ទីក្រុងស្អាត បរិស្ថានស្អាត ការរស់នៅល្អ គឺជាពាក្យស្លោកមួយដែលអាចបញ្ជាក់បានថា បរិយាកាសនៅក្នុងទីក្រុងដែលយើងរស់នៅ ពិតជាសំខាន់ខ្លាំងណាស់សម្រាប់ការរស់នៅប្រចាំថ្ងៃ និងចំពោះសុខភាពមនុស្សយើងផងដែរ។ ហេតុដូច្នេះហើយបានជាប្រទេសជាច្រើននៅទូទាំងពិភពលោក បានចាប់ផ្តើមធ្វើការសម្អាតបរិស្ថាន និងរួមគ្នាកាត់បន្ថយជាតិពុលនៅក្នុងបរិយាកាសដើម្បីទទួលបានទីក្រុងស្អាត និងទាក់ទាញមួយនៅក្នុងលោក។
នៅក្នុងនោះដែរ មានទីក្រុងក្រុងប្រទេសទាំង១០ ដែលបានជាប់ចំណាត់ថ្នាក់ថាជាទីក្រុងដែលមានបរិស្ថានស្អាត និងមានអនាម័យជាងគេបំផុតក្នុងលោកដូចជា៖
១០.ទីក្រុង Bern ប្រទេសស្វីស
ស្ថិតនៅភាគខាងជើងនៃប្រទេសស្វីស ទីក្រុង Bern គឺជាទីក្រុងដ៏ធំមួយ និងមានប្រជាជនរស់នៅយ៉ាងច្រើនដល់ទៅចំនួន ១,៨លាននាក់ ប៉ុន្តែទាំងរដ្ឋាភិបាល និងប្រជាជនបានរួមគ្នាថែរក្សា សម្អាតទីក្រុង រួមទាំងគ្រប់គ្រងសម្រាមបានល្អ ដែលជាហេតុធ្វើឱ្យទីក្រុងមួយនេះជាប់ចំណាត់ថ្នាក់ជាទីក្រុងដ៏ស្អាតមួយជាងគេ។
៩.ទីក្រុង Oslo ប្រទេសន័រវ៉េស
ទីក្រុង Oslo គឺជាទីតាំងមួយដែលសម្បូរទៅដោយមណ្ឌលពាណិជ្ជកម្ម សេដ្ឋកិច្ច និងវិស័យរដ្ឋាភិបាល នៅក្នុងប្រទេសន័រវ៉េស រួមទាំងមានលំនៅដ្ឋានចំនួនជាង ៦៣៤,០០០គ្រួសារ និងប្រជាជនប្រមាណជា ២.៥លាននាក់។ ទីក្រុងនេះ សម្បូរទៅដោយប្រជាជនដែលមានការយល់ដឹងខ្ពស់ពីការការពារ និងថែរក្សាបរិស្ថាន ដែលជាហេតុធ្វើឱ្យទីក្រុងនេះជាប់ឈ្មោះជាទីក្រុងស្អាត និងមានអនាម័យមួយផងដែរ។
៨.ទីក្រុង Freiburg ប្រទេសអាល្លឺម៉ង់
មិនត្រឹមតែជាប់ឈ្មោះជាទីក្រុងដែលពោរពេញទៅដោយពណ៌បៃតង ទាំងសួនច្បារ សួនផ្កា និងមានទីកន្លែងនានាពោរពេញទៅដោយបរិស្ថានបៃតងល្អជាចម្បងនោះទេ តែទីក្រុង Freiburg ប្រទេសអាឡឺម៉ង់ ក៏បានក្លាយជាទីក្រុងដែលមានបរិស្ថានល្អ និងបរិយាកាសស្រស់ស្រាយជាងគេ ដោយសារតែទាំងប្រជាជន និងរដ្ឋាភិបាលបានរួមគ្នាខិតខំថែរក្សាការពារបរិស្ថានបានយ៉ាងប្រសើរ។
៧.ទីក្រុង Brisbane ប្រទេសអូស្ត្រាលី
បើទោះបីជាទីក្រុង Brisbane មិនសូវមានចំនួនប្រជាជនរស់នៅច្រើនយ៉ាងណាក៏ដោយ តែទីក្រុងនេះគឺជាមណ្ឌលសេដ្ឋកិច្ចដ៏ធំ និងមានវប្បធម៌ទំនើប ថែមទាំងបានទាក់ទាញភ្ញៀវទេសចរយ៉ាងច្រើនឱ្យមកលេងកម្សាន្តជារៀងរាល់ឆ្នាំ។ នោះក៏ដោយសារតែរដ្ឋាភិបាលនៅក្នុងទីក្រុងនេះតែងតែមានសកម្មភាពជម្រុញ និងធ្វើយ៉ាងណាឱ្យទីក្រុងនេះមានសភាពស្រស់ស្អាត រួមទាំងបរិយាកាសល្អ និងអនាម័យល្អផងដែរ។
៦.ទីក្រុង Kobe ប្រទេសជប៉ុន
ទីក្រុង Kobe មិនត្រឹមតែមានឈ្មោះថាជាទីក្រុងដែលល្បីល្បាញខាងបច្ចេកវិទ្យាទំនើប និងទាន់សម័យមួយប៉ុណ្ណោះទេ តែក្រុងនេះក៏មាននូវប្រព័ន្ធគ្រប់គ្រងកាកសំណល់បានល្អ និងមានតំបន់ពោរពេញទៅដោយពណ៌បៃតងយ៉ាងច្រើនកន្លែង ដែលជាហេតុធ្វើឱ្យទីក្រុងមួយនេះគឺជាទីក្រុងដែលជាប់ចំណាត់ថ្នាក់ជាទីក្រុងស្អាត និងមានអនាម័យល្អជាងគេ។
