ផ្លែប៉េងប៉ោះ ជាពពួកផ្លែឈើដែលគេអាចប្រើប្រាស់ស្ទើរតែក្នុងគ្រប់មុខម្ហូប។ វាផ្តល់រសជាតិជូរអែមដល់មុខម្ហូប និងបង្កើនឱជារសកាន់តែឈ្ងុយឆ្ងាញ់។
ប៉ុន្តែអ្នកមានដឹងទេថា ប៉េងប៉ោះសំបូរទៅដោយសារធាតុចិញ្ចឹមយ៉ាងសំបូរបែបដែលផ្តល់ផលវិជ្ជមានជាច្រើនដល់សុខភាពរាងកាយយើង។
ដូច្នេះខាងក្រោមនេះអ្នកនឹងបានយល់ដឹងអំពីអត្ថប្រយោជន៍សុខភាពទាំង ៥ យ៉ាង ដោយគ្រាន់តែហូបប៉េងប៉ោះឲ្យបានជាប្រចាំ៖
១. ប្រឆាំងជំងឺមហារីក
ប៉េងប៉ោះ មានផ្ទុកសារធាតុប្រឆាំងនឹងជាតិពុលពិសេសមួយប្រភេទ ដែលគេបានរកឃើញថាចូលរួមចំណែកប្រឆាំងការរីកលូតលាស់នៃកោសិកាមហារីក តាមរយៈការទប់ទល់នឹងប្រតិកម្មអុកស៊ីតកម្មដែលកោសិកាយើងរងឥទ្ធិពលរាល់វិនាទី ដែលជាដើមហេតុធ្វើឲ្យកោសិកាមានការលូតលាស់ខុសប្រក្រតី និងបង្កទៅជាកោសិកាមហារីកនេះឯង។
ការហូបប៉េងប៉ោះឲ្យបានជាប្រចាំ អាចការពារលោកអ្នកពីការវិវឌ្ឍន៍នៃជំងឺមហារីកពោះវៀនធំ ក្រពេញប្រូស្តាត និងជំងឺមហារីកសួត។
២. ប្រឆាំងជំងឺដាច់សរសៃឈាមខួរក្បាល
ដូចគ្នានេះផងដែរ សារធាតុប្រឆាំងនឹងជាតិពុលដែលមានផ្ទុកក្នុងផ្លែប៉េងប៉ោះ មានមេកានិចពិសេសមួយទៀត ដោយវាមានតួនាទីក្នុងការប្រឆាំងនឹងបញ្ហាឈាមកកក្នុងសរសៃឈាមដែលច្រើនបណ្តាលមកពីការស្ទះដោយសារកករផ្តុំនៅតាមសរសៃឈាម។
អ្នកដឹងទេថា ការស្ទះសរសៃឈាមតូចៗល្អិតឆ្មារជាពិសេសនៅខួរក្បាល អាចបណ្តាលឲ្យអ្នកបាត់បង់ស្មារតីភ្លាមៗ ហើយវាអាចប៉ះពាល់ទៅដល់ដំណើរការធម្មតានៃប្រព័ន្ធប្រសាទ និងសរីរាង្គផ្សេងៗទៀត។
ប៉ុន្តែការហូបផ្លែប៉េងប៉ោះឲ្យបានញឹកញាប់ អាចកាត់បន្ថយហានិភ័យនៃជំងឺដាច់សរសៃឈាមខួរក្បាលបាន។
៣. ប្រឆាំងនឹងការពុកឆ្អឹង
ផ្លែប៉េងប៉ោះ មានផ្ទុកសារធាតុរ៉ែសំខាន់ពីរប្រភេទ ដែលដើរតួនាទីយ៉ាងសំខាន់សម្រាប់សុខភាពឆ្អឹងដ៏រឹងមាំ។ ទីមួយ វាមានផ្ទុកនៅសារធាតុម៉ាញេស្យូម ដែលចូលរួមចំណែកយ៉ាងសកម្មក្នុងការផលិតអរម៉ូនពិសេសម្យ៉ាង (កាល់ស៊ីតូនីន) ហើយអរម៉ូននេះជាភ្នាក់ងារដ៏ចាំបាច់បំផុតក្នុងការចាប់យកសារធាតុកាល់ស្យូមបញ្ចូលក្នុងឆ្អឹងដើម្បីឲ្យឆ្អឹងរឹងមាំ។ ចំណែក ទី២ វិញ វាសំបូរទៅដោយប៉ូតាស្យូម ដែលការពារការខូចខាតកោសិកាឆ្អឹងដោយសារប្រតិកម្មគីមីក្នុងខ្លួន ហើយវាបង្ការការបាត់បង់នូវសារធាតុកាល់ស្យូមនៅពេលយើងចាស់ទៅផងដែរ។
៤. រក្សាសម្ពាធឈាម
អ្នកមានដឹងទេថា បញ្ហានៃការឡើងសម្ពាធឈាមរ៉ាំរ៉ៃ ឬហៅថាជំងឺលើសឈាម អាចផ្តល់ផលប៉ះពាល់ជាច្រើនទៅដល់សុខភាពរាងកាយយើង។ កាលណាមានបញ្ហាលើសឈាមរយៈពេលយូរ វាបានបង្កផលប៉ះពាល់ជាច្រើនដូចជា ជំងឺគាំងបេះដូង ជំងឺដាច់សរសៃឈាមខួរក្បាល ធ្វើឲ្យសរសៃឈាមឡើងរឹង និងជំងឺមួយចំនួនទៀត។
តែបើលោកអ្នកអាចចាប់ផ្តើមបង្កើតទម្លាប់បញ្ចូលផ្លែប៉េងប៉ោះក្នុងរបបអាហាររបស់អ្នក តាមរយៈការសិក្សាស្រាវជ្រាវមួយបានបង្ហាញថា ទម្លាប់បែបនេះបានកាត់បន្ថយហានិភ័យនៃបញ្ហាលើសឈាម និងរក្សាសម្ពាធឲ្យនៅធម្មតា។
៥. ពង្រឹងសមត្ថភាពខួរក្បាល
ប៉េងប៉ោះ សំបូរទៅដោយវីតាមីនជាច្រើនប្រភេទ ដោយក្នុងនោះវាក៏មានវីតាមីនប្រភេទ B និង E ដែលគេបានរកឃើញថា ពពួកវីតាមីនទាំងនេះដើរតួនាទីយ៉ាងសំខាន់ក្នុងការពង្រឹងសុខភាពខួរក្បាល ដោយវាជួយកាត់បន្ថយការខូចខាតកោសិកាខួរក្បាល ហើយបង្កើននូវការចងចាំ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
