ការងារទាំងនេះសុទ្ធតែប្រឈមមុខនឹងគ្រោះថ្នាក់ខ្លាំងបំផុត! បើសំណាងមិនស្លាប់ក៏របួស ឬពិការដែរ តែនៅតែមានអ្នកធ្វើដដែល!

ក្រោយពីបានបញ្ចប់ការសិក្សា មនុស្សគ្រប់ៗរូបសុទ្ធតែត្រូវមានការងាររៀងៗខ្លួន ដើម្បីចិញ្ចឹមជីវិតដូចៗគ្នា ប៉ុន្តែមិនមែនការងារទាំងអស់សុទ្ធតែងាយស្រួលធ្វើនោះទេ អាស្រ័យទៅតាមមុខជំនាញ និងទេពកោសល្យរៀងៗខ្លួន។ ឯការងារខ្លះមិនត្រឹមតែពិបាកទេ ថែមទាំងអាចប្រឈមមុខនឹងគ្រោះថ្នាក់ជាយថាហេតុដែលមើលមិនឃើញផងដែរ តែនៅតែមានអ្នកពេញចិត្តធ្វើដោយការស្រលាញ់ និងចំណង់ចំណូលចិត្តជាដើម។

ក្នុងចំណោមការងារជាច្រើន យើងបានរកឃើញថាមានការងារទាំង ១០ប្រភេទដែលមានហានិភ័យគ្រោះថ្នាក់ខ្លាំងជាងគេបំផុតដូចជា៖

១.ជាងធ្វើដំបូល

មិនថាតែជាងធ្វើដំបូល ឬជាងធ្វើផ្ទះទេ សុទ្ធតែប្រឈមមុខនឹងគ្រោះថ្នាក់នៅក្នុងការងារ ដូចជាការធ្លាក់ចុះពីលើទីទួលខ្ពស់ជាដើម ដែលពេលខ្លះអាចរងគ្រោះថ្នាក់ធ្ងន់ធ្ងរ ឬប៉ះពាល់ដល់អាយុជីវិតផងក៏មានបើសិនជាមិនមានការប្រុងប្រយ័ត្នខ្ពស់ទេនោះ។ ហើយការធ្វើការក្រោមកម្តៅថ្ងៃយូរអាចបង្កឱ្យកើតមានអាការក្តៅក្នុង (heat stroke ជំងឺដែលស្ថិតក្រោមកម្តៅថ្ងៃយូរ) ជំងឺឡើងសម្ពាធឈាម និងជំងឺបេះដូងជាដើម។

២.ប៉ូលិសចរាចរ

បើទោះបីជាមានភ្លើងចរាចរណ៍ ឬបច្ចេកទេសនៅលើដងវិថីខ្ពស់យ៉ាងណាក៏ដោយ តែប៉ូលិសចរាចរនៅតែជាតួនាទីដ៏សំខាន់សម្រាប់សម្រួលការធ្វើដំណើរទាំងទៅទាំងមក។ ដូចដែលអ្នកបានដឹងរួចមកហើយថា បច្ចុប្បន្នអ្នកបើកបរយានយន្តគ្រប់ប្រភេទមួយចំនួនខ្វះខាតចំណេះដឹង រួមទាំងមានការធ្វេសប្រហែសនៅក្នុងការធ្វើដំណើរផងដែរ ដែលជាហេតុធ្វើឱ្យគ្រោះថ្នាក់ចរាចរណ៍បានប្រែក្លាយទៅជាអ្នកដែលផ្តាច់អាយុជីវិតមនុស្សស្ទើរតែជារៀងរាល់ថ្ងៃ។ នៅក្នុងនោះដែរប៉ូលិសចរាចរដែលស្ថិតនៅកៀកនឹងដងផ្លូវ ឬនៅលើផ្លូវផ្ទាល់តែម្តង ងាយនឹងអាចកើតមានគ្រោះថ្នាក់ដោយយានយន្តបុកណាស់ ដែលអាចបង្កឱ្យមានរបួសស្រាល និងធ្ងន់ ឬជួនកាលដល់បាត់បង់ជីវិតក៏មាន។