៥.ទីក្រុង Stockholm ប្រទេសស៊ុយអែត
Stockholm គឺជាទីក្រុងដែលសម្បូរទៅដោយមជ្ឈមណ្ឌលសេដ្ឋកិច្ច នយោបាយ រួមទាំងវប្បធម៌ និងមានប្រជាជនរស់នៅប្រមាណជា ៣.៤លាននាក់។ ទីក្រុងនេះមានមធ្យោបាយដឹកជញ្ជូន និងការធ្វើដំណើរដែលមានស្តង់ដារចូលរួមធ្វើការកាត់បន្ថយការប្រើប្រាស់ឥន្ធនៈ ទាំងការបំពុលបរិស្ថានផងដែរ។ បន្ថែមពីនេះដោយសារតែប្រជាជន និងរដ្ឋាភិបាលបានសហការរួមគ្នានៅក្នុងការសម្អាតទីក្រុងផងដែរនោះ បានធ្វើឱ្យទីក្រុង Stockholm ជាប់ឈ្មោះជាទីក្រុងស្អាតជាងគេមួយក្នុងលោក។
៤.ប្រទេសសិង្ហបុរី
សិង្ហបុរីមិនត្រឹមតែជាប្រទេសមានការអភិវឌ្ឍន៍មួយនៅក្នុងតំបន់អាស៊ីនោះទេ តែក៏បានជាប់ឈ្មោះជាប្រទេសដែលមានស្តង់ដាការរស់នៅល្អ ជាទីក្រុងស្អាត និងមានបរិស្ថានល្អផងដែរ។ នោះក៏ដោយសារតែប្រជាជននៅក្នុងប្រទេសនេះបានរួមគ្នាថែរក្សាអនាម័យ ស្រលាញ់បរិស្ថាន ជាពិសេសក៏ដោយសារតែច្បាប់ និងវិន័យដ៏តឹងរ៉ឹងនៅក្នុងប្រទេសនេះផងដែរ ដែលជាហេតុធ្វើឱ្យសិង្ហបុរីជាប់ឈ្មោះជាទីក្រុងស្អាតមួយនៅក្នុងពិភពលោក។
៣.ទីក្រុង Adelaide ប្រទេសអូស្ត្រាលី
Adelaide គឺជាទីក្រុងមួយស្ថិតនៅភាគខាងត្បូងប្រទេសអូស្រា្តលីក្បែរទន្លេ Torrens ដែលមានប្រជាជនរស់នៅប្រមាណជា ១.៣០លាននាក់។ ទីក្រុងនេះពោរពេញទៅដោយបរិស្ថានល្អ បរិយាកាសស្រស់ស្រាយ ថែមទាំងមានប្រព័ន្ធគ្រប់គ្រងសម្រាមបានល្អផងដែរ ដោយក្នុងចំណោម កាកសំណល់ប្រមាណជា ៨៥% ក្នុងក្រុងនេះត្រូវបានកែច្នៃជារបស់ប្រើប្រាស់មានប្រយោជន៍ថ្មីយ៉ាងជោគជ័យ ដែលជាហេតុធ្វើឱ្យក្រុងនេះជាប់ជាទីក្រុងស្អាត និងមានអនាម័យជាងគេ។
២.ប្រទេសលុច្សស៊ាំបួរ
ប្រទេសលុច្សស៊ាំបួរ មានទីក្រុងស្ថិតនៅប៉ែកខាងត្បូងប្រទេស ត្រង់ប្រជុំទន្លេ Petrusse និងទន្លេ Alzette ដែលមានឈ្មោះថាជាទីក្រុងបៃតងមួយ ថែមទាំងជាប់ឈ្មោះជាបេះដូងបៃតងប្រចាំទ្វីបអឺរ៉ុបផងដែរ។ នោះក៏ដោយសារតែប្រទេសនេះមានប្រព័ន្ធគ្រប់គ្រងកាកសំណល់បានល្អ ហើយប្រជាជនសុទ្ធតែរួមគ្នាសម្អាត និងថែរក្សាទីក្រុងឱ្យស្រស់ស្អាត ថែមទាំងមានបរិយាកាសរស់នៅល្អផងដែរ។
១.ទីក្រុង Calgary ប្រទេសកាណាដា
ទីក្រុង Calgary ត្រូវបានគេឱ្យចំណាត់ថ្នាក់ថាជាទីក្រុងស្អាត និងមានបរិស្ថានល្អជាងគេបំផុតនៅក្នុងលោក ដោយមានទីតាំងស្ថិតនៅក្នុងខេត្ត Alberta ប្រទេសកាណាដា រួមទាំងមានប្រជាជនរស់នៅប្រមាណជា ២.៣លាននាក់។ រដ្ឋាភិបាលនៅក្នុងទីក្រុងនេះ មាននយោបាយទាក់ទងនឹងសកម្មភាពយ៉ាងខ្លាំងក្លាក្នុងការធ្វើការ ថែរក្សា និងសម្អាតបរិស្ថាន រួមទាំងធ្វើការទប់ស្កាត់រាល់សកម្មភាពទាំងឡាយណាដែលប៉ះពាល់ ឬបំពុលបរិយាកាសផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]