ស្ត្រីមួយចំនួនអាចនឹងអន់ចិត្តនឹងខ្លួនឯង ដែលកើតមកជាមនុស្សស្រី ហើយត្រូវបានគេបំបិទសិទ្ធ និងមិនអាចធ្វើអ្វីៗបានច្រើនដូចជាបុរសធ្វើ រួមទាំងទំនៀមទំលាប់ជាច្រើនដែលស្ត្រីត្រូវប្រព្រឹត្តតាមផងដែរ។
អ្វីដែលអ្នកមិនដឹង ការពិតកើតជាមនុស្សស្រីក៏មានរឿងសំណាងជាច្រើនផងដែរ ដែលអ្នកប្រហែលជាមិនបានចាប់អារម្មណ៍ ថានេះជាចំណុចអស្ចារ្យមួយដែលបុរសៗមិនអាចធ្វើបានដូចអ្នកឡើយ។
ដូច្នេះមកតាមដានសំណាងទាំង ១៥ចំណុច ដែលអ្នកបានកើតមកជាមនុស្សស្រី ៖
១. អាចទ្រាំទ្រនឹងការឈឺចាប់បានខ្ពស់
ស្ត្រីជាមាតានៃពិភពលោក គឺបានន័យថាស្ត្រី គឺជាមនុស្សម្នាក់គត់ដែលអាចទទួលរ៉ាប់រងពពោះកូនក្នុងផ្ទៃដល់ទៅ ៩ខែ ១០ថ្ងៃ អាចទ្រាំទ្រនឹងការឈឺចាប់ពេលសម្រាលកូន ដែលជាពេលវេលាដ៏ពិបាក និងប្រឈមមុខនឹងគ្រោះថ្នាក់ខ្លាំងបំផុត ថែមជាមនុស្សម្នាក់ដែលត្រូវចិញ្ចឹមមើលថែកូនចៅផងដែរ។ នៅក្នុងនោះផងដែរ គេក៏រកឃើញថា ស្ត្រីជាភេទដែលពូកែស៊ូទ្រាំនឹងការឈឺចាប់ទាំងផ្លូវកាយ និងផ្លូវចិត្ត។
២. ស្ត្រីមានអាយុវែងជាងបុរស
តាមស្ថិតិជាច្រើនបានបង្ហាញថា ស្ត្រីមានអាយុវែងជាងបុរស ដែលមូលហេតុភាគច្រើនបណ្តាលមកពីកត្តាការងារ និងទាក់ទងនឹងជំងឺជាដើម។ ជាពិសេស គេដឹងថាបុរសមានការងារប្រឈមនឹងគ្រោះថ្នាក់ ដែលអាចប៉ះពាល់ដល់អាយុជិវិត ថែមរបបរស់នៅរបស់បុរសដូចចជា ការផឹកស្រា ជក់បារី និងរបបចំណីផ្សេងៗ ក៏ជាផ្នែកមួយដ៏ចម្បងដែលធ្វើឱ្យបុរសមានជំងឺច្រើនជាងស្ត្រី និងឆាប់ស្លាប់ផងដែរ។
៣. ស្ត្រីអាចឱបគ្នាបានដោយគ្មានបញ្ហា
ក្នុងសង្គម ស្ត្រីនិងស្ត្រីអាចឱបគ្នាតាមទីសារណៈបានដោយគ្មានបញ្ហា ហើយក៏មិនមានអ្នកណាមកនិយាយដើម ឬពេបជ្រាយដែរ ដោយពួកគេគិតថាជារឿងធម្មតា មិនមែនជារឿងចម្លែកនោះទេ។ ខុសពីបុរស ការឱបជាមួយភេទដូចគ្នាអាចនឹងត្រូវអ្នកដទៃសើចចម្អក និងគិតក្នុងផ្លូវអវិជ្ជមានក៏មាន។
៤. អាចយំបាន
ស្ត្រីមានសេរីភាព ក្នុងការបញ្ចេញអារម្មណ៍ច្រើនជាងបុរស ដោយនាងអាចយំ អាចបញ្ចេញភាពទន់ខ្សោយ របស់ខ្លួនឯងបានដោយមិនបាច់ក្រែងចិត្ត ឬខ្លាចអ្នកដទៃសើចចម្អក។ ហើយការយំពេលខ្លះរបស់ស្ត្រី ក៏មិនត្រូវបានគេមើលងាយថាជាភាពទន់ជ្រាយដែរ ព្រោះគេគិតថានេះជាធម្មជាតិរបស់មនុស្សស្រីទៅហើយ ដែលទាំងអារម្មណ៍ រំភើប រីករាយ ភ្ញាក់ផ្អើល កើតទុក្ខ និងសេចក្តីស្រលាញ់សុទ្ធតែអាចបញ្ចេញតាមរយៈទឹកភ្នែកជានិច្ច។
