក់ទងនឹងគម្រោងដ៏ធំខាងលើ ប៉ុន្តែពួកគេបានបញ្ជាក់ថា គំនិតនេះបានយកលំនាំតាមវិចិត្រករបារាំងម្នាក់ ដែលរំលេចខ្សែ-កមួយធ្វើពីកញ្ចក់ ព្យួរលើផែនដី។
បើតាមប្រភពដដែល លោក Wu Chunfend អគ្គនាយកវិទ្យាស្ថានវិទ្យាសាស្រ្តក្នុងលំហ និងបច្ចេកវិទ្យាស្រាវជ្រាវប្រពន្ធ័មីក្រូអេឡិចត្រូនិកប្រចាំក្រុងឆឹងទុ បានបង្ហាញផែនការនេះអំឡុងព្រឹត្តិការណ៍មួយក្នុងក្រុង កាលពីថ្ងៃទី ១០ ខែតុលា។
វានឹងជួយបំពេញបន្ថែមលើព្រះចន្ទដែលមានស្រាប់ ដើម្បីឱ្យមេឃរាត្រីនៃក្រុងឆឹងទុ ភ្លឺជាងមុន និងអាចប្រើជំនួសបង្គោលភ្លើង ឬប្រព័ន្ធបំភ្លឺតាមផ្លូវបាន។
ថ្វីបើស្តាប់ទៅដូចជាមិនអាចទៅរួច ប៉ុន្តែលោក Wu បានបញ្ជាក់ថា បច្ចេកវិទ្យានេះត្រូវបានពិសោធន៍ច្រើនឆ្នាំមកហើយ ដូច្នេះពេលនេះយើងត្រៀមរួចជាស្រេចក្នុងការប្រើប្រាស់។
ទោះយ៉ាងណា ព្រះចន្ទទីពីរនៅក្រុងឆឹងទុ បានប្រឈមនឹងការរិះគន់ពីក្រុមអ្នកមន្ទិលជាច្រើន ព្រមទាំងពលរដ្ឋដែលមានការព្រួយបារម្ភថា ពន្លឺនេះនឹងមានឥទ្ធិពលអវិជ្ជមានដល់បណ្តាសត្វ និងការអង្កេតតារាសាស្ត្រនានា។
យ៉ាងណាមិញ បើយោងតាមលោក Kang Weimin ដែលជានាយកវិទ្យាស្ថានអុបទិក សាលាអវកាស វិទ្យាស្ថានបច្ចេកវិទ្យាហាប៊ីន ពន្លឺនេះនឹងបញ្ចេញក្នុងកម្រិតដូចព្រះចន្ទពេលព្រលប់ប៉ុណ្ណោះ។
គួរបញ្ជាក់ថា នេះមិនមែនជាការប៉ុនប៉ងលើកទីមួយរបស់មនុស្សឡើយ ក្នុងការដំណើរការឧបករណ៍ចំណាំងផ្លាតពន្លឺនៅលើមេឃ ដោយកាលពីអតីតកាល ធ្លាប់មានផែនការមួយចំនួនស្រដៀងគ្នានេះដែរសុទ្ធតែបរាជ័យទាំងអស់៕
តើប្រិយមិត្តយល់យ៉ាងណាដែរ?
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]