អង់គ្លេស៖ ខ្សែការពារក្រុមហង្សក្រហម Liverpool កីឡាករ Virgil van Dijk បានបង្ហើបថាគេបានដាក់គោលដៅមួយយ៉ាង សំខាន់គឺធ្វើយ៉ាងណាជួយក្រុមឲ្យឈ្នះគ្រប់ពានរង្វាន់ទាំងអស់ដែលពួកគេបានចូលលេងនៅក្នុងរដូវកាល ២០១៨-២០១៩នេះ។
ស្របពេលដែល រដូវកាលថ្មី ២០១៨-១៩នេះបានចាប់ផ្ដើម គេសង្កេតឃើញថាក្លិបហង្សក្រហម Liverpool ធ្វើបានយ៉ាងល្អពោលគឺនៅក្នុងក្របខណ្ឌ ដោយឆ្លងកាត់ ៥ប្រកួតកន្លងទៅពួកគេមិនទាន់ស្គាល់ពាក្យថាចាញ់នៅឡើយនោះទេ ខណៈនៅក្របខណ្ឌ UEFA Champions League វិញពួកគេទើបតែយកឈ្នះក្រុមខ្លាំង PSG នៅក្នុងលទ្ធផល ៣-២ ផងដែរកាលពីប៉ុន្មានថៃ្ងមុននេះ។
ជាមួយនឹងទម្រង់លេងដ៏ល្អបូករួមទាំងការចេះសហការគ្នានៅក្នុងទីលានប្រកួតផងនោះ បានធ្វើឲ្យខ្សែការពាររបស់ក្រុមជម្រើសជាតិហូឡង់មានក្ដីរំពឹងខ្ពស់ថាក្រុមរបស់គេនឹងអាចឈ្នះពានជាច្រើនដែលពួកគេកំពុងលេងជាក់ជាមិនខាន។
ខ្សែការពារថ្លៃបំផុតនៅក្នុងពិភពលោកនេះ បាននិយាយថា៖ «នេះជាពេលដ៏ល្អមួយសម្រាប់ក្រុម Liverpool ក្នុងការឈ្នះពានរង្វាន់ជាច្រើនដែលយើងកំពុងតែធ្វើការប្រកួត។ យើងត្រូវតែមានមហិច្ឆតាដើម្បីឈ្នះជានិច្ច ហើយយើងតែងតែព្យាយាមហើយព្យាយាមទៀត ដើម្បីឱ្យឆ្នាំនេះជាឆ្នាំមួយដ៏ជោគជ័យរបស់ពួកយើង។ បើអាចទៅរួច ពួកយើងពិតចង់ឈ្នះពានរង្វាន់ទាំងអស់ដែលយើងបានលេង»។
សូមបញ្ជាក់ថា ខ្សែការពារ Virgil van Dijk គឺជាខ្សែការពារដែលមានតម្លៃថ្លៃជាងគេនៅក្នុងពិភពបាល់ទាត់នាពេលបច្ចុប្បន្ននេះ ក្រោយពីគេបានសម្រេចផ្លាស់ពីក្រុម Southampton ដើម្បីមកចូលរួមជាមួយក្រុមហង្សក្រហម Liverpool កាលពីដើមឆ្នាំកន្លងទៅជាមួយនឹងតម្លៃ ៧៥លានផោន៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]