ខ្លាំងបាត់! Ronaldo ស្នើសុំ Juventus ឲ្យបន្ថែមអង្គរក្ស ៣នាក់ទៀត

អុីតាលី៖ ខ្សែប្រយុទ្ធឆ្នើម Cristiano Ronaldo បានធ្វើស្នើសុំទៅកាន់ក្លិប Juventus ដើម្បីឲ្យបន្ថែមនូវអង្គរក្សការពារចំនួន ៣នាក់ទៀត ក្រោយពីអ្នកគាំទ្រជាច្រើនបាននាំគ្នាសម្រុកចូលទីលានកាលពីប្រកួតលើកមុន ណាមួយគេក៏ចង់ការពារសុវត្ថិភាពគ្រួសាររបស់គេផងដែរ។

អតីតខ្សែប្រយុទ្ធឆ្នើមរបស់ក្លិបអធិរាជស Real Madrid នេះតែងតែត្រូវបានអ្នកគាំទ្រជាច្រើននាក់ចោមរោមឡើងជិតតែម្តង អំឡុងពេលកីឡាកររូបនេះមកដល់ទីក្រុង Turin ដំបូងចាប់តាំងពីផ្លាស់ពីក្រុមម្ចាស់ជើងឯកក្របខណ្ឌ La Liga ចំនួន ៣៣សម័យកាលមក។

បើតាមការឲ្យដឹងរបស់សារព័ត៌មានក្នុងប្រទេសអុីតាលីមួយបានឲ្យដឹងថា ខ្សែប្រយុទ្ធវ័យ ៣៣ឆ្នាំនេះបានសុំអង្គរក្សផ្ទាល់ខ្លួនចំនួន ៣នាក់ថែមទៀតពីក្រុម Juventus ដើម្បីការពារសុវត្ថិភាពរបស់គេក៏ដូចជាគ្រួសារដែលទើបផ្លាស់មករស់នៅក្នុងប្រទេសអ៊ីតាលីថ្មីផងនោះ។

គួរឲ្យដឹងថា ចំនួនអ្នកទស្សនាផ្ទាល់នៅក្នុងការប្រកួតរបស់ក្លិប Juventus ប៉ុន្មានប្រកួតចុងក្រោយនេះស្រាប់តែមានការកើនឡើងគួរឲ្យកត់សំគាល់ បន្ទាប់ពីក្រុមការពារដំណែងជើងឯកក្របខណ្ឌ Serie A ឆ្នាំមុននេះទិញបានម្ចាស់ពានរង្វាន់ Ballon d'Or ចំនួន ៥សម័យពីក្លិប Real Madrid។

តែយ៉ាងណា ៣ប្រកួតកន្លងទៅឲ្យក្លិប Juventus កីឡាករ Cristiano Ronaldo នៅមិនទាន់រកបានមួយគ្រាប់នៅឡើយទេ៕