កុំឱ្យចិនវ៉ាដាច់ខាងសំណង់កញ្ចក់លើអាកាសពេក! មកស្គាល់អាគារកញ្ចក់វិលដំបូងបង្អស់ និងតែមួយគត់ក្នុងលោក (មានវីដេអូ)

អាមេរិក៖ អាគារខ្ពស់កប់ពពក The Space Needle (រាងដូចម្ជុលនៅក្នុងលំហ) ដែលមានទីតាំងនៅរដ្ឋ Seattle នៃសហរដ្ឋអាមេរិកតាំងពីឆ្នាំ ១៩៦២ មកម្ល៉េះ ត្រូវបាននឹងកំពុងកែលម្អដោយចំណាយទឹកប្រាក់ខ្ទង់ ១០០ លានដុល្លារអាមេរិក។ 

បើយោងតាមប្រភពសារព័ត៌មាន បានឲ្យដឹងថា កាលពីថ្ងៃទី៣ ខែសីហា ម្សិលមិញនេះ អាគា​រខ្ពស់រាងស្តួចនេះ បានបង្ហាញចំណុចបន្ថែមចុងក្រោយគឺ កម្រាលកញ្ចក់វិលដំបូងបំផុត និងមានតែមួយគ្មានពីរក្នុងពិភពលោក ដែលគេឱ្យឈ្មោះថា «The Loupe» ។

ដោយស្ថិតនៅកម្ពស់ជាង ១៥០ ម៉ែត្រ ឬស្មើនឹង ៥០ ជាន់ពីលើដងវិថី ជាន់ដែលក្រាលកញ្ចក់មើលធ្លុះថ្មីនេះ ផ្តល់លទ្ធភាពឱ្យភ្ញៀវមើលទេសភាពជុំវិញខ្លួនបាន ៣៦០ ដឺក្រេ ពេញភ្នែកតែម្តង ពីលើក្រុងធំបំផុតក្នុងតំបន់ប៉ាស៊ីហ្វិកប៉ែកពាយព្យ នៃសហរដ្ឋអាមេរិក ដោយក្នុងមួយជុំប្រើរយៈពេល ៤៥ នាទី។ 

កម្រាលនេះវិលដោយកម្លាំងម៉ូទ័រចំនួន ១២ ហើយដើម្បីធានាដល់អ្នកដែលខ្វះភាពក្លាហាន ឬអ្នកខ្លាចមានបញ្ហាបច្ចេកទេសផ្សេងៗ ជាន់នេះត្រូវបានសង់ពីកញ្ចក់ស្វិតដល់ទៅ ១០ ស្រទាប់ឯណោះ។

អ្វីដែលគួរឱ្យកត់សម្គាល់នោះគឺ អាគារដែលមានរាងស្រួចនេះ ទទួលភ្ញៀវទេសចរឱ្យចូលទស្សនាជាង ១ លាននាក់ជារៀងរាល់ឆ្នាំ ហើយជាមួយចំណុចទាក់ទាញថ្មីដ៏អស្ចារ្យដូច្នេះ ច្បាស់ជារឹតតែអន្ទងចិត្តអ្នកចូលចិត្តស្វែងរកភាពរំជើបរំជួលជាក់ជាមិនខាន។  

គួរឱ្យដឹងថា វាត្រូវបានសាងសង់អស់រយៈពេល ៥៦ ឆ្នាំមកហើយ តាំងពីពិព័រណ៍ពិភពលោកឆ្នាំ ១៩៦២ ហើយអាគារដែលមានម៉ូតបែបអនាគតនិយមនេះ រឹតតែលើកមុខមាត់របស់ខ្លួនដោយបង្ហាញបច្ចេកវិទ្យាកាន់តែទំនើប ក្រោមការណែនាំចង្អុលផ្លូវពីលោក Olson Kundig ។

គួរឲ្យដឹងផងដែរថា ជញ្ជាំង រនាំង និងកម្រាលទាំងស្រុងត្រូវបានជំនួសដោយកញ្ចក់ថ្លា ដើម្បីពង្រីកផ្ទាំងទស្សនីយភាពលើទីក្រុងទាំងមូល៕

តើសម្រាប់ប្រិយមិត្តវិញ យល់យ៉ាងណាដែរ? 

សូមទស្សនាវីដេអូខាងក្រោម៖

• វីដេអូ