អង់គ្លេស៖ ទូកទៅ កំពង់នៅ! ថ្វីបើលោកសាស្ត្រាចារ្យ Stephen Hawking ដ៏ល្បីល្បាញ បានស្លាប់ទៅហើយក្តី ប៉ុន្តែកំពូលអ្នកប្រាជ្ញដែលនៅសល់តែជីវិត និងខួរក្បាលប៉ុណ្ណោះ ដែលអាចដំណើរការបានតាំងពីវ័យ ២១ រហូតដល់ថ្ងៃស្លាប់ក្នុងអាយុ ៧២ ឆ្នាំ បានបន្សល់នូវស្នាដៃធំៗរាប់មិនអស់ ហើយត្រូវបានទទួលស្គាល់ទូទាំងសកលលោកទៀតផង។
អ្វីដែលគួរឱ្យភ្ញាក់ផ្អើលបំផុតនោះគឺ សៀវភៅចុងក្រោយបង្អស់របស់លោកដែលទើបតែត្រូវបានបោះពុម្ពផ្សាយ បានទម្លាយចម្លើយធំៗទាំង១០ ដែលមនុស្សទូទាំងពិភពលោកមានចម្ងល់យូរណាស់មកហើយ តាមរយៈស្នាដៃមួយនេះផងដែរ។
ខាងក្រោមនេះជាសំណួរចម្លើយទាំង១០៖
១. តើក្នុងលោកនេះមានព្រះជាម្ចាស់ដែរឬទេ?
-គ្មានព្រះទេ ហើយក៏គ្មានអ្នកណាដឹកនាំចក្រវាលនេះដែរ។
២. ចុះអ្វីៗគ្រប់យ៉ាងចាប់ផ្តើម/បង្កើតដោយរបៀបណា?
-ដោយសារការរីកមាឌនៃរូបធាតុពីលក្ខខណ្ឌនៃដង់ស៊ីតេ និងសីតុណ្ហភាពខ្ពស់បំផុត (ទ្រឹស្តីប៊ីកប៊ែង)។
៣. តើមានភាវរស់ខួរក្បាលឆ្លាតវៃផ្សេងទៀតដែរឬទេក្នុងសកលលោកនេះ?
-ទម្រង់ផ្សេងៗនៃជីវិតក្រៅភពពិតជាមាន។ ចាំបាច់ត្រូវប្រយ័ត្នប្រយែង កុំឆ្លើយតបដោយគំរោះគំរើយ ប្រសិនបើមនុស្សយើងមិនទាន់អភិវឌ្ឍរីកចម្រើនខ្លាំងលើសនេះ។
៤. តើយើងអាចព្យាករណ៍ទុកមុនអំពីអនាគតបានទេ?
-បានផង អត់ផង។ បើតាមគោលការណ៍ ច្បាប់ធម្មជាតិអនុញ្ញាតឱ្យយើងទស្សន៍ទាយដឹងពីអនាគត ប៉ុន្តែជាក់ស្តែងវាពិបាកខ្លាំងពេកហើយ។
៥. តើមានអ្វីនៅក្នុងប្រហោងខ្មៅក្នុងលំហ (Black-hole)?
-បើធ្លាក់ចូលទៅក្នុងប្រហោងខ្មៅនេះ គឺពិតជាស៊យធំមិនខាន ហើយបើវាជាប្រហោងខ្មៅប្រភេទម៉ាសតារា អ្នកនឹងក្លាយជាមីអ៊ីតាលីបាត់ទៅហើយ មុនទៅដល់ជើងមេឃម្ខាងទៀត។
៦. តើការធ្វើដំណើរឆ្លងសម័យកាលអាចទៅរួចទេ?
-ការធ្វើដំណើរឆ្លងទៅសម័យកាលមុន ជារឿងដែលមិនអាចច្រានចោលបានឡើយ បើយោងតាមការយល់ដឹងរបស់មនុស្សបច្ចុប្បន្ន។
៧. តើមនុស្សអាចនៅរស់បន្តពូជសាសន៍ (មិនសាបសូន្យផុតពូជ) លើផែនដីដែរឬទេ?
-លំដាប់លំដោយនៃពិភពលោកបច្ចុប្បន្នមានអនាគតដ៏ល្អមួយ ប៉ុន្តែវានឹងក្លាយជាពិភពលោកដ៏ខុសគ្នាស្រឡះនៅថ្ងៃក្រោយ។
៨. តើយើងគួរវាតទីទឹកដីលើលំហដែរឬទេ?
-ខ្ញុំរំពឹងក្នុងរយៈពេលមួយរយឆ្នាំទៀត មនុស្សយើងនឹងអាចធ្វើដំណើរទៅគ្រប់ទីកន្លែងក្នុងប្រព័ន្ធព្រះអាទិត្យ។
៩. តើខួរក្បាលសិប្បនិម្មិត (AI) នឹងឆ្លាតជាងមនុស្សដែរឬទេ?
-ខួរក្បាលសិប្បនិម្មិតដ៏មហាឆ្លាតវៃមួយ នឹងពូកែដល់កម្រិតកំពូលខាងសម្រេចគោលដៅ ហើយប្រសិនជាគោលដៅទាំងនោះមិនស្របតាមគោលដៅរបស់មនុស្សទេ នោះយើងនឹងមានបញ្ហាធំហើយ។
១០. តើយើងត្រូវរៀបចំអនាគតដូចម្តេច?
-ចាំថាត្រូវងើយទៅលើមើលទៅផ្កាយជានិច្ច មិនមែនមើលជើងយើងទេ (ប្រហែលចង់សំដៅថា អនាគតត្រូវនៅភពផ្សេង មិនមែននៅផែនដីដែលនៅក្រោមជើងយើងឡើយ)៕
តើប្រិយមិត្តយល់យ៉ាងណាដែរ?
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
