ខេត្តកំពង់ស្ពឺ ៖ បុរសជាបងថ្លៃម្នាក់បានរងរបួសជាទំងន់បន្ទាប់ពីរងនូវការកាប់ប្រហារពីសំណាក់ប្អូនថ្លៃក្នុងវង់ផឹកស៊ីរួចមក ។ ជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យបង្អែកទាំងយប់ផងដែរ ចំណែកជនដៃដល់ក្រោយបង្កបានរត់គេចខ្លួនបាត់ ។
ករណីកាប់ប្រហារបងថ្លៃនេះកើតឡើងកាលពីវេលាម៉ោង០៦និង១៥នាទីយប់ ថ្ងៃទី១១ ខែតុលា ឆ្នាំ២០១៨ នៅចំណុចភូមិអន្លុងសង្កែ ឃុំតាសាល ស្រុកឱរ៉ាល់ ខេត្តកំពង់ស្ពឺ ។ ជនសង្ស័យឈ្មោះ រុន វឿន ភេទប្រុស អាយុ២៣ឆ្នាំ រស់នៅភូមិ-ឃុំកើតហេតុខាងលើ ចំណែកជនរងគ្រោះឈ្មោះ ចក់ ថា ភេទប្រុស អាយុ២៦ឆ្នាំ ត្រូវជាបងថ្លៃរស់នៅផ្ទះជាមួយគ្នា ។
បើតាមប្រភពពីសមត្ថកិច្ចបានអោយដឹងថា មុនពេលកើតហេតុគឺជនសង្ស័យ និងជនរងគ្រោះបានអង្កុយផឹកស្រា.សជាមួយគ្នា លុះពេលផឹកស្រវឹងរៀងៗខ្លួនក៏ទាស់ពាក្យសំដីគ្នារឿងប្អូនថ្លៃមិនខិតខំធ្វើការ ។ ពេលនោះជនសង្ស័យខឹងនឹងបងថ្លៃយ៉ាងខ្លាំងក៏បានធ្វើសកម្មភាពយកពូថៅកាប់ទៅលើបងថ្លៃត្រូវក្បាលមួយពូថៅបណ្តាលអោយរងរបួសជាទំងន់ ។ ក្រោយធ្វើសកម្មភាពរួចជនសង្ស័យបានរត់គេចខ្លួនបាត់ ចំណែកជនរងគ្រោះត្រូវបានក្រុមគ្រួសារបញ្ជូនទៅព្យាបាលរបួសនៅមន្ទីរពេទ្យបង្អែកខេត្តកំពង់ស្ពឺ ។
មន្ត្រីនគរបាលស្រុកឱរ៉ាល់បានអោយដឹងថា ករណីខាងលើកើតឡើងបណ្តាលមកពីផឹកស្រាជាមួយគ្នាស្រវឹងរៀងៗខ្លួនទើបកើតរឿងបែបនេះ ។ បើទោះជាជនសង្ស័យរត់គេចខ្លួនក្តីក៏សមត្ថកិច្ចនឹងស្រាវជ្រាវតាមចាប់ខ្លួនយកមកផ្តន្ទាទោសអោយបាន ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
