រាជធានីភ្នំពេញ ៖ អ្នកលក់កសែត និងអ្នកលក់ផ្កានៅតាមដងផ្លូវធំនានាក្នុងមូលដ្ឋានខណ្ឌទួលគោក ត្រូវអាជ្ញាធរខណ្ឌទួលគោក ចុះទៅចាប់ប្រមូលយកទៅកាន់សាលាខណ្ឌកាលពីព្រឹកថ្ងៃទី១៥ មីនា ២០១២ ដោយចោទប្រកាន់ថា ការចែកចាយកាសែតបានធ្វើឱ្យបាត់បង់សណ្តាប់ធ្នាប់សាធារណៈ ។ អ្នកលក់ផ្កា និងកាសែតចំនួន១០នាក់ ក្នុងនោះមានប្រុស៣នាក់ និងស្រី៧នាក់ រួមទាំងកាសែតរាប់រយច្បាប់ និងផ្កាមួយចំនួនត្រូវបានប្រមូលទុក ។
តាមមន្ត្រីសណ្តាប់ធ្នាប់ខណ្ឌដូនពេញ បានឱ្យដឹងថា ការចុះឃាត់អ្នកលក់កាសែត និងលក់ផ្កាធ្វើឡើងកាលពីវេលាម៉ោង៧ទៅ៨ព្រឹកនៅចំណុចភ្លើងស្តុបសន្ធរមុក ស្តុបទួលគោក ស្តុបដេអិន ស្តុបអាងទឹក អូឡាំពិក និងស្តុបចេនឡា ក្នុងគោលបំណងរៀបចំសណ្តាប់ធ្នាប់នៅតាមដងផ្លូវក្នុងឱកាសកិច្ចប្រជុំកំពូលអាស៊ាន ។ មន្ត្រីរូបនោះបន្តទៀតថា ការចុះប្រមូលអ្នកលក់កាសែតនេះធ្វើទៅតាមបទបញ្ជាលោកកែប ជុតិមា អភិបាលរាជធានីភ្នំពេញ ។
ទោះបីជាយ៉ាងណាគេនិយាយថា គឺជាការធ្វើបាបអ្នកលក់កាសែតដែលអាជ្ញាធរចាប់យកទាំងកាសែតទៅទុកចោលបែបនេះ វាហាក់ដូចជាវាយបំបែកឆ្នាំងបាយរបស់ពួកគាត់ ឬក្មេងៗ, កាត់ផ្តាច់ពោះវៀន, កាត់ផ្តាច់ក្រពះ ឬបង្អត់អាហារគ្នាយ៉ាងដូច្នោះដែរ ព្រោះគ្នាលក់ផ្កា លក់កាសែតយកលុយទៅឱ្យឪពុកម្តាយ ដើម្បីទិញអង្ករច្រកឆ្នាំង ទិញបន្លែ ត្រី សាច់ធ្វើម្ហូប ឬទិញបាយហូបតែប៉ុណ្ណោះ ចុះឥឡូវគេចាប់ទាំងកាសែត និងដេញមិនឱ្យលក់តាមផ្លូវ តើគ្នាបានអ្វីហូបទៀត? សូមឱ្យលោកអភិបាលក្រុងមេត្តាអាណិតអ្នកក្រីក្រប្រកបរបរសុចរិតផង ។ គេនិយាយថា គួរអាជ្ញាធរធ្វើការណែនាំអប់រំ ឬបើកច្រកណាមួយឱ្យគ្នាបានរស់ផងប្រសើរជាង។ បើនិយាយពីសណ្តាប់ធ្នាប់វិញ ទៅមើលចុះនៅតាមដងណាក៏បានដែរ គឺសុទ្ធតែមានដាក់តុ ទូ អីវ៉ាន់ស្ទើរតែគ្រប់ប្រភេទលក់ដូរហៀរដល់ចិញ្ចើមផ្លូវ ម៉េចមិនព្រមទៅដេញបោសសម្អាតឱ្យអស់ទៅ បើថា មិនដឹងកន្លែង ឬមើលមិនឃើញមករកកោះសន្តិភាពចុះ យើងនឹងទៅចង្អុលប្រាប់ ។
មន្ត្រីសណ្តាប់ធ្នាប់រូបនោះបន្តទៀតថា តាមគោលការណ៍សាលាខណ្ឌឃាត់ខ្លួនអ្នកលក់កាសែត និងផ្កាទាំងនោះមកធ្វើកិច្ចសន្យាអបរំរួចហើយឱ្យត្រឡប់ទៅវិញ ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
សូមប្រិយមិត្តជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
