ខេត្តសៀមរាប ៖ ក្រុមចោរប្លន់ជនជាតិចិនប្រុសចំនួន៣នាក់ បានជិះឡាន១គ្រឿងក្នុងគោលបំណងទៅប្លន់អ្នកដូរលុយ និងវេលុយវីងនៅស្រុកពួកទាំងយប់ ខណៈកំពុងរង់ចាំម្ចាស់ផ្ទះ ដែលត្រឡប់មកពីលក់ដូរនៅផ្សារលើធំថ្មី ក្នុងក្រុងសៀមរាប ដែលនាំគ្នាឈរនៅក្រៅរបង ដល់ពេលផ្ទះម្ចាស់ (ស្ត្រី)ត្រូវជាម្តាយមីងមកដល់ក៏ចុះពីលើរថយន្តបម្រុងចូលទៅបើកទ្វារផ្ទះ។
ចំណែក២នាក់ប្តីប្រពន្ធ និងក្មួយស្រីរង់ចាំនៅក្នុងរថយន្ត ខណៈពេលនោះជនសង្ស័យក៏បានភ្ជង់កាំភ្លើងខ្លី និងចាប់ក្របួច.កអាវម្តាយមីងជាប់ ហើយនាំចូលទៅក្នុងផ្ទះវាយក្បាល១កាំភ្លើងខ្លី បណ្តាលឱ្យបែកឈាមហូរពេញខ្លួន រីឯជនសង្ស័យ២នាក់ទៀតក៏ទៅវាយកញ្ចក់រថយន្តជនរងគ្រោះបំបែក ដើម្បីយកលុយ ។ ហេតុការណ៍ចោរជនជាតិចិនទាំង៣នាក់ ចេញប្លន់នៅក្នុងខេត្តសៀមរាប ជាលើកទី១នោះ បានកើតឡើងនៅវេលាម៉ោង១៩និង៣០នាទីយប់ ថ្ងៃទី១៤ ខែសីហា ឆ្នាំ២០១៨ ស្ថិតនៅផ្ទះជនរងគ្រោះក្នុងភូមិអូរតាប្រាក់ ឃុំពួក ស្រុកពួក ខេត្តសៀមរាប ។
លោកវរសេនីយ៍ឯក ទេព ពុំសែន អធិការដ្ឋាននគរបាលស្រុកពួកបានប្រាប់នៅព្រឹកថ្ងៃទី១៥ ខែសីហានេះថា ក្នុងប្រតិបត្តិការតាមប្រម៉ាញ់ករណីរឿងអំពើលួចដោយមានស្ថានទម្ងន់ទោស(ប្លន់អាវុធខ្លី) កើតឡើងនៅចំណុចមុខផ្ទះជនរងគ្រោះក្នុងភូមិអូរតាប្រាក់ ស្រុកពួក ខេត្តសៀមរាប ត្រូវបានសមត្ថកិច្ចយើងតាមចាប់បានទាំងមនុស្ស និងរថយន្ត រួចយកមកសួរនាំនៅអធិការ ។ លោកបានបញ្ជាក់ថា តាមដំណើររឿងនៅថ្ងៃកើតហេតុជនរងគ្រោះឈ្មោះ តៅ សុភា ភេទស្រី អាយុ៤៤ឆ្នាំ (ម្តាយមីង) ជាអ្នកចុះបើកទ្វាររបងបម្រុងចូលផ្ទះ ប៉ុន្តែត្រូវជនសង្ស័យចាប់វាយក្បាល និងកាំភ្លើងខ្លី បណ្តាលឱ្យរងរបួសធ្ងន់ ។
ចំណែក២នាក់ប្តីប្រពន្ធដែលត្រូវចោរមានគោលបំណងប្លន់យកលុយនោះដែលត្រូវជាក្មួយគឺឈ្មោះ ជូ រចនា ភេទស្រី អាយុ២៦ឆ្នាំ ត្រូវជាប្រពន្ធរបស់ឈ្មោះ ឌឹម វិជ្ជារ៉ា ភេទប្រុស អាយុ២៦ឆ្នាំ (ប្តី)ជាអ្នកបើកឡាន រីឯកូនស្រីតូចម្នាក់នៅក្នុងឡានដែរនោះមានឈ្មោះ រក្សា អាយុ១១ឆ្នាំ ត្រូវជាក្មួយតៃកុងឡាន ជិះឡានម៉ាកកាម៉ារី ពណ៌ស ស្លាកលេខភ្នំពេញ 2AH- 9660 ។ លុះបើកមកដល់មុខរបងផ្ទះជនរងគ្រោះទី១- ឈ្មោះ តៅ សុភា បានអង្គុយផ្នែកខាងក្រោយម្នាក់ឯង ដើម្បីចុះពីឡានបើកទ្វាររបងចូល ស្រាប់តែឃើញមានក្រុមជនសង្ស័យមិនស្គាល់មុខ មានពាក់ម៉ាស់បិទមុខជិត ភេទប្រុស ចំនួន៣ អាយុប្រហែល៣០ឆ្នាំជាង មាឌធំខ្ពស់ ស្លៀកពាក់ស៊ីវិល មិនច្បាស់ភិនភាគ បានដើរចេញពីដុបព្រៃផ្នែកខាងកើតអែបផ្លូវនោះសម្តៅមកឡានគាត់ ភ្លាមនោះមានម្នាក់ស្ទុះមកវាយលើគាត់ ដោយវត្ថុរឹងចំក្បាល បណ្តាលឱ្យគាត់រងរបួស