ពីកីឡាករត្រូវគេផ្ដាច់កុងត្រា អភិវឌ្ឍន៍ខ្លួនរហូតជាប់ឈ្មោះជាកីឡាករបរទេសទាំង៥ លេងល្អនៅលីគកំពូលម៉ាឡេស៊ី

ភ្នំពេញ៖ ថ្មីៗនេះខែ្សបម្រើ ធារី ចន្ថាប៊ីន ត្រូវបានគេហទំព័រកីឡាដ៏ធំ Fox Sport បានចុះផ្សាយពីការជាប់ឈ្មោះជាកីឡាករបរទេសឆ្នើមទាំង៥ ប្រចាំលីកកំពូលម៉ាឡេស៊ី។ 

អតីតសមាជិករបស់ភ្នំពេញក្រោននេះ បានប្រកបអាជីពនៅក្លិប Terengganu FC ដោយបានចូលរួមកាលពី៨ខែមុន និងបានក្លាយជាកីឡាករដ៏សំខាន់ម្នាក់សម្រាប់ក្រុមនាពេលបច្ចុប្បន្នផងដែរ។

មុននឹងផ្លាស់មកលេងនៅម៉ាឡេស៊ីនេះ ធារី បានចំណាយពេលលេងនៅលីគលំដាប់ទី២ថៃ ឲ្យក្រុម Krabi FC ក្រោយចាកចេញពី ក្រុមជើងឯកលីកកំពូលកម្ពុជា ៦សម័យ ភ្នំពេញក្រោន ជាទីដែលរូបគេចំណាយពេលចម្លោះពីឆ្នាំ២០១៣ រហូតដល់ឆ្នាំ២០១៦ និងឈ្នះជើងឯកលីកចំនួន ២។ 

យ៉ាងណាក្ដី កីឡាករកូនកាត់ខែ្មរ-បារាំងរូបនេះ លេងឲ្យក្រុម Krabi FC បានត្រឹមពាក់កណ្ដាលរដូវកាលប៉ុណ្ណោះ បន្ទាប់ពីត្រូវក្រុមអគ្គីសនីកម្ពុជា ខ្ចីជើងក្នុងជុំទី២ នៃការប្រកួតលីកកំពូលកម្ពុជា។

ក្រោយពីបញ្ចប់ការខ្ចីជើងនេះ កីឡាករវ័យ២៦ឆ្នាំ ត្រូវបានក្លិបនៅថៃ អនុញ្ញាតឲ្យចាកចេញពីក្លិប ទោះនៅសល់កុងត្រាក៏ដោយ ហើយរូបគេក៏បានសម្រេចចូលរួមជាមួយក្រុមដែលទើបឡើងមកលីកកំពូលម៉ាឡេស៊ី គឺក្រុម Terengganu FC តែម្ដង។ 

សូមបញ្ជាក់ថា ធារី ចន្ថាប៊ីន បានជាប់ជាកីឡាករបរទេសឆ្នើមទាំង៥ នៃលីគកំពូលម៉ាឡេស៊ី ក្រោយពីរូបគេបង្ហាញទម្រង់លេងយ៉ាងល្អឲ្យក្រុម Terengganu FC ជាពិសេសគឺរូបគេបានក្លាយជាកីឡាករកម្ពុជា តែម្នាក់គត់ដែលអាចបន្ដលេងនៅទីនោះ ក្រោយកីឡាករកម្ពុជា៣នាក់ទៀត គឺប្រាក់ មុន្នីឧត្ដម, កែវ សុខផេង និងចាន់ វឌ្ឍនាកា ត្រូវបានក្លិបនៅទីនោះ ផ្ដាច់កុងត្រា៕