រាជធានីភ្នំពេញ៖ តារាកំប្លែងលោកជួង ជី ហៅនាយកុយ បានអំពាវនាវរកនាងឃ្មឹប ឲ្យចូលរួមសម្តែងរួមក្រុមជាមួយនាយជាថ្មីឡើងវិញបន្ទាប់ពីមួយរយៈមកនេះនាយបានផ្តាច់ការទាក់ទងជាមួយកូនក្រុម ព្រោះតែការអាក់ខានសម្តែង។ ការប្រកាសស្វែងរកកូនក្រុមរបស់នាយកុយ ធ្វើឡើងបន្ទាប់ពីក្រុមកំប្លែងរបស់នាយទទួលសញ្ញាឲ្យចូលសម្តែងឡើងវិញនៅក្នុងកម្មវិធី«មន្តស្នេហ៍សំនៀង»របស់ស្ថានីយទូរទស្សន៍CTN។
តាមរយៈវីដេអូឃ្លីបដែលបានបង្ហោះតាមហ្វេសប៊ុកនាពេល ថ្មីៗនេះតារាកំប្លែងនាយកុយ និយាយថា ដោយសារតែពេលនេះលោកត្រូវបានអនុញ្ញាតឲ្យសម្តែងកំប្លែងជាថ្មីឡើងវិញនៅក្នុងកម្មវិធីមន្តស្នេហ៍សំនៀង ដូច្នេះនាយអំនាវដល់កូនក្រុមឲ្យត្រៀមខ្លួនក្នុងការសម្តែងនេះ ។ ជាពិសេសនាងឃ្មឹប ឲ្យចូលរួមសម្តែងជាមួយនាយជាថ្មីឡើងវិញដែរ ខណៈពេលតារាកំប្លែងរូបនេះមានបញ្ហាជីវភាពយ៉ាប់យ៉ឺន ។
បើតាមនាយកុយ ក្រុមកំប្លែងរបស់នាយនឹងសម្តែងនៅក្នុងកម្មវិធី«មន្តស្នេហ៍សំនៀង» ដែលជាកម្មវិធីធ្លាប់សម្តែងពីមុន ចាប់ពីថ្ងៃទី១៥ ខែកញ្ញា តទៅ បន្ទាប់ពីកម្មវិធីបិទមួយរយៈកន្លងមក ។ ការសម្តែងឡើងវិញនេះគឺនាយនៅរក្សាកូនក្រុមដដែល ក្នុងនោះនាងឃ្មឹប ក៏កោះហៅឲ្យចូលសម្តែងផងដែរ ប៉ុន្តែរហូតមកដល់ពេលនេះនាយនៅមិនទាន់អាចទាក់ទងនាងបាននៅឡើយទេ ។
នាយកុយ និយាយសម្តៅនាងឃ្មឹបថា«ទូរស័ព្ទដែលនាងធ្លាប់ប្រើពីមុននោះមិនអាចទាក់ទងបានទេ អ៊ីចឹងនៅពេលដែលនាងបានឃើញវីដេអូដែលខ្ញុំបានបង្ហោះនេះហើយ អាចទាក់ទងមកដើម្បីបានសម្តែងឡើងវិញ»។
នាយកុយ អះអាងបន្ថែមថា ដ្បិតការសម្តែងនៅលើឆាកនេះបានកម្រៃតិចតួចមែន ប៉ុន្តែវាជាការរួមចំណែកក្នុងការតោងឈោងទៅកាន់ការសម្តែងនៅទីកន្លែង ផ្សេងៗដែលទទួលបានកម្រៃខ្ពស់ ហើយការអំពាវនាវឲ្យចូលសម្តែងជាថ្មីរបស់នាយនាពេលនេះក៏ជាការជួយដល់អ្នកសិល្បៈដូចគ្នាផងដែរ ។
តារាកំប្លែងនាយកុយ បានសម្តែងការត្រេកអរយ៉ាងខ្លាំង ក្នុងពេលដែលអគ្គនាយកCTN បានផ្តល់ឱកាសឲ្យក្រុមកំប្លែងរបស់លោកបានចូលសម្តែងជាថ្មី ព្រោះសិល្បៈនេះមិនទាន់មានការអន់ថយប្រជាប្រិយភាពពីប្រិយមិត្តអ្នកទស្សនានៅឡើយ ។
កម្មវិធី«មន្តស្នេហ៍សំនៀង»បានផ្អាកដំណើរការប្រមាណជាងមួយឆ្នាំមកហើយ បន្ទាប់ពីបានដំណើរការអស់ជាច្រើនឆ្នាំ ។ ការបិទកម្មវិធីនេះធ្វើឲ្យនាយកុយ សម្តែងក្តីបារម្ភយ៉ាងខ្លាំង ក្នុងពេលដែលកម្មវិធីកំប្លែងរបស់លោកកាន់តែ ខ្សត់ទៅៗនៅតាមបណ្តាស្ថានីយទូរទស្សន៍នានា ។
បន្ទាប់ពីមិនសូវមានកម្មវិធីកំប្លែងតាមបណ្តាស្ថានីយទូរទស្សន៍ ផ្សេងៗនោះនាយកុយ បានងាកទៅសម្តែងល្ខោនបាសាក់ និងសម្តែងកម្មវិធីកាត់សក់មង្គលការ ។ ចំណែកកូនក្រុមរបស់នាយកុយដូចជានាយហុងដា នាយក្រិន នាងប្រិមប្រិយ នាងគ្រត បានបន្តការសម្តែងឈុតកំប្លែងៗខ្លីនៅស្ថានីយទូរទស្សន៍អាស៊ីអាគ្នេយ៍ជាបន្តបន្ទាប់ ខុសពីនាយចេក មិនបានសម្តែងក្រៅពីការបើកលក់ភេសជ្ជៈបន្តិចបន្តួចនៅតាមដងផ្លូវ ។ ដោយឡែកនាងឃ្មឹប បាត់មុខ បាត់ដំឈឹងតែម្តង ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]