ចាប់វាយខ្នោះ វាយទំនើង៤នាក់ ក្រោយបាញ់ប្រហារ រាប់សិបគ្រាប់ នៅតាមផ្លូវ

ភ្នំពេញ៖ ប្រតិបត្តិការពេញ មួយយប់ ដឹកនាំបញ្ជាផ្ទាល់ ពីសំណាក់ លោកឧត្តសេនីយ៍ ផ្កាយ៣ ជួន សុវណ្ណ ស្នងការនគរបាល រាជធានីភ្នំពេញ និងមានការឯកភាព ព្រះរាជអាជ្ញាអមសាលា ដំបូងរាជធានីភ្នំពេញ បានដេញចាប់ ក្រុមក្មេងទំនើងចំនួន៤នាក់ ក្រោយពីពួកគេ បានធ្វើកម្មភាពបាញ់ តាមផ្លូវដោយ ស្ថានភាព ស្រវឹង ខឹងនិងរឿងអ្វីមួយ ធ្វើឲ្យមានការភ្ញាក់ផ្អើល ដល់ប្រជាពលរដ្ឋ ស្ទើតែពេញ រាជធានីភ្នំពេញ ។

ហេតុការណ៍ នៃការបាញ់ប្រហារ ខាងលើនេះ កើតឡើង តាំងពីវេលាម៉ោង ប្រហែលម៉ោង ១១៖៣០នាទី យប់ថ្ងៃទី៤ ខែមករា ឆ្នាំ២០១៣ដោយ បង្កឡើងដោយ ក្រុមក្មេងទំនើងចំនួន៤នាក់ ជិះរថយន្តស៊េរីទំនើប ចំនួន២គ្រឿង ហើយចាប់ផ្តើម បាញ់ប្រហារ នៅរង្វង់មូលវត្តមហាមន្រ្តី ។

ក្រោយពេល សមត្ថកិច្ចបានដឹងថា មានករណីផ្ទុះ អាវុធយ៉ាងនេះ សមត្ថកិច្ចបានដេញ ពីក្រោយ ហើយក្មេងទំនើងទាំងនេះ បានបើកការ បាញ់ប្រហារ នៅវង្វល់មូល នាងគង្ហីង អស់ជាច្រើនគ្រាប់ រួចហើយ ពេលបើករថយន្ត ទៅដល់ មុខភូមិគ្រិះ អគ្គស្នងការនគរបាលជាតិ នាយឧត្តមសេនីយ៍ នេត សាវឿន បានបាញ់ប្រហារថែមទៀត ។

ដោយឃើញស្ថានភាព កាន់តែធ្ងន់ធ្ងរ យ៉ាងដូច្នេះ សមត្ថកិច្ចដែលដឹកនាំដោយ លោកស្នងការ បានបញ្ជាឲ្យបាញ់ បំបែកកង់រថយន្ត ហើយសមត្ថកិច្ចបាន បាញ់ទំម្លុះកញ្ចក់ រូចក៏ត្រូវចំក្មេងទំនើងម្នាក់ បណ្តាលឲ្យរងរបួសធ្ងន់ ត្រូវបានដឹកបញ្ជូន ទៅមន្ទីរពេទ្យភ្លាមៗ។

ហើយសមត្ថកិច្ច បានចាប់ខ្លួន ក្រុមទំនើងចំនួន៣នាក់ ផ្សេងទៀត រួចចាប់វាយខ្នោះ ។ ក្រោយកើតហេតុ សមត្ថកិច្ចបានរកឃើញ កាំភ្លើខ្លីមួយដើម និងសំបកគ្រាប់ ជាច្រើនផ្សេងទៀត។ លោកឧត្តមសេនីយ៍ ជួន សុវណ្ណ បានបញ្ជាក់នៅ កន្លែងកើតហេតុថា ប្រតិបត្តិការនេះ ធ្វើឡើង ដើម្បីបង្ក្រាប ក្មេងទំនើង ដែលអនុវត្តតាមបទបញ្ជា ដ៏ខ្ពង់ខ្ពស់របស់សម្តេចនាយករដ្ឋមន្រ្តី ហ៊ុន សែន ។

ជាមួយគ្នានេះ កាលពីយប់ទៀបភ្លឺ មានករណីផ្ទះអាវុធមួយគ្រាប់ នៅក្នុងសង្កាត់ទឹកថ្លា ខណ្ឌសែនសុខ បណ្តាលឲ្យយុវជន ម្នាក់រងរបួសធ្ងន់ ដោយសារតែមានទំនាស់នៅក្នុងក្លឹបកំសាន្តមួយ។ ជាមួយនឹងការបង្ក្រាប ក្រុមក្មេងទំនើងខាងលើនេះ ដើមអម្ពិលនិងធ្វើ ការផ្សាយ លំអិតបន្ថែមទៀត៕

ផ្តល់សិទ្ធដោយ ដើមអម្ពិល