៣.មន្ត្រីប៉ូលិស

មិនថាតែការចាប់ចោរ /ឧក្រិដ្ឋជន ធ្វើជាប៉ូលីសម្ងាត់ អ្នកស៊ើបអង្កេត ឬការពារសន្តិសុខប្រទេសជាតិនោះទេ ការងារដែលទាក់ទងនឹងមន្ត្រីប៉ូលីសពិតជាមិនងាយស្រួលដូចជាអ្នកគិតឡើយ។ នៅក្នុងការងារជាប៉ូលីសសុទ្ធតែអាចរងរបួស ឬមានគ្រោះថ្នាក់យ៉ាងងាយ ដោយសារតែអំពើជនទុច្ចរិតអស់ទាំងនោះ ដែលពេលខ្លះអាចស្លាប់បាត់បង់ទៀតផង។

៤.អ្នកពន្លត់អគ្គិភ័យ

ការងារជាអ្នកពន្លត់អគ្គិភ័យគ្មានថ្ងៃសម្រាក ឬមានពាក្យថាយឺតយ៉ាវនោះទេ ព្រោះតែអាយុជីវិត និងទ្រព្យសម្បត្តិរបស់ប្រជាជននៅក្នុងប្រទេសដែលពួកគេរស់នៅពិតជាសំខាន់ខ្លាំងណាស់។ ជាអ្នកពន្លត់អគ្គិភ័យពិតជាការងារដ៏មមាញឹក ហើយមានការទទួលខុសត្រូវនៅក្នុងការងារខ្ពស់ ដែលភាគច្រើនថែមទាំងអាចទទួលគ្រោះថ្នាក់នៅក្នុងការងារទៀតផង។ គ្រោះថ្នាក់ទាំងនោះអាចបណ្តាលមកពីការពុល ឬឈ្លក់ផ្សែងភ្លើង ខ្វះខ្យល់អុកស៊ីហ្សែន និងអាចបង្កមកពីការបាក់រំលំបំណែកអគារ លំនៅដ្ឋាន ឬរបស់របរគ្រោះថ្នាក់ជាដើម។ បើមិនរបួសស្រាលទេ ក៏ធ្ងន់ធ្ងរដែរ ដែលពេលខ្លះថែមទាំងអាចរងរបួសរាងកាយ ឬដល់បាត់បង់ជីវិតក៏មាន។

៥.ជាងត.បណ្តាញភ្លើង ឬមន្ត្រីអគ្គិសនី

ធ្វើជាមន្ត្រីអគ្គិសនី ឬអ្នកត.បណ្តាញភ្លើងពិតជាគ្រោះថ្នាក់បើទោះបីជាមានឧបករណ៍ការពារខ្លួនយ៉ាងណាក៏ដោយ។ អ្នកអាចស្រមៃមើលថា តើវាអាចប្រឈមមុខនឹងគ្រោះថ្នាក់ខ្លាំងប៉ុណ្ណាជាមួយនឹងអគ្គិសនីដែលមានតុងស្យុងខ្ពស់ៗនោះ? ដូច្នេះធ្វើការងារនេះអាចមានគ្រោះថ្នាក់នឹងការឆក់ខ្សែភ្លើងខ្ពស់បំផុត បើមិនរងរបួសទេ ក៏អាចបាត់បង់ជីវិតក៏មាន។

៦. កម្មករជីករ៉ែ

កម្មករ ឬអ្នកដែលធ្វើការជីករ៉ែ ត្បូង ឬមាសនៅក្រោមដី មិនថាតែការហូបចុក ស្នាក់នៅសុទ្ធតែអាស្រ័យក្នុងរូងជ្រៅៗជានិច្ច។ ការងារទាំងនេះពិតជាប្រឈមមុខនឹងគ្រោះថ្នាក់ខ្លាំងណាស់ ជាពិសេសគឺការបាក់រលំដី ការបំផ្ទុះគ្រាប់ខុសបច្ចេកទេស និងបញ្ហាកង្វះខ្យល់អុកស៊ីហ្សែនសម្រាប់ដកដង្ហើមជាដើម។

