រាជធានីភ្នំពេញ ៖ លំនៅឋានលេខ១៥០H ផ្លូវលំ ក្រុមទី១៨ ភូមិទួលសង្កែ សង្កាត់ទួលសង្កែ ដែលម្ចាស់ចាក់សោទុកចោលត្រូវក្រុមចោរធ្វើសកម្មភាពគាស់យក ទ្រព្យសម្បត្តិអស់គ្មានសល់ និងបង្កឱ្យមានការភ្ញាក់ផ្អើលកាលពីវេលាម៉ោង៧ព្រឹកថ្ងៃទី១៦ មីនា នៅពេលដែលម្ចាស់ត្រឡប់មកដល់ផ្ទះវិញ។
ម្ចាស់ឈ្មោះតែ វិសុខា ហៅផេង វ៉ាន់ អាយុ៣៤ឆ្នាំ ប្រពន្ធឈ្មោះឯម សុគន្ធារី ។ តាមស្ត្រីឈ្មោះឯម សុគន្ធារី បានឱ្យដឹងថា សម្ភារដែលចោរយកបាននោះរួមមានម៉ូតូម៉ាកស្គូពី ពណ៌សលាយផ្កាឈូក មួយគ្រឿង ទូរទស្សន៍មួយគ្រឿង កងដៃដាំពេជ្រតម្លៃ៣.៧០០ដុល្លារ ចិញ្ចៀនពេជ្រតម្លៃ២.៣០០ដុល្លារ ប្លង់ដី កូនជ្រូកដាក់ប្រាក់សន្សំចំនួន២ មានប្រាក់ប្រមាណជាង១លានរៀល ខ្សែដៃប្លាទីន២ជីកន្លះ និងកេសដាក់សម្ភារមួយដែលសរុបជាទឹកប្រាក់ប្រមាណ១ម៉ឺនដុល្លារ ។ បុរសជាប្តីឈ្មោះតែ វិសុខា អាយុ៣៤ឆ្នាំ បានឱ្យដឹងថា នៅយប់កើតហេតុខ្លួនពុំបាននៅផ្ទះនោះទេ ដោយចាក់សោផ្ទះទុកចោល ព្រោះចេញទៅផឹកស៊ីជាមួយមិត្តភក្តិ ។ លុះនៅវេលាម៉ោង៥ភ្លឺត្រឡប់មកផ្ទះឃើញទ្វារចំហ ហើយសម្ភារ និងម៉ូតូត្រូវចោររើកកាយយកអស់។ ព័ត៌មានពីប្រជាពលរដ្ឋនៅជិតកន្លែងកើតហេតុឱ្យដឹងថា ក្រុមចោរធ្វើសកម្មភាពនៅវេលាម៉ោងប្រមាណ១២យប់ ព្រោះនៅយប់នោះគេបានឮសំឡេងម៉ូតូ និងឮសំឡេងមនុស្ស តែអ្នកជិតខាងពុំចាប់អារម្មណ៍ ស្រាប់តែព្រឹកឡើងក៏មានការភ្ញាក់ផ្អើលតែម្តង ។
ទាក់ទិននឹងចោរគាស់ផ្ទះនេះលោកសោម ប៊ុន្នី អធិការខណ្ឌឫស្សីកែវ ឱ្យដឹងថា ករណីនេះមិនច្បាស់លាស់ទេ សមត្ថកិច្ចកំពុងធ្វើការស្រាវជ្រាវ ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]