ខេត្តព្រៃវែង ៖ បុរសម្នាក់ត្រូវរថយន្តយីឌុបបុក និងកិនបណ្តាលអោយបែកក្បាលធ្លាយខួរ ស្លាប់ភ្លាមៗនៅនឹងកន្លែងកើតហេតុ ខណៈបុរសរងគ្រោះធ្វើអត្តឃាតដោយរត់ចូលរថយន្ត ។
ហេតុការណ៍ដ៏គួរអោយរន្ធត់នេះបានកើតឡើងកាលពីវេលាម៉ោង៦និង១០នាទីព្រឹកថ្ងៃទី១៦តុលា នៅលើកំណាត់ផ្លូវជាតិលេខ៨អា ត្រង់ចំណុចរង្វង់មូលស្វាយអន្ទរ ខាងមុខហាងម៉ែក្មេក ហេងហេង ដែលស្ថិតក្នុងភូមិស្វាយអន្ទរទី1 ឃុំនិងស្រុកស្វាយអន្ទរ ខេត្តព្រៃវែង។
ជនរងគ្រោះដែលស្លាប់ឈ្មោះ ឆាយ ផានិត ភេទប្រុស អាយុ៣០ឆ្នាំ មានទីលំនៅក្នុងភូមិកណ្តាច់ ឃុំចុងអំពិល ស្រុកកញ្ច្រៀច ខេត្តព្រៃវែង។
បើយោងតាមសម្តីរបស់អ្នកស្រុកដែលនិយាយពីមាត់មួយទៅមាត់មួយនៅចំណុចរង្វង់មូលនោះបានឱ្យដឹងថា មុនកើតហេតុ គេឃើញបុរសរងគ្រោះឈរតែម្នាក់ឯងនៅក្បែរចិញ្ចើមថ្នល់ក្នុងសភាពស្ងៀមស្ងាត់ ទឹកមុខក្រៀមក្រំ លុះពេលឃើញរថយន្តមួយគ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខកំពង់ធំ ៣A-០៩៨៨ បើកមកក្បែរ ស្រាប់តែបុរសរងគ្រោះស្ទុះរត់ចូលពីមុខរថយន្ត បណ្តាលអោយរថយន្តបុក និងកិនពីលើចំក្បាលធ្លាយខួរស្លាប់ភ្លាមៗមួយរំពេច ចំណែកអ្នកបើកបររថយន្តក្រោយកើតហេតុភ្លាម ក៏បានចតរថយន្តចោលហើយរត់គេចខ្លួនបាត់។
ចំពោះមូលហេតុដែលបណ្តាលអោយមានគ្រោះថ្នាក់ខាងលើនេះ បើតាមសំដីរបស់អ្នកស្រុកដែលនិយាយតគ្នាពីមាត់មួយទៅមាត់មួយនោះបានអះអាងថា ជនរងគ្រោះរត់ចូលឡានសម្លាប់ខ្លួន ដោយសារតែតូចចិត្ត ព្រោះប្រពន្ធរត់ចោល ទើបគិតខ្លីលែងចង់រស់។
ដោយឡែកខាងសមត្ថកិច្ចមិនទាន់អាចបញ្ជាក់ច្បាស់នៅឡើយទេ ព្រោះនៅជុំវិញកន្លែងកើតហេតុពុំមានសាក្សីណា ហ៊ានអះអាងបញ្ជាក់អោយច្បាស់ ដូច្នេះជំហានដំបូងសមត្ថកិច្ចសន្និដ្ឋានថា បណ្តាលមកពីជនរងគ្រោះដើរឆ្លងថ្នល់ខ្វះការប្រុងប្រយត្ន័ ទើបត្រូវរថយន្តបុកស្លាប់។ តែទទួលស្គាល់ថា រឿងជនរងគ្រោះត្រូវប្រពន្ធរត់ចោលនោះ គឺពិតមែន៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]