ខេត្តបន្ទាយមានជ័យ ៖ យ៉ាងហោចណាស់មនុស្សម្នាក់បានស្លាប់ភ្លាមៗនៅនឹងកន្លែងកើតហេតុ និងម្នាក់ទៀតរងរបួសធ្ងន់ក្នុងហេតុការណ៍ក្រឡាប់ត្រាក់ទ័រ ធ្លាក់ពីលើផ្លូវចូលប្រឡាយនៅវេលាម៉ោង៥និង១០នាទីល្ងាចថ្ងៃទី ១៥ មីនា លើផ្លូវក្រួសក្រហមមុខសាលាបឋមសិក្សាចំការគ ស្ថិតក្នុងភូមិចំការគ ឃុំស្វាយចេក ស្រុកស្វាយចេក ខេត្តបន្ទាយមានជ័យ ។
តាមប្រភពព័ត៌មានពីមន្ត្រីនគរបាលស្រុកស្វាយ ចេក បានឱ្យដឹងថា ជនរងគ្រោះឈ្មោះលឿន សីលា ភេទប្រុស អាយុ២៩ឆ្នាំ រស់នៅភូមិខ្វាវលិច ឃុំស្វាយចេក ស្រុកស្វាយចេក ខេត្តបន្ទាយមានជ័យ ជាអ្នកបើកបរត្រាក់ទ័រ បានស្លាប់ភ្លាមៗនៅនឹងកន្លែងកើតហេតុ និងអ្នករួមដំណើរម្នាក់ទៀតឈ្មោះព្រីន ដា ភេទប្រុស អាយុ២២ឆ្នាំ រស់នៅក្នុងភូមិជាមួយគ្នា ជនរងរបួសយ៉ាងធ្ងន់ធ្ងរត្រូវបញ្ជូនទៅព្យាបាលនៅមន្ទីរពេទ្យ ភ្លាមៗផងដែរ ។
ប្រភពព័ត៌មានដដែលបានបន្តថា មុនពេលកើតហេតុជនរងគ្រោះទាំង២នាក់បានជិះត្រាក់ទ័រត្រឡប់មកពី ដឹកដំឡូងមីទៅលក់វិញ ដោយបើកក្នុងល្បឿនលឿន លុះដល់កន្លែងកើតហេតុជាចំណុចផ្លូវកោងយកចង្កូតមិនទាន់ក៏ ជ្រុលធ្លាក់ពីលើផ្លូវចូលក្នុងប្រឡាយ បណ្តាលឱ្យត្រាក់ទ័រក្រឡាប់សង្កត់ស្លាប់ និងរបួសបែបនេះ ។ សពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]