មួយម៉ាត់នេះរបស់ Marceclo អាចធ្វើឲ្យអ្នកគាំទ្រក្លិប Real ស្ងប់ចិត្ដ

អេស្ប៉ាញ៖ ខ្សែការពារ Marcelo បាននិយាយថា គេនឹងបន្តលេងនៅឲ្យក្លិប Real Madrid រហូតដល់ទីបញ្ចប់។

ខ្សែការពារឆ្វេងរបស់ក្រុមជម្រើសជាតិប្រេស៊ីលរូបនេះ បាននិយាយទៅកាន់ទូរទស្សន៍របស់ក្លិប Real Madrid បែបនេះថា៖ «ខ្ញុំមានអារម្មណ៏ថាសប្បាយចិត្តចំពោះទីនេះ។ ក្លិប Real Madrid ប្រៀបដូចជាផ្ទះរបស់ខ្ញុំអញ្ចឹង ហើយកុងត្រារបស់ខ្ញុំក៏នៅសល់ពេលជាច្រើនឆ្នាំទៀតដែរ ប៉ុន្តែវាជារឿងល្អមួយដែលខ្ញុំត្រូវនិយាយឲ្យច្បាស់ដើម្បីកុំឲ្យគ្រប់គ្នាយល់ច្រលំទៀត ព្រោះកន្លងមកមានពាក្យចចាមអារ៉ាមជាច្រើនអំពី។ ខ្ញុំតែងតែប្រឹងប្រែងប្រកួតអស់ពីអ្វីដែលខ្ញុំមានដើម្បីក្លិបមួយនេះ»។

អតីតខ្សែការពារក្លិប Fluminense នេះបាននិយាយបន្ថែមទៀតថា៖ «ខ្ញុំនៅតែមានចិត្តចង់ឈ្នះដូចកាលដែលខ្ញុំមកលេងនៅទីនេះពេលខ្ញុំអាយុ ១៨ឆ្នាំអញ្ចឹងដែរ។ ខ្ញុំនឹងស្នាក់នៅទីនេះរហូតដល់ទីបញ្ចប់»។

គួរឲ្យដឹងថា ខ្សែការពារ Marcelo បានផ្លាស់មកចូលរួមជាមួយក្លិប Real Madrid តាំងពីឆ្នាំ២០០៧ ដោយក្នុងនោះរូបគេបានបង្ហាញខ្លួនឲ្យក្លិបនេះបានចំនួន ៤៥៦ប្រកួត និងស៊ុតចូល ៣៣គ្រាប់៕