រាជធានីភ្នំពេញ ៖ ជនសង្ស័យម្នាក់បានជិះម៉ូតូធ្វើសកម្មភាពឆក់ទូរស័ព្ទដៃពីនិស្សិតស្រីម្នាក់ ពេលនាងកំពុងជិះម៉ូតូធ្វើដំណើរតាមផ្លូវម្នាក់ឯងហើយជិះបណ្ដើរនិយាយទូរស័ព្ទបណ្ដើរ ។ លុះក្រោយពេលឆក់បានសម្រេច ហើយជនសង្ស័យបានព្យាយាមជិះម៉ូតូគេចខ្លួនដែរ ប៉ុន្តែនារីរងគ្រោះបានស្រែកថាចោរៗ ។
ពេលនោះបង្កឲ្យមានការភ្ញាក់ផ្អើល ទើបកម្លាំងសន្តិសុខ សាលាខណ្ឌពោធិ៍សែនជ័យ បានដេញតាមរហូតចាប់ខ្លួនជនសង្ស័យបានតែម្ដង។ ហេតុការណ៍ភ្ញាក់ផ្អើលខាងលើនោះបានកើតឡើង កាលពីវេលាម៉ោង១០និង៣០នាទីព្រឹកថ្ងៃទី៥ ខែតុលា ឆ្នាំ២០១៨ នៅតាមមហាវិថីសហព័ន្ធរុស្ស៊ី ត្រង់ចំណុចដងនង្គ័ល ស្ថិតនៅក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យខាងលើឈ្មោះ ឈឿង ហៃវាសនា អាយុ២៦ឆ្នាំ មុខរបរមិនពិត ស្នាក់នៅក្នុងភូមិថ្នល់បំបែក សង្កាត់ ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។ ដោយឡែកនារីរងគ្រោះ ឃឿន ឆេងលាប អាយុ២០ឆ្នាំ ជានិស្សិត ស្នាក់នៅក្នុងភូមិព្រៃព្រីងខាងជើង សង្កាត់ចោមចៅ៣ ខណ្ឌពោធិ៍សែនជ័យ។ រីឯទូរស័ព្ទដែលជនសង្ស័យឆក់ម៉ាកIPhone 6Plus ហើយត្រូវបានដកហូតប្រគល់ជូនម្ចាស់វិញហើយ ។
តាមប្រភព័ត៌មានបានឲ្យដឹងថា នៅមុនពេលកើតហេតុ និស្សិតស្រីខាងលើបានជិះម៉ូតូ១គ្រឿងធ្វើដំណើរក្នុងទិសដៅពីជើងទៅត្បូង ដោយជិះបណ្ដើរនិងនិយាយទូរស័ព្ទបណ្ដើរ លុះពេលទៅដល់ត្រង់ចំណុចកើតហេតុខាងលើ ស្រាប់តែជនសង្ស័យម្នាក់ជិះម៉ូតូមួយគ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ ភ្នំពេញ ១FY -០៣៣០ ទៅពីក្រោយធ្វើសកម្មភាពឆក់យកទូរស័ព្ទបានសម្រេចរួចបានជិះម៉ូតូគេចខ្លួន។
ប្រភពខាងលើបានបន្តថា ខណៈនោះនារីរងគ្រោះបានស្រែកថាចោរៗ បង្កឲ្យមានការភ្ញាក់ផ្អើលដល់សមត្ថកិច្ចសាលាខណ្ឌពោធិ៍សែនជ័យដែលកំពុងប្រចាំការតាមផ្លូវខាងលើ មានរហស្សនាមស្ទាំងខៀវ៩ ស្ទាំងខៀវ៤៧ និងស្ទាំងខៀវ១៧បាន ជួយអន្តរាគមន៍ដេញតាមរហូតដល់មុខនិងការ៉ាសាំងភីធីធី ស្ថិតនៅតាមផ្លូវជាតិលេខ៤ខាងលិចង្វង់មូលថ្នល់បំបែកចោមចៅទើបចាប់ខ្លួនបានតែម្ដង។
បន្ទាប់មកបានប្រគល់ជូននគរបាលប៉ុស្តិ៍ចោមចៅ៣ដើម្បីសាកសួរនិងកសាងសំណុំរឿងចាត់ការតាមច្បាប់៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]