៥. មានកម្មវិធីសម្រាប់ស្ត្រី (Ladies’s Night)
បច្ចុប្បន្នមានការឱ្យតម្លៃ និងផ្តល់សិទ្ធចំពោះស្ត្រីច្រើនណាស់ ដោយកម្មវិធីខ្លះគេបានបង្កើតសម្រាប់ស្ត្រីតែម្តង ដូចជាកម្មវិធីជប់លៀងនៅកន្លែងញ៉ាំអី ភោជនីយដ្ឋាន ឬក្លឹបរាត្រី សុទ្ធតែមានកម្មវិធីពិសេសៗសម្រាប់ស្ត្រីដូចជា ការបញ្ចុះតម្លៃ ការបន្ថែមភេសជ្ជៈផ្សេងៗមិនគិតថ្លៃ និងអត្ថប្រយោជន៍ជាច្រើនទៀត។
៦. ការតុបតែងមុខមាត់ជារឿងធម្មតា
ការតុបតែងផ្ទៃមុខ រួមទាំងការធ្វើម៉ូដសក់ផ្សេងៗជារឿងធម្មតាទៅហើយសម្រាប់ស្រ្តី ដោយមិនមានអ្នកណានិយាយមដើម ពេបជ្រាយ ឬស្តីបន្ទោសនោះទេ ព្រោះគេដឹងថានេះជាធម្មជាតិ ហើយស្ត្រីគ្រប់រូបសុទ្ធតែចង់ស្អាត។ ខុសពីបុរស បុរសនឹងត្រូវបានគេមើលទៅចម្លែក និងអាចត្រូវគេពេបជ្រាយនិយាយដើមប្រសិនជាបុរសនោះតុបតែងមុខ ឬប្រឹងតុបតែងខ្លួនខ្លាំងពេកជាដើម។
៧. អាចស្លៀកសំលៀកបំពាក់អ្វីក៏បាន
បើនិយាយពីការស្លៀកពាក់ គ្មានអ្នកណាមានសំលៀកបំពាក់ច្រើនពេញទូរជាងស្រ្តីនោះទេ ហើយស្ត្រីថែមទាំងអាចមានសិទ្ធស្លៀកសំលៀកបំពាក់បានគ្រប់ម៉ូត គ្រប់ពណ៌ មិនថាខោអាវ ខោ សំពត់ ឬម៉ូតចម្លែកៗនោះទេ។
៨. ភាពជាម្តាយ
នៅទូទាំងពិភពលោកមានចំនួនប្រជាជនតែពាក់កណ្តាលតែប៉ុណ្ណោះដែលអាចមានលទ្ធភាពបង្កើតកូនបាននោះគឺ ស្ត្រីតែម្តង ហើយនេះគឺជាធម្មជាតិដ៏អស្ចារ្យ និងជាភាពជោគជ័យមួយរបស់មនុស្សស្រីគ្រប់រូប ដែលបុរសមិនអាចធ្វើបានដូច។
៩. អាចកាន់កាបូប
ស្ត្រីភាគច្រើន ទៅណាមកណាតែងតែមានកាបូបជាប់នឹងដៃ គ្រាន់តែតូច និងធំតែប៉ុណ្ណោះ ហើយភាគច្រើនសុទ្ធតែមានសំភារៈជាច្រើននៅក្នុងកាបូបផងដែរ ដូចជារបស់តុបតែងខ្លួន ក្រែម ម្សៅ ឡេលាបស្បែក និងរបស់សំខាន់ៗសម្រាប់ស្ត្រីជាដើម។ ហើយការកាន់កាបូប និងមានរបស់ទាំងនោះក្នុងកាបូបក៏មិនមែនជារឿងចម្លែកដែរ។
១០. មិនមានបញ្ហាទំពែកក្បាល
ទំពែក ឬបញ្ហាជ្រុះសក់ភាគច្រើនកើតឡើងតែលើបុរសតែប៉ុណ្ណោះ ចំណែកស្ត្រីមិនដែលមានបញ្ហាបែបនោះឡើយ ដោយសារតែរាងកាយស្ត្រី មានប្រព័ន្ធភាពស៊ាំការពារបញ្ហានេះ ហើយក្រូម៉ូសូម X របស់ស្ត្រីមានលទ្ធភាពប្រឆាំងនឹងអាការទំពែកនេះផងដែរ។ អ្វីដែលសំខាន់នោះស្ត្រីមានសក់វែង និងមានការលូតលាស់សក់ជាងបុរស ដែលជាហេតុធ្វើឱ្យស្ត្រីទោះជាមានបញ្ហាជ្រុះសក់ក៏មិនដល់ថ្នាក់ទំពែកដែរជាពិសេសមានផលិតផលសម្រស់ជាច្រើនដើម្បីជំនួយសុខភាពសរសៃសក់របស់ស្ត្រីទៀតផង។