តែគេមិនបាននិយាយអ្វីទេ ហើយគាត់លើកដៃប្រវ៉ាយទៅមនុស្សនោះវិញ និងបានស្រែករកអ្នកជិតខាងជួយ ។ ចំណែកគ្នាគេម្នាក់នាក់ទៀត បានវាយបំបែកកញ្ចក់ឡានបែកផ្នែកខាងស្តាំ បណ្តាលឱ្យមុតកូតស្បែកកែងដៃស្តាំទៅលើជនរងគ្រោះទី២ ឈ្មោះ ជូ រចនា ភេទស្រី ដែលអង្គុយក្នុងឡានផ្នែកខាងមុខ បំណងរកទ្រព្យសម្បត្តិមានតម្លៃ ដោយជនរងគ្រោះបានស្រែកខ្លាំងៗ ហើយផ្អើលអ្នកជិតខាងទើបក្រុមជនសង្ស័យទាំង៣នាក់នោះបានរត់គេចខ្លួនទៅទិសខាងកើតឆ្លងស្ទឹងបាត់អស់ទៅ ។
លោកបានបញ្ជាក់បន្ថែមថា ក្រោយទទួលបានព័ត៌មានភ្លាមៗ កម្លាំងយើងចុះដល់កន្លែងកើតហេតុ ដើម្បីត្រួតពិនិត្យឃើញឡានរបស់ជនរងគ្រោះ (ធុនខាងលើ) មានបែកកញ្ចក់ខាងស្តាំ និងឃើញមានវត្ថុតាងដូចជា គ្រាប់កាំភ្លើង១គ្រាប់ , បង់កាំភ្លើង១ មាន៨គ្រាប់ នៅដីជិតរបងផ្ទះជនរងគ្រោះ និងដំបងទីបដែក១មូលប្រវែង៧៩ស.ម នៅមាត់ស្ទឹងខាងកើតកន្លែងកើតហេតុ ។ បន្ទាប់មកកម្លាំងសមត្ថកិច្ចយើងរួមទាំងប្រជាការពារ និងអាវុធហត្ថស្រុកក៏បានធ្វើការរុករកតាមក្រុមជនសង្ស័យក្នុងមូលដ្ឋាននោះបានឃើញមានគ្រាប់កាំភ្លើង១គ្រាប់ទៀត នៅផ្លូវបេតុងក្នុងភូមិប្រយុទ្ធ ឃុំពួក ស្រុកពួក បន្ទាប់មកយើងឃើញមានឡាន១គ្រឿង ពណ៌ទឹកប្រាក់ សេរីឆ្នាំ២០០៤ គ្មានស្លាកលេខ ក្នុងឡាននោះមានដាក់ម៉ូតូ១គ្រឿងទៀត ហុងដាឌ្រីម ពណ៌ខ្មៅ គ្មានស្លាកលេខ សេរីឆ្នាំ២០១៦ ទុកចោល ក្នុងភូមិប្រយុទ្ធ ឃុំពួក ស្រុកពួក ចាក់សោឡានជាប់ ហើយកម្លាំងយើងក៏ស្ទូចយកមករក្សាទុកនៅអធិការដ្ឋានស្រុកពួកសិន ។
លោកបានបន្ថែមទៀតថា បន្ទាប់ពីឃើញរថយន្តរបស់ជនសង្ស័យរួចមក យើងបន្តតាមរកជនសង្ស័យបន្តទៀតដល់ម៉ោង១និង២០នាទីរំលងអធ្រាត្ររហូតម៉ោង៤ឈានចូលថ្ងៃទី១៥ ខែសីហា ឆ្នាំ២០១៨ ទើបកម្លាំងយើងបានឃាត់ជនសង្ស័យបានម្នាក់ នៅចំណុចមុខសាលាវិទ្យាល័យពួក (ឈ្មោះLe xiaosi ភេទប្រុស អាយុ៣៨ឆ្នាំ ជនជាតិចិន បន្ទាប់មកឃាត់បានម្នាក់ទៀត ឈ្មោះ Hu Ming chaa ភេទប្រុស អាយុ៤៣ឆ្នាំ ជនជាតិចិន និងជនសង្ស័យទី៣ ឃាត់បាននៅក្បែរវត្តធម្មយុទ្ធឈ្មោះ Lhang yong sheng ភេទប្រុស អាយុ៤៨ឆ្នាំ ជនជាតិចិនដែរ រួចនាំយកមកសួរនៅអធិការស្រុក ដើម្បីរៀបចំកសាងសំនុំរឿងបញ្ជូនទៅការិយាល័យជំនាញ ហើយរៀបចំបញ្ជូនបន្តទៅតុលាការខេត្ត ចាត់ការទៅតាមផ្លូវច្បាប់ ។
បច្ចុប្បន្នជនសង្ស័យជនជាតិចិនទាំង៣នាក់ និងវត្ថុតាងត្រូវបានកម្លាំងជំនាញកំពុងរៀបចំកសាងសំណុំរឿងបញ្ជូនខ្លួនទៅតុលាការនៅថ្ងៃទី១៥ ខែសីហា ឆ្នាំ២០១៨នេះ ដើម្បីចាត់ការទៅតាមផ្លូវច្បាប់៕
ប្រភព៖ kohsantepheapdaily
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]