ថៃ្ងមុន Pique ពេលនេះកីឡាករម្នាក់ទៀតហើយ ចូលនិវត្ដន៍ពីជម្រើសជាតិអេស្ប៉ាញ

បរទេស៖ ខែ្សបម្រើឆ្នើមរបស់ក្រុម Manchester City កីឡាករ David Silva បានប្រកាសពីការចូលនិវត្ដន៍របស់គេពីក្រុមជម្រើសជាតិអេស្ប៉ាញហើយ។ 

កីឡាករវ័យ ៣២ឆ្នាំនេះ បានជួយឲ្យអេស្ប៉ាញឈ្នះជើងឯកពិភពលោក២០១០ និងឈ្នះពាន Euro ឆ្នាំ២០០៨,២០១២ ជាមួយនឹងការលេងឲ្យក្រុមគោរជល់នេះចំនួន ១២៥ដង ខណៈការចូលលេងដំបូងរបស់គេគឺក្នុងឆ្នាំ២០០៦។

ក្រោយប្រកាសពីការភ្ជួរស្បែកជើងនេះ Silva បាននិយាយថា រូបគេពិតជាមានមោទនភាពណាស់ដែលអាចលេងឲ្យក្រុមជម្រើសជាតិ ហើយការសម្រេចចិត្ដមួយនេះ គឺជាការសម្រេចចិត្ដដ៏លំបាកមួយក្នុងអាជីពរបស់គេ។  

«ខ្ញុំកំពុងតែស្ថិតនៅក្នុងក្រុមដែលខ្ញុំតែងតែសម្រៃ ហើយវានឹងក្លាយជាការចងចាំជារៀងរហូត។ វាមិនមែនជារឿងងាយទេក្នុងការសម្រេចនូវការប្រកាសមួយនេះ, ខ្ញុំបានគិតពីវាជាច្រើនសប្ដាហ៍មកហើយ។ ក្រុមជម្រើសជាតិ បានផ្ដល់អ្វីៗគ្រប់យ៉ាង និងបានធើ្វឲ្យខ្ញុំក្លាយជាកីឡាករដ៏ល្អមួយរូបផងដែរ»។

សូមបញ្ជាក់ថា កាលពីសប្ដាហ៍មុន ខែ្សការពាររបស់ក្រុម Barcelona កីឡាករ Gerard Pique ក៏បានប្រកាសការចូលនិវត្ដន៍ពីក្រុមជម្រើសជាតិផងដែរ៕