៧.កសិដ្ឋាន ឬអ្នកគង្វាលសត្វ

មិនថាជាកសិករ អ្នកធ្វើកសិដ្ឋានចិញ្ចឹមសត្វ និងអ្នកឃ្វាលសត្វនោះទេ អ្នកអាចគិតថាវាគ្មានបញ្ហាអ្វីធំដុំ តែការពិតខុសស្រឡះតែម្តង។ សត្វគ្មានវិចារណញ្ញាណទេ ហើយពេលខ្លះវាមិនចេះស្តាប់បង្គាប់មនុស្សឡើយ ទោះបីជាម្ចាស់ដែលចិញ្ចឹមវាក៏ដោយ។ ពេលខ្លះយើងមើលមិនឃើញទេ ថាវាកើតអ្វី ឬមានបញ្ហាអ្វី សត្វចិញ្ចឹមទាំងនោះអាចបង្កជាទុក្ខទោសបាន ដោយមានមនុស្សមិនតិចនាក់ទេរងគ្រោះព្រោះការវាយប្រហាររបស់សត្វចិញ្ចឹមរបស់ខ្លួនដូចជា សេះ និងគោជាដើម។

៨. អ្នកបរបាញ់ (ព្រានព្រៃ ឬ អ្នកប្រមាញ់)

មិនថាជាអ្នកជំនាញ ឬមានការហ្វឹកហាត់ខ្លាំងប៉ុណ្ណានោះទេ ការប្រឈមមុខនឹងការចូលព្រៃសម្បូរសត្វសាហាវៗដើម្បីធ្វើការបរបាញ់នោះ សុទ្ធតែអាចឱ្យអ្នករងគ្រោះថ្នាក់បានទាំងអស់។ ភាគច្រើនគឺរងគ្រោះដោយការវាយប្រហារពីសត្វព្រៃសាហាវៗទាំងនោះឯង ។

៩.អ្នកនេសាទ

ការនេសាទ មិនថាតែនៅលើដងទន្លេ ស្ទឹង បឹងបួរ ឬសមុទ្រទេ សុទ្ធតែអាចប្រឈមមុខគ្រោះថ្នាក់ជាច្រើនដែលមិនអាចមើលឃើញបាន។ ភាគច្រើនពួកគេអាចរងរបួស ឬដល់ថ្នាក់បាត់បង់ជីវិតក៏មាន ដោយសារតែការលង់ទឹក បញ្ហាអាកាសធាតុ (ព្យុះភ្លៀង ទឹកគួច) និងពេលខ្លះអាចដោយសារតែសត្វនៅក្នុងទឹកសាហាវៗដូចជាក្រពើ ​និងត្រីឆ្លាមជាដើម។

ចំណាំ៖ ការបរបាញ់ និងប្រមាញ់សត្វព្រៃជាអំពើខុសច្បាប់។

១០. ទាហាន

មិនបាច់និយាយក៏ដឹងដែរថា ការធ្វើជាទាហាន មិនខុសពីការងារជាមន្ត្រីប៉ូលិសទេសុទ្ធតែជាការងារប្រឈមមុខនឹងគ្រោះថ្នាក់បំផុត។ ការធ្វើទាហាន ពិតជាត្រូវមានការទទួលខុសត្រូវខ្ពស់នៅក្នុងការការពារសង្គម ប្រទេសជាតិ និងទឹកដីជាដើម ហើយប្រសិនជាចេញច្បាំងទៀត ច្បាស់ណាស់បើសំណាងមិនស្លាប់ ក៏របួសធ្ងន់ស្រាល ឬពិការដែរ៕

• ការងារ