អេស្ប៉ាញ៖ អ្នកគាំទ្រចំនួន ២នាក់ត្រូវបានសែងតាមប្រង់ការ និង២នាក់ផ្សេងទៀតបានរងរបួសស្រាល បន្ទាប់ពីកន្លែងអង្គុយទស្សនានៅក្នុងកីឡដ្ឋានរបស់ក្លិប Eibar បានបាក់ អំឡុងពេលក្លិប Sevilla បានយកឈ្នះ ៣-១ លើក្រុមម្ចាស់ផ្ទះកាលពីយប់ថ្ងៃ សៅរ៍ កន្លងទៅ ។
បើយោងតាមសេចក្តីរាយការណ៍មួយរបស់សារព័ត៌មានអេស្ប៉ាញបានឲ្យដឹងថា របងដែលបានឃាំងមិនឲ្យអ្នកទស្សនាចូលក្នុងទីលានបាន ត្រូវបាក់នៅពេលដែលអ្នកគាំទ្របាននាំគ្នាស្ទុះទៅខាងមុខដើម្បីអបអរគ្រាប់បាល់ទី ២របស់ក្រុម Sevilla ដែលជាគ្រាប់ស៊ុតបាល់ពិន័យ ១១ម៉ែត្របញ្ចូលទីដោយកីឡាករ Ever Banega ក្នុងកីឡដ្ឋាន Ipurua Municipal។
ជាមួយគ្នានេះដែរ ការប្រកួតក៏ត្រូវបានផ្អាកអស់រយៈពេល ៦នាទី ក្រោយរបងដែលបានឃាំងមិនឲ្យអ្នកទស្សនាចូលក្នុងទីលានបានត្រូវបាក់ ខណៈអ្នកគាំទ្រក៏ទទួលបានការពិនិត្យនិងព្យាបាលពីក្រុមគ្រូពេទ្យរបស់ក្រុមម្ចាស់ផ្ទះ ចំណែកកីឡាកររបស់ក្រុម Sevilla ដែលកំពុងតែឈរនៅជិតនោះវិញមិនបានទទួលរងនូវការប៉ះទង្គិចអ្វីបន្តិចឡើយ។
គួរឲ្យដឹងថា នៅក្នុងការប្រកួរវាងក្រុមម្ចាស់ផ្ទះ Eibar ដែលបើកទ្វារកីឡដ្ឋាន Ipurua Municipal ទទួលស្វាគមន៍ក្រុមភ្ញៀវ Sevilla នោះ លទ្ធផលបានបញ្ចប់ទៅដោយក្រុម ភ្ញៀវជាអ្នកយកជ័យជម្នះតាមរយៈការស៊ុតចំនួន ៣គ្រាប់ ដោយខ្សែប្រយុទ្ធ Andre Silva ដែលខ្ចីជើងពីក្លិប AC Milan បានស៊ុតនាំមុខនៅនាទីទី ៤៧, កីឡាករ Ever Banega ស៊ុតគ្រាប់ទី២គ្រាប់ នៅក្នុងនាទីទី ៥៩ និងគ្រាប់ជ័យជម្នះនៅនាទីទី ៩០+៤ ៕
ប្រភព៖ Thesun
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]