១១. កម្រិតការមើលឃើញពណ៌ច្រើនជាងបុរស
ដោយសារតែធម្មជាតិពីកំណើត ស្ត្រីជាទូទៅមានការយល់ដឹងខ្ពស់ដែលទាក់ទងនឹងពណ៌ បានន័យថាស្ត្រីមានការសង្កេត និងអាចមើលឃើញពណ៌ច្រើនជាងបុរស ដែលជាហេតុធ្វើឱ្យស្ត្រីអាចធ្វើកិច្ចការទាក់ទងការតុបតែង ឬតែងលម្អពូកែជាងបុរស។
១២. មានជំនាញទំនាក់ទំនងដ៏អស្ចារ្យ
អ្នកណាៗក៏ដឹងដែរថាស្ត្រីត្រូវបានគេផ្តល់អទិភាពច្រើនជាងបុរស ហើយក៏ជាភេទដែលពូកែខាងទំនាក់ទំនងជាមួយនឹងមនុស្សជុំវិញច្រើនជាងបុរសផងដែរ ទាំងរឿងការងារ មិត្តភាព និងការបញ្ចេញមតិយោបល់ផងដែរ តាមរយៈការបញ្ចេញទឹកមុខ ទៅតាមអារម្មណ៍ ដែលជាចំណុចទាក់ទាញមួយផងដែរ។ ដូច្នេះហើយបានជាការងារទំនាក់ទំនង ឬការងារទាក់ទងនឹងសង្គម ការឆ្លើយតបសារ ការពន្យល់ណែនាំផ្សេងៗ ស្ត្រីតែងតែធ្វើការមានប្រសិទ្ធភាពជាងបុរស។
១៣. ស្រ្តីមានសិទ្ធអាទិភាព
នៅក្នុងពេលបច្ចុប្បន្ន ស្ត្រីត្រូវបានគេគោរព និងផ្តល់សិទ្ធជាចម្បងមុនបុរស ដែលមានពាក្យគេតែងនិយាយថា Lady First គឺបានន័យថាស្ត្រីមានសិទ្ធអទិភាពមុនគេ មិនថាតែក្នុងកិច្ចការសង្គម ក្នុងការជួយសង្គ្រោះ និងក្នុងការងារផ្សេងៗនោះទេ។ ជាពិសេសមនុស្សស្រីក៏ត្រូវបានគេស្រលាញ់ថ្នាក់ថ្នមជាងបុរសៗដែរ ពីសំណាក់ម្តាយឪពុក បងប្អូន និងមនុស្សជាទីស្រលាញ់។
១៤. អាចនៅផ្ទះ
បើទោះបីជាបុរស និងស្ត្រីមានសិទ្ធស្មើគ្នា តែស្ត្រីអាចមានសិទ្ធនៅផ្ទះ មិនបាច់ធ្វើការអ្វី ឬធ្វើតែកិច្ចការផ្ទះក៏បានដែរ បើមិនទាន់រៀបការគឺមានឪពុកម្តាយផ្គត់ផ្គង់ ហើយបើរៀបការហើយមានប្តីគឺត្រូវប្តីចិញ្ចឹម ។ ខុសពីបុរស នៅពេលពេញវ័យបុរសមានទំនួលខុសត្រូវច្រើនណាស់ ជាពិសេសត្រូវតែមានការងារ និងអាចចិញ្ចឹមជីវិតខ្លួនឯងបាន។ មិនមែនជារឿងចម្លែកទេ បើគេឃើញថាស្ត្រីមិនធ្វើការហើយនៅផ្ទះ តែបើបុរសមិនធ្វើអ្វីសោះនឹងត្រូវគេនិយាយមដើម និងមើលងាយជាមិនខាន។
១៥. ទទួលបានផ្កាច្រើន
គេប្រៀបដូចស្ត្រីទៅនឹងផ្កាដ៏ស្រស់ស្អាត ហើយផ្កាក៏សាកសមសម្រាប់ស្ត្រីបំផុតដែរ មិនថាតែចាស់ ឬក្មេងនោះទេ។ ដូច្នេះហើយមិនថាមានកម្មវិធីអ្វី ឬមានពិធីបុណ្យធំៗយ៉ាងណាទេ ស្ត្រីតែងតែទទួលបានផ្កាច្រើនជាងអ្នកណាៗទាំងអស់ ទាំងការបង្ហាញការស្រលាញ់ ការអប់អរ និងការកោតសរសើរជាដើម៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]