ភ្នំពេញ៖ បើទោះជាបានក្លាយជាអ្នកជំនួញ និងមានតំណែងជាទីប្រឹក្សាប្រចាំក្រសួងមួយ ប៉ុន្តែតារាចម្រៀងចាស់វស្សា ដែលត្រូវគេស្គាល់ថាជាពិធីករវិទ្យុជាតិផង បានអះអាងថាលោកមិនបោះបង់ការងារសិល្បៈនោះទេ ដោយលោកទើបនឹងធ្វើអ្នកសិល្បៈភាគច្រើនចាប់អារម្មណ៍នឹងការផលិតកម្មកម្សាន្តបន្តផ្ទាល់មួយ ដែលជាកម្មវិធីទទួលបានការគាំទ្រខ្ពស់មួយ នៅលើបណ្ដាញហ្វេសប៊ុកនោះផង។ ក្រៅពីធ្វើឱ្យកម្មវិធីកម្សាន្តមួយនេះ លេចរូបរាងកាន់តែខ្លាំងលោកក៏បានប្រកាសថានឹងបញ្ចេញស្នាដៃឱ្យសកម្មជួយជម្រុញដល់វិស័យសិល្បៈផងដែរ។
លោក កុយ ស៊ីឌឿន ម្ចាស់ផលិតកម្ម ឌី ភី និយាយថា ការផលិតកម្មវិធីកម្សាន្ត ដែលលោកបានផ្សាយបន្តផ្ទាល់លើផេកក្លឹបសិល្បៈ ឌី ភី ដែលមហាជនបានឃើញនៅរៀងរាល់ថ្ងៃអង្គារ និងថ្ងៃព្រហស្បតិ៍ ចាប់ពីម៉ោង ៧ ដល់ម៉ោង ៩ យប់នោះ មិនមែនជាការចំណាយតិចតួចនោះទេ ដោយសារតែលោកបានរៀបចំទម្រង់កម្មវិធីទាំងមូលឱ្យមានលក្ខណៈមិនខុសពីកម្មវិធីរបស់ទូរទស្សន៍មួយ ក្នុងបំណងឱ្យតារាសិល្បៈចាស់ក្មេងប៉ះគ្នា។
លោកថាកម្មវិធីកម្សាន្តមួយនេះ លោកតែងអញ្ជើញតារាសិល្បៈល្បីៗ ទាំងផ្នែកយុវវ័យ និងតារាជើងចាស់មួយរូបឱ្យផ្ដល់កិច្ចសម្ភាសន៍ជុំគ្នា ដោយមិនប្រកាន់ថាជាតារាសម្ដែង តារាចម្រៀង ឬតារាកំប្លែងនោះឡើយ ដោយក្រៅពីបង្ហាញសមត្ថភាពសិល្បៈក៏ផ្ដល់បទពិសោធន៍ឱ្យគ្នាទៅវិញទៅមក។
បំណងទាំងមូលរបស់កម្មវិធី លោកថាចង់គាស់កកាយតារាមួយចំនួន ដែលមហាជនចង់ភ្លេចមុខអោយមានឱកាសបង្ហាញស្នាដៃជាថ្មី ជាពិសេសគឺបានបញ្ចេញសម្លេង និងរូបពិតឱ្យមហាជនបានឃើញ។ ក្នុងនោះលោកថាកម្មវិធី មិនផ្ដោតតែលើការច្រៀងរាំ និងការបង្ហាញសមត្ថភាពរបស់សិល្បករនោះទេ ប៉ុន្តែក៏ផ្ដោតជាសំខាន់លើសំនួរឈ្នះរង្វាន់ ដែលសំនួរទាំងនោះសុទ្ធតែពាក់ព័ន្ធពីវប្បធម៌ និងច្បាប់ចរាចរណ៍ និងពីចំណេះដឹងប្រចាំថ្ងៃ ដែលមនុស្សមើលរំលង។
លោក កុយ ស៊ីឌឿន បញ្ជាក់ថាអ្វីដែលលោកបានធ្វើ គឺដោយសារតែចង់រួមចំណែកជួយឱ្យសកម្មភាពសិល្បករមានការផុសផុស ជាពិសេសគឺបានរួមចំណែកជួយឱ្យកេរ្តិ៍ឈ្មោះរបស់តារាសិល្បៈមួយចំនួនអណ្ដែតឡើងឱ្យកាន់តែប្រសើរ អ៊ីចឹងហើយទើបលោកប្រកាសចំណាយផលិតកម្មវិធីទាំងមូល ដោយមិនខ្វល់ពីការខាតបង់។
លោកគម្រោងនឹងធ្វើកម្មវិធីមួយចំនួនផ្សេងទៀត ដែលអាចជម្រុញឱ្យមានការឈានឡើងក្នុងនាមជាអ្នកសិល្បៈមួយរូប ដើម្បីបង្ហាញថាបើទោះជាលោកបានក្លាយជាអ្វី ក៏លោកនៅតែជាអ្នកសិល្បៈ។
យ៉ាងណាមិញ លោកថាកម្មវិធីបន្តផ្ទាល់ ដែលលោកបានផលិតរៀងរាល់ថ្ងៃអង្គារ និងថ្ងៃព្រហស្បតិ៍នោះ នឹងកាត់នៅថ្ងៃអង្គារចោល ចាប់ពីរដូវប្រាំងតទៅ ដោយសារតែក្នុងពេលនោះលោកក៏រវល់ ហើយតារាសិល្បៈល្បីៗភាគច្រើនក៏មិនងាយអញ្ជើញ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
