រាជធានីភ្នំពេញ ៖ សេចក្តីរាយការណ៍ឱ្យដឹងថា កម្លាំងប្រជាការពារសង្កាត់ប្ញស្សីកែវម្នាក់ ត្រូវបានខ្មាន់កាំភ្លើងបាញ់រះ បណ្តាលឱ្យត្រូចចំជើងស្តាំរងរបួសធ្ងន់ ខណៈពេលកំពុងបំពេញភារកិច្ចដេញបង្ក្រាបក្រុមក្មេងទំនើងដែលកំពុងវ៉ៃកាប់ចាក់គ្នាតាមដងផ្លូវ បង្កឱ្យភ្ញាក់ផ្អើលកាលពីវេលាម៉ោង១២និង៣០នាទីរំលងអធ្រាត្រ ឈានចូលថ្ងៃទី១២ តុលា ស្ថិតនៅត្រង់ចំណុចមុខផ្ទះល្វែងA4 លើផ្លូវបេតុង ភូមិគង្គារផុស សង្កាត់ទួលសង្កែទី២ ខណ្ឌប្ញស្សីកែវ។
តាមប្រភពពីសមត្ថកិច្ចប៉ុស្តិ៍នគរបាលរដ្ឋបាលទួលសង្កែទី២បានប្រាប់ឱ្យដឹងថា នៅមុនពេលកើតហេតុ កម្លាំងពួកគាត់ បានសហការជាមួយកម្លាំងប្រជាការពារសង្កាត់ប្ញស្សីកែវ បានចេញល្បាតពួនស្ទាក់តាមភូមិសាស្ត្រនានាក្នុងមូលដ្ឋាន ដើម្បីទប់ស្កាត់បទល្មើសផ្សេងៗ និងរក្សាសុវត្ថិភាពផងនៅក្នុងមូលដ្ឋាន។
ប្រភពបន្តថា ខណៈកំពុងល្បាតមកដល់ចំណុចជិតរង្វង់មូលកាំកូស៊ីធី ក៏បានប្រទះឃើញក្រុមក្មេងទំនើងមួយក្រុម កំពុងវាយតប់គ្នាតាមដងផ្លូវយ៉ាងអនាធិបតេយ្យ ។ ពេលនោះ កម្លាំងពួកក៏បំរុងចូលទៅអន្តរាគមន៍ តែ ពេលដែលក្រុមក្មេងទំនើងទាំងនោះឃើញសមត្ថកិច្ចភ្លាម ក៏បានឡើងជិះម៉ូតូរត់គេចខ្លួន ។
បន្ទាប់មក កម្លាំងគាត់ក៏បានជិះម៉ូតូប្រដេញតាមពីក្រោយ រហូតទៅដល់ត្រង់ចំណុចកើតហេតុ ក៏បានឃាត់ម៉ូតូក្រុមក្មេងទំនើង និងបំរុងធ្វើការឆែកឆេរ ស្រាប់តែលេចមុខបុរសម្នាក់ស្លៀកពាក់ស៊ីវិល ដោយដៃមានកាន់កាំភ្លើងខ្លី១ដើម ម៉ាក Lock ពណ៌ខ្មៅ បានផ្ទុះអាវុធចំនួនមួយគ្រាប់បណ្តាលឲ្យចំជើងខាងស្តាំប្រជាការពារខាងលើរងរបួសបាក់ឆ្អឹង បង្កឲ្យមានការភ្ញាក់ផ្អើលឡើងយ៉ាងខ្លាំង។
ប្រភពដដែលបន្តថា បន្ទាប់មកខ្មាន់កាំភ្លើង បានស្រែកចោទប្រកាន់មកលើកម្លាំងពួកគាត់ថា «ជាចោរ» វិញ។ ពេលនោះ ទោះបីជាកម្លាំងពួកគាត់បានស្រែកប្រាប់ថា ជាកម្លាំងសមត្ថកិច្ចយ៉ាងណាក្តី ក៏ខ្មាន់កាំភ្លើងរូបនោះ នៅតែបន្តបាញ់ឡើងលើជាច្រើនគ្រាន់ទៀត ។
ភ្លាមៗនោះ កម្លាំងក៏បានយកកាំភ្លើងAK ចូលទៅភ្ជង់គំរាមខ្មាន់កាំភ្លើងនោះ រួចដកហូតកាំភ្លើងខ្លីមួយដើមខាងលើ យករក្សាទុកធ្វើជាវត្ថុតាង ហើយចាប់វាយខ្នោះ។ ចំណែកឯប្រជាការពារដែលរងរបួសខាងលើ ត្រូវបានរថយន្តសង្គ្រោះបន្ទាប់ដឹកយកទៅមន្ទីរពេទ្យកាល់ម៉ែត ដើម្បីជួយសង្គ្រោះផងដែរ។
សមត្ថកិច្ចបានអោយដឹងថា ខ្មាន់កាំភ្លើងខាងលើមា នឈ្មោះ ឡាយ អ៊ីងឃីង ភេទប្រុស អាយុ២៧ឆ្នាំ ជាមន្ត្រីអាវុធហត្ថលើផ្ទៃប្រទេស ។ ក្រោយពេលកើតហេតុ សមត្ថកិច្ចបានរកឃើញសំបកគ្រាប់ចំនួន១០គ្រាប់ហើយបានរើសយកមករក្សាទុក ដើម្បីធ្វើជាភស្តុតាង ។
ចំណែកឯបុរសដែលជាខ្មាន់កាំភ្លើងខាងលើ រួមទាំងវត្ថុតាង ត្រូវបានកម្លាំងសមត្ថកិច្ចឃាត់ខ្លួនយកទៅសាកសួរ និងឃុំខ្លួនបណ្តោះអាសន្ន នៅអធិការដ្ឋាននគរបាលខណ្ឌប្ញស្សីកែវ ដើម្បីចាត់ការតាមច្បាប់ ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
